Erlendar

Liverpool valtaði yfir Fulham

Liverpool burstaði Fulham 5-1 í leik kvöldsins í ensku úrvalsdeildinni í kvöld. Robbie Fowler, Peter Crouch, Fernando Morientes og Steven Warnock skoruðu mörk Liverpool, en einn marka liðsins var sjálfsmark Michael Brown. Collins John skoraði mark Fulham, sem enn hefur ekki unnið leik á útivelli í ensku úrvalsdeildinni.

Sport 15.3.2006 21:55

Jafnt í hálfleik hjá Roma og Middlesbrough

Middlesbrough stendur vel að vígi í einvíginu við Roma á Ítalíu í Evrópukeppni félagsliða, en staðan í síðari leik liðanna er 1-1 í hálfleik. Hasselbaink kom Boro yfir á 32. mínútu, en Mancini jafnaði fyrir heimamenn. Rómverjar þurfa því að skora að minnsta kosti tvö mörk í þeim síðari til að komast áfram í keppninni.

Sport 15.3.2006 21:01

Fowler opnar markareikninginn

Robbie Fowler er loksins búinn að opna markareikning sinn að nýju hjá liði Liverpool, en hann skoraði fyrsta mark liðsins í leiknum gegn Fulham sem nú stendur yfir á Anfield. Staðan í hálfleik er 2-1 fyrir Liverpool, en eftir að Collins John jafnaði metin fyrir gestina, varð Michael Brown fyrir því óláni að skora sjálfmark og koma Liverpool yfir á ný.

Sport 15.3.2006 20:55

Jafnt í hálfleik á Upton Park

Staðan í leik West Ham og Bolton í enska bikarnum er jöfn 1-1 í hálfleik, en þetta er síðari leikur liðanna í 16-liða úrslitum keppninnar. Markvörðurinn Jussi Jaaskelainen kom West Ham yfir á 10. mínútu með sjálfsmarki, en Kevin Davies jafnaði metin fyrir gestina á 31. mínútu. Leikurinn er sýndur í beinni útsendingu á Sýn.

Sport 15.3.2006 20:47

Benitez búinn að framlengja?

Spænska heldur því fram í dag að Rafa Benitez stjóri Liverpool sé búinn að undirrita eins árs framlengingu á núgildandi samningi sínum við félagið og verði því við stjórnvölinn í Bítlaborginni til ársins 2010. Benitez hefur verið orðaður nokkuð við lið í heimalandi sínu að undanförnu, en lítill fótur hefur verið fyrir þeim sögusögnum.

Sport 15.3.2006 19:32

Woods finnur sig vel á heimavellinum

Tiger Woods ætlar sér stóra hluti á hinu árlega Bay Hill Invitational móti í golfi sem fram fer um helgina. Woods hefur þegar unnið sigur á þremur mótum það sem af er þessu ári og hefur alls fjórum sinnum unnið sigur á Bay Hill mótinu. Það er líka skiljanlegt að Woods finni sig vel á vellinum, því hann býr aðeins í tíu mínútna fjarlægð frá mótsstaðnum.

Sport 15.3.2006 18:48

Lögregla biður stuðningsmenn að róa sig

Löglregluyfirvöld í Róm hafa biðlað til stuðningsmanna Roma og Middlesbrough að sýna stillingu í kvöld þegar liðin mætast í Evrópukeppni félagsliða, en fyrr í dag slösuðust þrettán enskir stuðningsmenn í árás öfgasinnaðra stuðningsmanna sem kenna sig við lið Roma. Þrír stuðningsmenn voru stungnir og liggja á sjúkrahúsi.

Sport 15.3.2006 18:35

Spilar ekki meira í vetur

Framherjinn Emeka Okafor hjá Charlotte Bobcats sem kjörinn var nýliði ársins í NBA deildinni á síðasta ári, mun ekki leika meira með liðinu í vetur eftir að í ljós kom að ökklameiðslin sem hafa haldið honum frá keppni síðan í desember voru nokkuð alvarlegri en haldið var í fyrstu.

Sport 15.3.2006 17:04

West Ham leitar hefnda

Leikmenn West Ham hyggja á hefndir í kvöld þegar liðið mætir Bolton í fimmta sinn á leiktíðinni í síðari leik liðanna í enska bikarnum. Fyrri leikur liðanna á Reebok var markalaus, en Bolton hafði betur 4-1 þegar liðin mættust á sama stað í deildinni um síðustu helgi.

Sport 15.3.2006 16:40

Skömmumst okkar fyrir árangurinn á útivöllum

Chris Coleman er afar óhress með árangur sinna manna á útivelli á leiktíðinni og þykir kominn tími til að hans menn sýni hvað í þeim býr á Anfield í kvöld þegar liðið mætir Liverpool í ensku úrvalsdeildinni. Fulham hefur tapað fimm af síðustu sjö leikjum sínum í deildinni.

