Erfitt að setja „like“ á myndir af fólki í ræktinni klukkan sex

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

Ég er B- manneskja og reyni að sofa eins lengi og ég kemst upp með, ætli það sé ekki upp úr hálf átta sem ég fer að hugleiða að fara á fætur og ég get alveg hugleitt það í korter til tuttugu mínútur. 

Ég ætla mér alltaf að fara fyrr að sofa og vakna fyrr eins og hinir, en svo stend ég mig að því að sitja við tölvuna oft fram yfir miðnætti, enda að skrifa grein og bók á sama tíma, auk alls annars.“

Hvað er það fyrsta sem þú gerir á morgnana?

„Ég geng í leiðslu að bestu græju heimilisins, kaffivélinni og drekk ótæpilega marga bolla fyrir hádegi. 

Ræktin og slíkt á morgnana er alls ekki fyrir mig, en ég dáist að til dæmis eldri dóttur minni Jóhönnu Helgu, sem að birtir reglulega myndir af sér í ræktinni klukkan sex. 

Ég á samt frekar erfitt með að setja „like“ á þær myndir enda ekkert nema öfundsýki af minni hálfu. Ég vildi að ég hefði þennan viljastyrk sem hún hefur.“

Nefndu dæmi um misheppnaða tilraun í eldamennsku.

„Ég á mörg slík dæmi því ég er mjög dugleg í eldhúsinu. Eitt dæmi er frá því í fyrradag, ákvað að prófa laxa taco uppskrift sem að mínu mati var frekar flókin enda fullt af kryddum og hráefnum í henni og hún skiptist í fjóra hluta með alls konar tilfæringum. Ég bað eiginmanninn um að fara í búðina því að það var ekki til hunang og uppskriftin virkaði ekki án þess. Ég er með þetta allt á borðinu og það hefur aldrei truflað mig að gera nokkra hluti í einu en þarna kemur betri helmingurinn með hunangið og ég mæli það samviskusamlega í skál, 2 dl af því og nota bene hann keypti pínulitla dollu. Svo ríf ég limebörkinn niður og set út í og kreisti safann yfir hunangið. Þetta var eitthvað skrýtið og alls ekki eins og ég bjóst við að þetta yrði á bragðið. Leit aftur á uppskriftina og ohhhh limeið átti alls ekki að fara út í hunangssósuna heldur í hrásalatið. Nú voru góð ráð dýr því það var bara 1 dl eftir í krukkunni sem keypt var svo …. ,,heyrðu elskan, værir þú nokkuð til í að skjótast aftur út í búð… já og keyptu tvær krukkur núna, svona til öryggis“ Laxa tacoið heppnaðist afar vel á endanum og gestirnir okkar mjög ánægðir en stundum er bara of mikið að gera og athyglin ekki alveg á réttum stað.

En flest slysin mín hafa verið í gegnum sykurlausu uppskriftirnar sem ég hef verið að prófa í gegnum árin og þær eru fjölmargar.“

Í hvaða verkefni ertu að vinna helst í þessa dagana?

„Við vorum að ljúka við Jafnvægisvogarráðstefnuna í þessari viku og nóg að snúast í kringum hana, en ég er einnig að skrifa nýja bók um sjávarútveg og eldi ásamt Ágústi Einarssyni vini mínum, skrifa greinar um jafnréttismál, meðal annars grein um arftakaáætlanir með Þóru H. Christiansen og fleiri frábærum samstarfsaðilum í Háskóla Íslands. 

Svo eru það ýmis önnur krefjandi og skemmtileg verkefni með flottu fólki á ýmsum vígstöðvum, þannig að það er nóg að gera.“

Hvernig skipuleggur þú þig í vinnu?

Ég er með símann, tölvurnar og útprentað dagatal úr outlook á skrifborðinu. 

Ég verð að hafa þetta útprentaða líka, kemst ekki af án þess en ég nýti mér ekkert sérstakt forrit eða slíkt fyrir skipulagningu eins og margir gera.“

Hvenær ferðu að sofa á kvöldin?

„Yfirleitt ekki fyrir miðnætti, B- manneskjan er aktífust seinnihluta dags og ég er best á kvöldin. Ef ég er ekki að skrifa þá er ég að lesa eitthvað skemmtilegt eða að horfa á eitthvað með fjölskyldunni.“