Að gera ekki al­geng mis­tök sem stjórnandi í fyrsta sinn

Til hamingju með að vera kominn á þennan stað!

Að verða stjórnandi með mannaforráð í fyrsta sinn er stórt skref fyrir alla. Og lærdómsríkt. Því rétt eins og á við um fyrstu kaupendur, fyrstu vinnuna okkar, fyrstu ástina okkar, fyrstu þetta og hitt….. fylgir því alltaf eitthvað sérstakt þegar við erum að gera eitthvað í fyrsta sinn.

Það sem kennir okkur síðan á endanum oftast mest, eru erfiðustu áskoranirnar. Jafnvel mistökin sem við gerum. Og eðlilegt að eitthvað komi upp hjá öllum.

Í Harvard Business Review, eru hins vegar gefin fimm góð ráð til fólks, sem er að stíga sín fyrstu skref sem stjórnendur með mannaforráð.

Ráðin góðu eru sögð líkleg til að sporna við algengustu mistökum stjórnenda í fyrstu stjórnendastörfunum sínum, en þessi ráð eru:

1. Vertu alltaf opin/ fyrir endurgjöf

Frá fyrsta degi er gott að setja sér markmið um að kalla alltaf eftir endurgjöf frá teyminu þínu og vera alltaf opin fyrir því að fá endurgjöf.

Að kalla eftir endurgjöf frá teyminu þínu er lykilatriði í því að byggja upp opin, traust, heiðarleg og hreinskiptin samskipti á vinnustað.

2. Traustið þarf að vera gagnkvæmt

Traust er hvorki sjálfgefið né áunnið og á vinnustöðum er einfaldlega ekki hægt að tala um traust, nema það sé þá gagnkvæmt og gildi í báðar áttir. Þetta þýðir að ef þú ætlast til þess að starfsfólkið treysti þér, þarf það að vera jafn öruggt og einlægt af þinni hálfu að treysta fólkinu þínu.

3. Allir þurfa að vera í liðinu, ekki bara flestir

Að byggja upp sterka liðsheild er í flestum tilfellum eitt af markmiðunum sem hver stjórnandi ætlar sér. Hins vegar er á það bent að stjórnendur þurfi frá fyrsta degi að leggja mikla áherslu á að allir upplifi sig í liðinu.

Í kjölfar Covid eru fjölmargir vinnustaðir með starfsfólk í fjarvinnu innanborðs og er sérstaklega á það bent að fyrir nýja stjórnendur, getur verið áskorun að nálgast og kynnast starfsfólki með aðstoð tækninnar en aldrei í návist og þá sérstaklega með það í huga að allir sem einn tilheyri þeim hópi sem byggja þarf upp sem eitt sterkt lið.

4. Brotalamir en enginn er skammaður 

Nýr stjórnandi þarf líka að undirbúa sig undir það strax, að stundum munu koma upp mál þar sem mistök eru gerð eða illa fer í einhverju.

Þar skiptir máli að stjórnandinn venji sig á að skamma aldrei. Í stað spurningarinnar „Hver bar ábyrgð á þessu?“ ætti að spyrja „Hvar í ferlinu eru brotalamir fyrir okkur að endurskoða, hvernig getum við bætt okkur svo svona komi ekki fyrir aftur?

5. Ekki hætta að biðja um hjálp

Loks er að muna að það er alltaf í góðu lagi fyrir alla að biðja um aðstoð eða hjálp þegar þarf. Það á ekkert síður við um stjórnendur en starfsfólk.

Það er því alltaf af hinu góða að óska eftir aðstoð og muna að flestir stjórnendur hafa upplifað áhyggjur og kvíða eins og þú. 

Þá má nefna að auðvitað er eðlilegt að vera ekki með allt á hreinu strax í byrjun fyrir nýtt og stórt hlutverk. Í fyrrnefndri grein er meira að segja vitnað í niðurstöður rannsóknar þar sem 65% fólks sem var í fyrsta sinn í stjórnendastarfi, sagðist ekki vera fyllilega með það á hreinu, til hvers væri ætlast til af þeim.