Elskar kaffi að ítölskum sið og línu­lega dag­skrá

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Ég vakna klukkan sjö og reyni helst að vera komin fram úr aðeins á undan börnunum.“

Hvað er það fyrsta sem þú gerir á morgnana?

Kaffi. Ég kemst hreinlega ekki í gang fyrr en eftir fyrsta kaffibolla. Að ítölskum sið er fyrsti bollinn með flóaðri mjólk. 

Svo þegar líður á morguninn fer ég í sterkari útgáfu, en bara til klukkan tvö til þess að trufla ekki svefninn.“

Hallærislegasta sjónvarpsefni sem þú hefur fylgst með?

„Kannski ekki hallærislegt en mögulega smá old school. Línuleg dagskrá á RÚV – ég elska hana. Það eru þessir random fræðsluþættir, bresku sakamálaþættirnir og bara sú tilfinning að vera ekki að velja heldur leyfa dagskránni að stýra manni. Þetta er bæði hlýlegt og oft bara frábær leið til að læra eitthvað sem ég hefði annars ekki sökkt mér í.“

Í hvaða verkefni ertu að vinna helst í þessa dagana?

„Ég er nýtekin við sem framkvæmdastjóri Krafts og er að ná utan um öll þau flottu verkefni sem þar eru í gangi. Kraftur sinnir ungu fólki sem greinst hefur með krabbamein og aðstandendum – veitir jafningjastuðning, fræðslu, fjárhagsaðstoð og allskyns styrk á erfiðum tímum. Ég var sjálf félagi áður en ég hóf störf og þekki því málefnið af eigin raun. Nú er ég að kynnast öflugu fólki sem hefur haldið félaginu gangandi með hjarta og eldmóði – það er mjög hvetjandi.

Kraftur hefur vaxið og dafnað mikið síðastliðin ár og hefur sannað hversu mikilvægt er að styðja við bæði greinda og aðstandendur. Tilvist Krafts sem og annarra stuðningsfélaga sýnir það góða í samfélaginu okkar. Velvildin og stuðningurinn með því að styrkja og taka þátt gefur okkur öllum kraft. Þriðji geirinn er vettvangur sem fólk getur nýtt til þess að gefa af sér, sama í hvaða formi það er. Stuðningur og samstaða skipta máli í góðu samfélagi. Við lifum ekki í tómarúmi.

Annars er ég líka spennt fyrir því að fá smá páskafrí eftir annasamar vikur. Ég ætla að njóta með fjölskyldunni, elda góðan mat og vonandi ná smá garðvinnu ef veður leyfir.“

Hvernig skipuleggur þú þig í vinnu?

„Ég vinn best á morgnana og reyni að nýta þann tíma í nákvæmnisvinnu. Þegar dagskráin er þétt með fundum og samskiptum, reyni ég að raða fundum saman til að halda fókus. 

Mér finnst mjög skemmtilegt í vinnunni og það er stór hluti af minni sjálfsmynd. 

Undanfarið hef ég þó líka lagt meira upp úr jafnvægi og trúi því að það skili sér í aukinni verðmætasköpun. 

Að nýta vinnutímann vel og að reyna að aðskilja vinnu og einkalíf stuðlar að sjálfbærni vinnustaðarins.“

Hvenær ferðu að sofa á kvöldin?

„Þessa dagana fer ég snemma að sofa. Helst fyrir tíu. Það er mikið að gerast í hausnum – nýjar hugmyndir, verkefni og ábyrgð – og svefninn verður bara dýrmætari með árunum.“