Fjár­magnaði upp­setningu í Iðnó en hrökk úr lið á frum­sýningu

Halldóra Björg Guðmundsdóttir er einn sjö leikara í leikhópnum Gnosis sem stendur að uppsetningu söngleiksins Ride the Cæclone í Iðnó um þessar mundir. Hún, ásamt einum öðrum í hópnum, leggur út fyrir uppsetningunni úr eigin vasa. Bæði starfa þau á frístundaheimili. 

Hópurinn hafði mánuðum saman unnið hörðum höndum að sýningunni og mikil spenna ríkti fyrir frumsýningarkvöldinu á þriðjudaginn. Sýningin gekk smurt fyrir sig þar til í lokaatriðinu, þegar Halldóru skrikaði fótur. 

„Það er smá eftir af lokalaginu og við erum að dansa. Ég stíg eitthvað skringilega og dett í gólfið, og finn það í augnablikinu að það er eitthvað að,“ segir Halldóra í samtali við blaðamann. 

Konfettíið enn að hrynja

Leikhópurinn flytur söngleikinn á ensku, og olli látbragð Halldóru eftir fallið því að áhorfendur virtust ekki klárir á hvað gengi á. Héldu jafnvel að fallið væri hluti af sýningunni. 

„Áhorfendur eru ekki að fatta fyrr en ég kalla á íslensku, ég er farin úr lið! Þá stoppar allt.“ segir Halldóra. 

Í framhaldinu hafi orðið uppi fótur og fit. Sjúkrabíll verið kallaður til og afar hjálplegur áhorfandi, sem reyndist gömul skátakona, aðstoðað hana.

„Ég er föst á gólfinu og það er ennþá konfettí að hrynja úr loftinu. Ég ligg þarna í svona korter áður en sjúkrabíllinn kemur.“

Og hvað var það sem gerðist?

„Hnéskelin mín fór úr lið. Þetta var meira að segja góða hnéð mitt sem er ákveðinn skellur,“ segir Halldóra kímin. 

Tekur þetta á hnefanum

Þegar sjúkraflutningamenn bar að garði hafi henni verið kippt aftur í lið, enn uppi á sviði með nýhrunið konfettíið allt um kring. 

„Ég held að öskrin mín hafi heyrst um alla bygginguna. Þetta var rosalegt og hnéð mitt er núna fimmfalt.“

Atvikið olli því að aflýsa þurfti næstu sýningu, kvöldið eftir. Ákveðið svekkelsi í ljósi þess hve mikill vinna hefði farið í þetta allt saman. Hópurinn stefnir þó á aðra sýningu þann 30. apríl, þrátt fyrir að Halldóra segi hnéð sitt nú á við fimm. 

„Ég er svo andskoti þrjósk að ég læt þetta ekki stoppa mig.“

Engin sýning án peninganna og Iðnó

Sem fyrr segir hjálpast Halldóra og annar leikari í hópnum að við að fjármagna sýninguna úr eigin vasa.

„Við erum bara áhugamenn um leikhús, vinnum bæði í frístund. Þannig að við erum bara að borga þetta sjálf. Annars væri engin sýning.“ 

Iðnó hefur styrkt hópinn með því að leyfa honum að sýna leiksýninguna endurgjaldslaust.

„Við sóttum alls staðar um styrki og fengum sem betur fer þennan styrk frá Iðnó og fáum að vera þar. Án þeirra hefðum við ekki möguleika á að setja þetta upp,“ segir Halldóra.

Sýningin er flutt á ensku, hvers vegna? 

„Ef við horfum á íslenska leiksamfélagið er rosalega lítið sýnt á ensku. Það eru margir sem búa hérna og tala ekki málið eða skilja ekki nógu mikið til að fara í hefðbundið leikhús. Við reynum að velja öðruvísi leikverk, eitthvað sem brennum fyrir, og ákváðum að sýna á ensku,“ segir Halldóra.