Albert og fé­lagar í undanúr­slit

Ítalska félagið Fiorentina er komið í undanúrslit Sambandsdeildar Evrópu eftir 2-2 jafntefli gegn Celje frá Slóveníu.

Albert Guðmundsson var í byrjunarliði Fiorentina sem komst yfir í fyrri hálfleik þökk sé marki Rolando Mandragora á 37. mínútu.Eftir 2-1 sigur í fyrri leiknum var Fiorentina því í toppmálum. Í síðari hálfleik sneri Celje leiknum sér í vil með tveimur mörkum á rúmum tíu mínútna kafla.

Aðeins tveimur mínútum eftir að Celje komst 2-1 yfir jafnaði ítalski framherjinn Moise Kean metin eftir sendingu Mandragora. Staðan því orðin 2-2 og reyndust það lokatölur leiksins. Albert var tekinn af velli þegar venjulegum leiktíma lauk.

Í undanúrslitum mætir Fiorentina spænska félaginu Real Betis eftir að Betis lagði Jagiellonia samanlagt 3-1.