„Í dag máttu vera allt og ég vil fagna því“

„Hugmyndin að sýningunni kviknaði upphaflega fyrir tíu árum síðan. Þá var ég í ljósmyndanámi og var rosa mikið spurður út í það hver ég væri og hvað ég væri að segja með myndunum mínum. Út frá því fór ég auðvitað mikið að skoða það, hvað vil ég segja með ljósmyndunum mínum og þannig kviknaði þessi hugmynd um hver sé skilgreiningin á fegurð,“ segir Kári.

Opnar í Pósthússtræti á einum stærsta degi sumarsins

Sýningin opnar sem áður segir á Menningarnótt og stendur í rúman mánuð. Hún verður utandyra á Pósthússtrætinu og getur fólk sótt um með því að taka þátt í samfélagsmiðlaherferð.

„Hver sem er getur tekið þátt með því að birta mynd af sér og segja frá því hvað geri viðkomandi manneskju hamingjusama og hver listin að vera hún sé, með millumerkinu #the.artofbeingme og tagginu @the.artofbeingme.“

„Hið innra skiptir svo miklu máli“

Kári segist hafa viljað leita nýrra leiða við að setja upp sýningu. Hann hefur komið víða að í tískuheiminum og unnið með tískurisum á borð við Chanel, Elle Magazine og Glamour.

„Mig langaði að finna persónulegri nálgun við það að velja fólk á ljósmyndasýninguna og á sama tíma gefa fjölbreyttum hópi fólks tækifæri til þess að taka þátt. Venjulega getur svona ferli farið fram í gegnum módelskrifstofu þar sem ákveðnar staðalímyndir eru kannski í boði. Núna geta allir sótt um að taka þátt og á sama tíma getur þetta gefið fólki platform til þess að tjá sig og koma sér á framfæri.

Þau sem verða valin á sýninguna verða með Instagrammið sitt merkt undir myndina þeirra og Menningarnótt er auðvitað sá dagur þar sem hvað flestir eru staddir í miðbænum, þetta er líklega fjölfarnasti dagur ársins í miðborginni. Því er þetta gott tækifæri til að koma sínu á framfæri, hvort sem það eru ákveðin skilaboð, tónlistin þín eða eitthvað annað. 

Því fleiri sem taka þátt því fleiri sjá þetta. Þannig getur líka orðið vitundarvakning á fjölbreytileikanum og á því að hið innra skiptir svo miklu máli.“

Stöðugt að kynnast sjálfum sér betur

Kári segist sannarlega hafa lært ýmislegt á undanförnum árum og sé stöðugt að komast betur að því hvað skipti hann máli.

„Ég er búinn að gera alls konar hluti í gegnum árin og vinna að ótal verkefnum víða um heiminn. Mér finnst ég hafa kynnst sjálfum mér betur í gegnum fólk sem ég hef hitt og mína vinnu en líka til dæmis í gegnum börnin mín og þannig hef ég betur komist að því hvað það er sem fær mig til að skína, tikka og tifa og hvað gerir mig hamingjusaman. 

Það eru litlu hlutirnir sem gera mig að betri manni, betri pabba og betri starfskrafti. Með því að vita hver ég er verð ég sömuleiðis meira skapandi og í betra flæði.“

Hann segir að aldurinn hafi tvímælalaust unnið vel með honum hvað þetta varðar.

„Ef ég hefði verið spurður fyrir 25 árum hver væri listin að vera ég þá veit ég ekki hverju ég hefði svarað, mögulega einhverju tengt útliti eða vinnunni. Í dag eru milljón hlutir sem skipta mig máli, til dæmis það að geta litið inn á við, lesið bók, farið í göngutúr, lært með börnunum mínum, verið með vinum, þetta eru allt lítil atriði sem verða stöðugt mikilvægari eftir því sem ég verð eldri.“

Minna Photoshop, meiri fjölbreytileiki

Kári segist upplifa jákvæða þróun í umhverfinu þegar það kemur að fjölbreyttum fyrirmyndum.

„Fyrir tíu árum síðan voru mestmegnis ákveðnar staðalímyndir í mínum bransa, mikið um Photoshop og þegar það var verið að velja fyrirsætur þá var ekki þessi fjölbreytileiki, þær voru meira eftir stöðluðum ímyndum um fegurð og stærðir.

Í dag máttu vera allt, gera allt og ég vil fagna því. Mér finnst það sem er að innan líka fá að skína skærar, útlitið var alltaf eitthvað sem var númer eitt og tvö í bransanum en í dag eru karaktereinkennin í fyrsta sæti finnst mér. 

Þegar fólk er öruggt í eigin skinni og veit hvað fær það til að skína, það gerir myndirnar mínar til dæmis áhrifaríkari. Samfélagsmiðlar spila hlutverk í þessari þróun, þar er öll flóran af fólki að koma sér á framfæri og auglýsa alls konar, þú getur unnið við það í dag en fyrir tíu árum síðan þekktist það ekki.“

Samfélagsmiðlaherferðin er í gangi í tíu daga til viðbótar og fá þau sem taka þátt einnig möguleikann á því að fara á skrá hjá Grounded Creative Studios.

„Fólk hefur tækifæri til að skína þegar fjöldinn allur af fólki gengur um Pósthússtræti og sýningin stendur fram á haust. 

Allar myndir sýningarinnar verða svo alveg óunnar, við erum að sýna okkur eins og við erum,“

segir Kári að lokum. Nánari upplýsingar um verkefnið má finna hér.