Steinunn meidd | Rétt eftir að Ásta Birna sleit krossbönd

Íslandsmeistarar Fram hafa orðið fyrir annarri blóðtöku en Steinunn Björnsdóttir, leikmaður liðsins, meiddist í landsleik Íslands og Slóvakíu um helgina og verður líklega frá keppni í einhvern tíma.

Ásta Birna Gunnarsdóttir sleit krossband á dögunum og verður ekki meira með liðinu á tímabilinu.

„Það lítur ekki vel út hjá Steinunni,“ sagði Halldór Jóhann Sigfússon, þjálfari Fram, í samtalið við Morgunblaðið í gærkvöldi.

„Hún getur ekki stigið í fótinn og er mjög slæm. Um gæti verið að ræða slitið liðband eða eitthvað þessháttar. Þetta skýrist hinsvegar allt saman betur þegar hún kemur heim og kemst í myndatöku,“ sagði Halldór Jóhann.