Lewis Hamilton vann á heimavelli

Lewis Hamilton á Mercedes tók þjónustuhlé á ögurstundu og tryggði sér 25 stig. Liðsfélagi hans, Nico Rosberg varð annar og Sebastian Vettel á Ferrari tók þjónustuhlé á sama tíma og Hamilton og varð þriðji.

Felipe Massa náði forystunni strax í ræsingunni, mögnuð byrjun hjá Brasilíumanninum, hann ræsti af stað í þriðja sæti. Öryggisbíllinn kom svo út og þegar keppnin fór af stað aftur náði Valtteri Bottas að komast fram úr Hamilton.

„Ekki pressa á liðsfélaga þinn, við ætlum ekki að keppa innbyrðis,“ voru skilaboðin sem Bottas fékk að heyra.

Hann hélt áfram að reyna og fékk á endanum tækifæri. „Það verður að vera hreinn fram úr akstur og þú verður að stinga af þegar þú ert kominn fram úr,“ sagði Pat Symonds, tæknistjóri Williams við Bottas.

Hamilton náði að komast fram úr Massa og Bottas, með því að taka þjónustuhlé á undan Williams mönnunum. Rosberg sat þá í fjórða sæti.

Hefði Williams leyft Bottas að taka fram úr Massa strax hefði Bottas líklega haldið forystunni. Það má að minnsta kosti gera að því skóna.

„Gefðu allt í botn, allt sem bíllinn getur,“ sagði Tony Ross verkfræðingur Rosberg til að hvetja sinn mann áfram.

Rigning gerði vart við sig á hring 36 og þá var bara spurning hver þorði að vera lengst á sléttum dekkjum. Stórir hlutar brautarinnar voru þurrir.

Kimi Raikkonen var fyrstur af fremstu mönnum til að skipta á milli regndekk. Rosberg komst fram úr Bottas þegar Finninn skrikaði í miðri beygju og missti hraða. Rosberg tók svo fram úr Massa skömmu seinna.

Áhættan sem Raikkonen tók virkaði ekki. Hann var á röngum dekkjum og tapaði mörgum sætum.

Rosberg vann upp rúmlega átta sekúndna bil og um leið og Hamilton sá Rosberg kom breski ökumaðurinn inn og skipti á milli regndekk.

Rigningin jókst aftur og Hamilton leit vel út á milli regndekkjunum. Rosberg tók svo þjónustuhlé og tapaði forystunni aftur.

Williams þurfti að taka báða bíla sína inn í einu og á meðan sigldi Vettel fram úr á Ferrari bílnum. Ótrúlegir lokahringir á spennandi keppni.

Hér fyrir neðan má sjá gagnvirkt brautarkort með öllum helstu upplýsingum.