Sport 15.3.2006 16:21

Smertin snýr aftur til Rússlands

Rússneski miðjumaðurinn Alexei Smertin hjá Chelsea er á leið aftur til heimalands síns þar sem hann mun leika með Dynamo Moskvu. Liðið gekk í dag frá kaupum á leikmanninum fyrir um eina milljón punda, en hann hefur spilað sem lánsmaður hjá Charlton í vetur. Chelsea keypti Smertin fyrir 3,45 milljónir punda frá Bordeux árið 2003, en hann náði aldrei að festa sig í sessi hjá liðinu.

Sport 15.3.2006 16:09

West Ham - Bolton í beinni

Leikur West Ham og Bolton í fimmtu umferð ensku bikarkeppninnar verður í beinni útsendingu á Sýn í kvöld og hefst útsending klukkan 19:50. Sigurvegarinn í leik kvöldsins mætir Manchester City í 8-liða úrslitum keppninnar, en City sló Aston Villa úr keppninni í gærkvöldi. Þá er einn leikur á dagskrá í ensku úrvalsdeildinni, Liverpool tekur á móti Heiðari Helgusyni og félögum í Fulham.

Sport 15.3.2006 15:27

Getum ekki keppt við Chelsea

Uli Hoeness hefur viðurkennt að þýsku meistararnir Bayern Munchen eigi ekki möguleika á að keppa við Chelsea um Michael Ballack, en talið er víst að Ballack gangi í raðir Chelsea á næstu misserum.

Sport 15.3.2006 14:36

Keane íhugar að hætta í sumar

Miðjumaðurinn Roy Keane hefur viðurkennt að hann sé að íhuga að leggja skóna á hilluna í sumar, en hann er sem kunnugt er samningsbundinn Glasgow Celtic út næsta tímabil. Keane á við erfið mjaðmarmeiðsli að stríða og segist muni íhuga málið vandlega í sumar.

Sport 15.3.2006 14:30

Englendingar stungnir í átökum í Róm

Þrír stuðningsmenn enska liðsins Middlesbrough vor stungnir í gær og fleiri eru á sjúkrahúsi eftir að fótboltabullur sem kalla sig "Ultras" og kenna sig við lið Roma í höfuðborginni, réðust að fólkinu þar sem það sat við drykkju í gærkvöld. Ensku áhorfendurnir munu hafa verið hið prúðasta fólk og var margt þeirra með börn sín meðferðis. Roma og Middlesbrough mætast í Evrópukeppninni í kvöld.

Sport 15.3.2006 14:17

Miami valtaði yfir Utah

Lið Miami vann í nótt sinn 13. leik af síðustu 14. þegar liðið gjörsamlega valtaði yfir Utah Jazz á heimavelli sínum 121-83. Dwayne Wade skoraði 25 stig á 29 mínútum fyrir Miami, sem fór langt með að vinna leikinn með því að vinna fyrsta leikhlutann 41-14, en Utah sá aldrei til sólar eftir það. Matt Harpring skoraði 20 stig fyrir gestina.

Sport 15.3.2006 13:43

Memphis - Boston í beinni

Leikur Memphis Grizzlies og Boston Celtics verður sjónvarpsleikurinn á NBA TV á Digital Ísland í kvöld og hefst hann klukkan eitt eftir miðnætti. Boston hefur verið á ágætis spretti undir stjórn Paul Pierce undanfarið og er ekki langt undan sæti í úrslitakeppninni, en Memphis hefur hinsvegar tapað þremur af síðustu fjórum leikjum sínum.

Sport 14.3.2006 22:02

Manchester City í fjórðungsúrslitin

Stuart Pearce hélt upp á nýjan samning sinn við Manchester City með sigri í kvöld þegar hans menn slógu Aston Villa út úr enska bikarnum með 2-1 sigri á heimavelli sínum. Þetta var síðari leikur liðanna eftir að jafnt var í fyrri leiknum á Villa Park.

Sport 14.3.2006 21:37

Inter mætir Villareal

Ítalska liðið Inter Milan er komið áfram í 8-liða úrslit Meistaradeildar Evrópu eftir 1-0 sigur á Ajax Amsterdam á heimavelli sínum í kvöld og fer liðið því áfram samanlagt 3-2. Inter var betri aðilinn allan tímann og var í raun aldrei spurning hvort liðið færi áfram í keppninni.

Sport 14.3.2006 21:31

Pearce skrifar undir tveggja ára samning

Stuart Pearce, stjóri Manchester City, hefur nú loksins undirritað formlegan samning við félagið sem gildir til tveggja ára. Pearce hefur stýrt liðinu án formlegs samnings síðan Kevin Keegan hætti með liðiði í fyrra. Pearce segist ekki vera mikið fyrir pappíra, en hefur nú loksins skrifað formlega undir hjá City.

