Erlent

„Kokkurinn“ í Bandidos látinn

Jón Þór Stefánsson skrifar
Michael Rosenvold var forseti Bandidos í Evrópu.
Michael Rosenvold var forseti Bandidos í Evrópu. Getty

Michael Rosenvold, forseti mótorhjólagengisins Bandidos í Evrópu, er látinn 57 ára að aldri. Rosenvold var danskur, og gekk undir nafninu „kokkurinn“.

Ekstra bladet greinir frá andláti „kokksins“ en það kom í ljós þegar réttarhöld á hendur mótorhjólagenginu, sem snúast um að fá þau bönnuð í Danmörku, áttu að halda áfram í morgun. Saksóknari greindi dómnum frá andlátinu.

Saksóknararnir vilja meina að Bandidos séu hættuleg og ofbeldisfull samtök, sem eigi því að verða leyst upp. Meðlimir Bandidos aftur á móti halda því fram að um félagsskap sé að ræða sem hafi áhuga á mótorhjólum.

Frá því í desember síðastliðnum hefur verið lagt tímabundið bann á starfsemi samtakanna í Danmörku. Tíu meðlimir gengisins eru í haldi þessa stundina grunaðir um að funda þrátt fyrir þetta bann.

Rosenvold, sem er forsvarsmaður Bandidos í Danmörku, var ekki einn þessara tíu, en fyrirhugað var að hann myndi gefa skýrslu fyrir dómnum í dag. Dómarinn frestaði þinghaldinu vegna fregnanna.

Samkvæmt DR tileinkaði Rosenvold stórum hluta lífs síns til Bandidos. Hann kom að stofnun gengisins í Danmörku á tíunda áratugnum. Áður hafði hann verið meðlimur annars mótorhjólagengis, sem hét Undertakers, en árið 1993 sameinaðist sá hópur Bandidos.

„Fyrst var ég ritari klúbbsins hérna í Danmörku, svo varaforseti og svo forsetinn yfir allri Evrópu,“ sagði Rosenvold við réttarhöldin í febrúar síðastliðnum.




Fleiri fréttir

Sjá meira


×