Innlent

„Allt að því hroki eða yfir­læti“ að tala um reynslu­leysi

Árni Sæberg skrifar
Frá blaðamannafundi formanna ríkisstjórnarflokkanna í dag.
Frá blaðamannafundi formanna ríkisstjórnarflokkanna í dag. Vísir/Anton Brink

Formenn ríkisstjórnarflokkanna þriggja gefa lítið fyrir tal um ætlað reynsluleysi Flokks fólksins og áhrif þess á stjórnarsambandið. Formaður Viðreisnar segir slíkt tal merki um hroka og yfirlæti og bendir á að Viðreisn og Flokkur fólksins hafi boðið fram fyrst sama árið.

Þetta var meðal þess sem kom fram á blaðamannafundi þeirra Kristrúnar Frostadóttur forsætisráðherra, Þorgerðar Katrínar Gunnarsdóttur utanríkisráðherra og Ingu Sæland, félags- og húsnæðismálaráðherra í dag. Þær blésu til fundar í tilefni af því að eitt hundrað dagar eru liðnir frá því að ríkisstjórn Kristrúnar tók til starfa. 

Þá fjölluðu þær einnig um fjármálaáætlun ríkisstjórnarinnar til ársins 2030, sem kynnt var í morgun.

Að loknum ávörpum sínum biðu valkyrjurnar svokölluðu viðstöddum að bera upp spurningar. Berghildur Erla Bernharðsdóttir fréttamaður nýtti tækifærið og spurði út í nokkur atvik sem komið hafa upp í tengslum við Flokk fólksins á þessum hundrað dögum. Þá helst hvort að reynsluleysi flokksins hefði haft áhrif þar á.

„Nei“

„Ef ég má byrja þá myndi ég segja það að nei, reynsluleysi er ekki að gera neitt sem hefur áhrif á okkar frábæra samstarf. Þvert á móti hefur sú ágjöf sem þú nefnir, sem tengist Flokki fólksins, hún hefur einfaldlega bara þjappað okkur enn betur saman og við höldum bara áfram okkar góðu verkum. Við höfum hins vegar ætlað okkur í dag að ræða um hundrað daga afmæli ríkisstjórnarinnar og erum ekki að horfa í baksýnisspegilinn. Við segjum áfram veginn,“ sagði Inga.

Ríkisstjórnin ætli að láta verkin tala og í herbúðum hennar ríki bjartsýni og bros. Ríkisstjórnin taki allri ágjöf sem svo að hún styrki hana. 

„En reynsluleysið sem slíkt, við höfum aldrei verið í ríkisstjórn áður. Við lærum af þeim mistök sem við gerum. Ég segi það fyrir okkar hönd í Flokki fólksins, við erum náttúrulega einstaklega frábær og í alveg frábærri ríkisstjórn.“

Engin áætlun án Flokks fólksins

Kristrún tók þá við og sagði að sú fjármálaáætlun sem lögð var fram í dag hefði ekki verið lögð fram án Flokks fólksins, það væri alveg á hreinu.

„Margar af stórum ákvörðunum sem hér er verið að taka er vegna þess að þessi ríkisstjórn er samsett eins og hún er í dag. Það er það sem situr eftir og fólk er samstillt í pólistískum skilaboðum. Koma upp mál út af alls konar þáttum sem eru alls ótengd pólitíkinni? Já. Þar maður að eiga við þau? Já. Er það stundum erfitt? Já. En við fórum í þetta til að vinna í pólitík, þetta er afrakstur þess. Ég er þakklát fyrir að vera í ríkisstjórn með Flokki fólksins.“

Hroki og yfirlæti

Loks tók Þorgerður Katrín við keflinu og sagðist taka heils hugar undir með Kristrúnu.

„Reynsluleysi, ég veit ekki hvort það sé, fyrirgefðu, allt að því hroki eða yfirlæti. Af því að Flokkur fólksins var stofnaður sama ár og Viðreisn, 2016. Hefur alveg jafnmikla reynslu á þingi og við í Viðreisn. Komum við frá ólíkum hópum í samfélaginu? Já, við gerum það. En fyrir vikið höfum við náð að efla samstarf okkar þannig að það er bæði gagnkvæmur skilningur og það er hreinskiptni. Fyrir vikið þá dýpkar samstarfið og verður betra að mínu mati.


Tengdar fréttir

Hneykslaðist á „óút­færðum af­komu­bætandi að­gerðum“

Fjármála- og efnahagsráðherra ætlar að hagræða um ríflega hundrað milljarða hjá hinu opinbera á næstu árum. Hann segir slíkar aðgerðir skila hallalausum ríkissjóði fyrr en áður hafði verið áætlað.  Þá á að sækja auknar tekjur í veiðigjald, aðgangstýringargjald og bifreiðagjald. 

Spyr um ábyrgð skólastjóra í stóra skómálinu

Formaður Flokks fólksins segir Ásthildi Lóu Þórsdóttur einfaldlega hafa sagt af sér til að koma í veg fyrir að ráðist yrði á sig og ríkisstjórnina í fjölmiðlum. Barnabarn hennar sem glataði skóm tímabundið í Borgarholtsskóla hafi ekki sótt skólann síðan fjallað var um símtal hennar við skólastjórann. Inga spyr um ábyrgð hans.

Hallarekstur stöðvaður á næstu tveimur árum

Samkvæmt nýrri fjármálaáætlun fyrir árin 2026 til 2030 verður ríkissjóður hallalaus strax árið 2027 og hið opinbera hallalaust árið 2028. Hvoru tveggja er ári fyrr en fyrri áætlun gerði ráð fyrir.

Trúverðug­leiki for­sætis­ráðherra sé í húfi

Þingflokksformaður Sjálfstæðisflokksins segir fyrrum formann Samfylkingarinnar vera snúa út úr málflutningi stjórnarandstöðunnar í máli fyrrverandi mennta- og barnamálaráðherra. Ýmislegt sé óskýrt varðandi aðkomu forsætisráðuneytisins í málinu. Hún sakar forsætisráðherra um að hafa farið með rangt mál í pontu Alþingis.

Skrautlegir fyrstu mánuðir hjá Flokki fólksins

Mikið hefur gustað um Flokk fólksins á fyrstu þremur mánuðum ríkisstjórnar Kristrúnar Frostadóttur. Aðeins vika er síðan fráfarandi mennta- og barnamálaráðherra baðst afsökunar á ummælum um íslenska dómstóla.




Fleiri fréttir

Sjá meira


×