Sport 14.3.2006 21:14

Manchester City komið í 2-0

Manchester City er í komið í 2-0 gegn Aston Villa á heimavelli sínum í síðari leik liðanna í fimmtu umferð enska bikarsins. Samaras kom City yfir á 14. mínútu og Vassell skoraði svo annað mark liðsins á 3. mínútu síðari hálfleiksins.

Sport 14.3.2006 21:05

Inter í vænlegri stöðu

Inter Milan er komið með annan fótinn í 8-liða úrslit Meistaradeildar Evrópu, eftir að Dejan Stankovic kom liðinu í 1-0 gegn Ajax á 57. mínútu. Leikurinn fer fram á San Siro í Mílanó, en Brasilíumaðurinn Adriano brenndi af vítaspyrnu í fyrri hálfleiknum. Hollendingarnir þurfa nú að skora tvö mörk til að eiga möguleika á að komast áfram í keppninni.

Sport 14.3.2006 21:01

Ósáttur við leikbann Alonso

Rafa Benitez er saltvondur út í reglugerð enska knattspyrnusambandsins um að ekki sé hægt að áfrýja rauðum spjöldum sem leikmenn fá eftir að hafa fengið tvö gul spjöld, líkt og um helgina þegar Xabi Alonso var sendur af velli gegn Arsenal. Það þótti Benitez afar blóðugur dómur og telur atvikið styðja frekar hugmyndina um að dómarar notist við myndbandsupptökur til að skera úr um mál sem þetta.

Sport 14.3.2006 19:16

Starf Steve Bruce aldrei í minni hættu

Stjórnarformaður Birmingham, Billy Gold, segir að hann muni ekki stökkva frá borði þó félagið falli í fyrstu deildina í vor og segir að starf knattspyrnustjórans Steve Bruce sé alls ekki í hættu - þvert á móti hafi Bruce aldrei verið öruggari í starfi en einmitt nú.

Sport 14.3.2006 17:35

Manchester City - Aston Villa í beinni

Síðari viðureign Manchester City og Aston Villa í enska bikarnum verður í beinni útsendingu á Sýn Extra klukkan 19:40 í kvöld. Fyrri leik liðanna á Villa Park lauk með jafntefli 1-1 og því verður leikið til þrautar í Manchester í kvöld. Sigurvegarinn mætir svo annað hvort Bolton eða West Ham í fjórðungsúrslitunum þann 20.mars.

Sport 14.3.2006 18:46

Besta byrjun þjálfara í sögu NBA

Dallas Mavericks tekur á móti Cleveland Cavaliers í NBA deildinni í nótt og burtséð frá því hvernig leikurinn fer, er Avery Johnson þjálfari Dallas búinn að skrá nafn sitt á spjöld sögunnar. Johnson hefur náð bestum árangri allra þjálfara í sögu deildarinnar í fyrstu 82 leikjum sínum sem aðalþjálfari.

Sport 14.3.2006 16:55

Button vill fá bílinn í lag

Ökuþórinn Jenson Button hjá Honda í Formúlu 1, heimtar að liðið komi bíl sínum í keppnishæft ástand fyrir næstu keppni sem er í Malasíu um helgina, en bilun varð til þess að hann varð af sæti á verðlaunapalli um síðustu helgi í Barein.

Sport 14.3.2006 17:20

Ég dáist að Jurgen Klinsmann

Jose Mourinho, stjóri Chelsea, segist vera mikill aðdáandi hins umdeilda landsliðsþjálfara Þjóðverja, Jurgen Klinsmann og í viðtali við þýska blaðið Bild, sagði Portúgalinn að Klinsmann væri hugaður maður sem væri óhræddur við að tefla fram ungum leikmönnum.

Sport 14.3.2006 15:50

Iverson missir úr fjóra leiki

Skorunarmaskínan Allen Iverson hjá Philadelphia 76ers mun líklega missa úr að minnsta kosti fjóra leiki með liði sínu eftir að hann sneri sig illa á ökkla í síðasta leik liðsins. Iverson er annar stigahæsti leikmaður deildarinnar með 33,2 stig að meðaltali í leik. Hann spilar flestar mínútur allra í deildinni að meðaltali, er í fimmta sæti í stolnum boltum og áttunda sæti í stoðsendingum.

Sport 14.3.2006 17:09

Vill taka við enska landsliðinu

Alan Curbishley ætlar ekki að láta fjaðrafokið í enskum fjölmiðlum í kjölfar fundar hans við forráðamenn enska knattspyrnusambandsins í vikunni hafa áhrif á sig og segist enn hafa mikinn áhuga á að taka við enska landsliðinu.

Sport 14.3.2006 16:34