Albert með mark og stoðsendingu í stór­sigri Fiorentina

Ítalska liðið Fiorentina átti ekki í miklum vandræðum með austurríska liðið LASK í Sambandsdeildinni í kvöld. Fiorentina vann leikinn 7-0 eftir að hafa komist í 3-0 á fyrstu fjörutíu mínútum leiksins.

Albert Guðmundsson kom inn á sem varamaður á 61. mínútu leiksins en þá var staðan orðin 4-0. Albert er að koma til baka eftir erfið meiðsli.

Albert var búinn að leggja upp mark fyrir Rolando Mandragora aðeins átta mínútum síðar. Albert skoraði síðan sjöunda markið úr vítapyrnu. Frábær innkoma hjá okkar manni en mótstaðan var ekki mikil fyrir Ítalana í kvöld.

Riccardo Sottil, Jonathan Ikoné og Amir Richardson komu Fiorentina í 3-0 forystu í fyrri hálfleiknum en fjórða markið skoraði Sottil á 58. mínútu.

Sottil var með tvö mörk og eina stoðsendingu í leiknum.

Sjötta markið var sjálfsmark á 82. mínútu en Albert skoraði úr vítinu á 85. mínútu.

Fiorentina er í öðru sæti með tólf stig, þremur stigum á eftir toppliði Chelsea. Liðið er því komið langleiðina með því að tryggja sig áfram.