„Þetta var bara brjálað!“

Stórleikkonan Jodie Foster fer með aðalhlutverkið í fjórðu seríu þáttanna ásamt Kali Reis og meðal Íslendinga sem fara með hlutverk í þáttunum eru Þráinn Sigvaldason, Jónmundur Grétarsson, Davíð Þór Katrínarson, Þorsteinn Bachmann og Aron Már Ólafsson.

„Ég leik algjöran óþokka í þáttunum sem heitir Ace og býr í smábænum Ennis í Kanada en sá bær er sögusvið þáttanna,“ segir Aron Már. „Mér bregður fyrir í þremur senum en þær voru teknar upp á Dalvík, í Hafnarfirði og fyrir utan Mosfellsbæ. Þótt þetta sé aukahlutverk var verkefnið mjög skemmtilegt enda lang stærsta verkefni sem ég hef hingað til tekið þátt í.“

Sögusviðið er sem fyrr segir smábærinn Ennis og er harðgerð vetrartíð skollin á. Átta menn hafa horfið sporlaust frá Tsalal Arctic rannsóknarstöðinni og lögreglukonurnar Liz Danvers (Jodie Foster) og Evangeline Navarro (Kali Reis) sjá um rannsókn málsins. Þær þurfa að grafa upp óhugnaðinn sem leynist undir yfirborði víðfeðms íssins og ásamt því að horfast í augu við myrkrið innra með sér.

Tökur fóru að miklu leyti fram hér á Íslandi, meðal annars í Reykjanesbæ, á Dalvík og í Reykjavík.

Aron segir tökur og raunar verkefnið í heild sinni hafa verið mikla upplifun. „Þetta var bara brjálað! Maður sér það helst á þessum litlu hlutum. Ég var til dæmis sóttur á Teslu alla daga og var með einkabílstjóra sem sá algjörlega um mig þann daginn, sama hvort ég var að kíkja til leiklistarþjálfara eða á slagsmálaæfingu.“

Það var því mikið umstang fyrir þetta litla hlutverk. „Ef þetta væri íslenskt verkefni hefði ég bara lært línurnar mínar og mætt slakur á tökustað. Fyrir senurnar mínar var til dæmis kallað á breskan áhættuleikara sem sást kannski bregða fyrir eina sekúndu. Hann var áður með sítt ár en það þurfti auðvitað að senda hann í klippingu svo hann líktist mér meira. Þannig að það var mikið lagt í þessa kannski einu sekúndu á skjánum.“

Aron fór í prufu eins og aðrir leikarar en upphaflega átti hann að leika lítið hlutverk hermanns. „Ég sagði auðvitað strax já enda risavaxið og spennandi verkefni þótt hlutverk hermannsins væri agnarsmátt.“

Aron þurfti að senda inn myndband af sér eins og aðrir leikarar auk helstu upplýsinga um sjálfan sig. „Í kjölfarið fékk ég fyrirspurn um hvort ég hefði áhuga á að koma í prufu fyrir karakter í þáttunum sem ég tók auðvitað fagnandi og þar með breyttist hlutverk mitt úr hermanni í bakgrunni í aukahlutverk í seríunni. Oft fá svona lítil hlutverk ekki nafn í kreditlistanum en ég fékk nafnið Ace þannig að þetta var bara geggjað.“

Aron var aldrei á tökustað með Jodie Foster en lék á móti Kali Reis sem er í einu aðalhlutverki seríunnar. „Hún er fyrrverandi heimsmeistari í boxi í sínum þyngdarflokki og efnileg leikkona sem lék m.a. í kvikmyndinni Black Flies með Sean Penn sem kom út á síðasta ári. Hjólhýsið mitt á tökustað var samt fyrir framan hjólhýsi Jodie Foster og stundum sá ég að það var opið inn til hennar. Ég reyndi í nokkur skipti að fylgjast með hurðinni svo ég gæti jafnvel rekist „óvart“ á hana og tekið stutt spjall en það tókst því miður ekki.“

Eins og aðrir landsmenn er Aron spenntur fyrir því að berja seríuna augum á Stöð 2. „Ég er búinn að sjá fyrsta þáttinn í línulegri dagskrá ásamt konunni og líst mjög vel á. Sjálfur þekki ég ekki söguþráðinn ítarlega og enn síður plottið og er því bara mjög spenntur eins og næsti maður. Mér brá aðeins fyrir í þessum fyrsta þætti og svo kem ég aftur fyrir í fjórða þætti held ég.“

Aron er með ýmis járn í eldinum en getur lítið tjáð sig um næstu verkefni að svo stöddu. „Ég vil þó minna landsmenn á hlaðvarpið Ólafssynir í Undralandi sem ég held úti með vini mínum Arnari. Það nýtur sívaxandi vinsælda en við settum það á fót fyrir tveimur árum síðan.“