Bílskúrinn: Keisarinn í Kína

Nico Rosberg vann sjöttu keppnina í röð í Formúlu 1 kappakstrinum í Kína. Rosber var sannkallaður keisar í Kína. Hann var einn og yfirgefinn í forystunni alla keppnina.

Hvað kom fyrir Lewis Hamilton, verður Ferrari alltaf á eftir Mercedes? Getur einhver ógnað Rosberg? Allt þetta og fleiri í Bílskúrnum, uppgjöri hvers kappaksturs hér á Vísi.

Daniil Kvyat gegn Sebastian Vettel

Orðaskipti Kvyat og Vettel eftir kappaksturinn hafa vakið mikla athygli. Vettel vildi meina að Kvyat hefði gengið allt of hart fram í framúrakstri sínum fram úr Vettel og Kimi Raikkonen.

Ekkert sem sést á myndbandi af atvikinu virðist þó styðja þá skoðun Vettel.

Sjá einnig: Myndband-Vettel hellti sér yfir Kvyat í Kína

Vettel keyrði á liðsfélaga sinn, Raikkonen í kjölfar þess að Kvyat smeygði sér fram úr. Líklega var Vettel að væla yfir hegðun Kvyat til að afsaka sjálfan sig, en hann ók á liðsfélaga sinn og það er kappakstur 101, ekki keyra á liðsfélaga þinn.

Hugsanlega brá Vettel að sjá Kvyat koma á siglingu en Kvyat keyrði ekki á neinn og endaði á verðlaunapallinum.

Kvyat sagði eftir keppnina: „Þetta er kappakstur, ég sá bilið og ákvað að grípa tækifærið. Það mega allir búast við að ég taki svona áhættu aftur í framtíðinni.“ Ískaldur töffaraskapur í orðaskaki við fjórfalda heimsmeistarann Vettel.

Vettel hefur svo sagt að um kappakstursatvik hafi verið að ræða. Hann hefur greinilega kælt sig aðeins niður og skoðað myndband af atvikinu.

Undirritaður vill hrósa Kvyat fyrir það hvernig hann ók og að hann hafði kjark til að nýta tækifærið.

Harmsaga Hamilton

Heimsmeistarinn, Lewis Hamitlon, liðsfélagi Nico Rosberg hjá Mercedes átti ekki góða helgi í Kína. Ófarir Hamilton hófust áður en bíllinn fór út á brautina.

Eftir síðustu keppni gerði Mercedes athugun á gírkassanum í bíl Hamilton. Þá kom í ljós smávægileg bilun svo liðinu þótti of áhættusamt að hafa gírkassan í bílnum aðra keppni og skipti því um. Fyrir það var ljóst að Hamilton myndi færast aftur um fimm sæti á ráslínu. Maðurinn var búinn að ná tveimur ráspólum á árinu, svo hann var væntanlega að fara að hefja keppni í sjötta eða sjöunda sæti, það var eiginlega bara formsatriði og munurinn lá í því hvort Rosberg ætti góðan dag.

Annað kom þó á daginn þegar tímatakan hófst var fljótlega ljóst að bilun var í bíl Hamilton. Rafkerfið virkaði ekki sem skyldi. Hamilton eyddi því allri fyrstu lotunni inn í bílskúr, án þess að setja tíma og féll því úr leik og myndi ræsa aftastur.

Mörgum hefði nú þótt nóg um ófarir heimsmeistarans. Enn átti þó eftir að bæta í. Hann átti ágætis ræsingu og var því í miðri þvögunni inn í fyrstu beygju. Hann lenti svo í samstuði við Felipe Nasr á Sauber og framvængurinn á bíl Hamilton brotnaði af og lenti svo undir bílnum. Vængurinn olli þar skaða og Hamilton þurfti að fá nýjan og reyna að bjarga því sem bjargað varð.

Hamilton ræsti af stað í 22. sæti en endaði sjöundi, sem miðað við allt er ágætt. Rosberg leiðir nú heimsmeistarakeppni ökumanna með 36 stiga forskot á næsta mann, sem er Hamilton.

Sífelld mistök Ferrari

Ferrari liðið virðist eiga erfitt uppdráttar. Mistök eftir mistök, keppni eftir keppni. Í Ástralíu má ætla að mistök í keppnisáætlun Ferrari hafi kostað liðið pláss í baráttunni um að vinna keppnina.

Bahrein var ekki mikið betri, Vettel komst af stað í upphitunarhring en síðan ekki söguna meir. Kimi Raikkonen liðsfélagi Vettel hjá Ferrari landaði reyndar öðru sæti í keppninni sem er eflaust ljós í myrkrinu.

Í Kína lentu Ferrari mennirnir svo í samstuði í fyrstu beygju, eftir brösótt gengi í tímatökunni þar sem báðir ökumenn gerðust sekir um mistök sem kostuðu þá hellings tíma.

Ferrari liðið hefur hraðann til að veita Mercedes keppni á brautinni í kappakstri. Tímatökurnar virðast í höndum Mercedes þessi misserin. Ferrari þarf hins vegar að eiga nánast mistakalausa helgi til að eiga möguleika á að skáka Mercedes, sem hefur enn smá svigrúm til mistaka.

Verður Rosberg heimsmeistari?

Tölfræðin segir að í þau níu skipti sem ökumaður hefur byrjað tímabil á að vinna þrjár fyrstu keppnirnar, verður sá hinn sami heimsmeistari á því tímabili. Rosberg hefur einmitt unnið þrjár fyrstu keppnirnar og óskar þess væntanlega að hann verði ekki fyrstur til að brjóta regluna.

Rosberg er á miklu flugi en það má ekki gleyma því að enn eru 18 keppnir eftir og það eru 25 stig fyrir sigur í hverri þeirra. Hamilton, Vettel, Raikkonen eða hvern annan sem vill og getur skortir því ekki möguleg stig til að skáka Rosberg. En núna er Rosberg með meðbyr og virðist nánast óstöðvandi. Það er því enn ómögulegt að spá fyrir um hvort Rosberg verði heimsmeistari, það eru nefninlega engin stig gefin fyrir það að vera með söguna með sér í liði.

Ökumaður keppninnar

Daniil Kvyat sýndi það út á hvað Formúla 1 gengur þegar hann straujaði fram úr Ferrari bílunum í fyrstu beygju um helgina. Fyrir það og viðhorf sitt til ásakana Vettel um glæfralegan framúrakstur hefur hann orðið þess heiðurs afnjótandi að verða tilnefndur ökumaður keppninnar, bæði hér í Bílskúrnum og í opinberri skoðannakönnun á samfélagsmiðlum.