Falskir kjör­menn og lygar kjarninn í málinu gegn Trump

Fani Willis, umdæmissaksóknari í Fulton-sýslu gaf út ákæru á hendur Trump og átján öðrum fyrir ólöglega tilraun til þess að snúa við úrslitum forsetakosninganna í ríkinu í gærkvöldi. Ákærudómstóll samþykkti alla ákæruliðina sem Willis lagði fram, alls 41 talsins.

Engin nítjánmenninganna er ákærður fyrir öll brotin sem er lýst í ákærunni. Hún byggir á svonefndum RICO-lögum sem voru upphaflega sett til þess að ná utan um skipulagða glæpastarfsemi Mafíunnar en hafa í seinni tíð verið notuð til þess að sækja fólk til saka fyrir pólitíska spillingu og fjárglæpi. 

Trump og félögum er þannig gefið að sök að hafa á hver á sinn hátt brotið af sér í þágu sama glæpsamlega ætlunarverksins, að snúa úrslitum kosninganna við.

Ákæran skarast að ýmsu leyti við þá sem Jack Smith, sérstakur rannsakandi dómsmálráðuneytisins, lagði fram á hendur Trump fyrir tveimur vikum. Hún er þó töluvert umfangsmeiri en alríkisákæra Smith sem hefur aðeins ákært Trump fyrir tilraunir til þess að snúa úrslitum kosninganna við með ólöglegum hætti enn sem komið er.

Þóttust vera réttkjörnir kjörmenn ríkisins

Trump, sem hélt því ranglega fram að stórfelld kosningasvik hefðu kostað hann sigur í Georgíu og víðar, er ákærður í þrettán liðum. Auk þátttöku í ólöglegu samsæri sem allir sakborningarnir eru ákærðir fyrir er fyrrverandi forsetinn ákærður fyrir að reyna að fá opinbera embættismenn til þess að rjúfa embættiseið sinn, samsæri um skjalafals og að fá fólk til að látast vera opinberir embættismenn og lygar.

Samsærið um skjalafals og að láta fólk látast vera embættismenn tengjast tilraunum Trump og nokkurra helstu ráðgjafa hans um að fá hóp repúblikana í Georgíu til þess að staðfesta ranglega að þeir væru réttkjörnir kjörmenn ríkisins og senda Bandaríkjaþingi skjöl þess efnis þrátt fyrir að kjörmennirnir ættu með réttu að tilheyra Joe Biden.

Repúblikanar í fleiri ríkjum sem Trump tapaði tefldu fram listum með fölskum kjörmönnum af þessu tagi. Fyrir þeim vakti að gefa Mike Pence, varaforseta, átyllu til þess að fresta því að staðfesta kosningaúrslitin eða jafnvel telja fölsku kjörmennina þegar Bandaríkjaþing kom saman 6. janúar. Pence neitaði hins vegar að taka þátt í því samsæri.

Trump hringdi einnig persónulega í æðstu kjörnu fulltrúa Georgíu sem báru ábyrgð á framkvæmd kosninganna og þrýsti á þá að hjálpa sér að ógilda þúsundir atkvæða á grundvelli falskra ásakana hans um að þau væru ólögleg. Rannsókn saksóknarar hófst eftir símtal Trump til Brads Raffensperg, þáverandi innanríkisráðherra Georgíu, þar sem forsetinn bað hann um að „finna“ fyrir sig nógu mörg atkvæði til þess að færa sér sigurinn.

Mark Meadows, skrifstofustjóri Hvíta hússins, er ákærður fyrir aðild að því að þrýsta á embættismennina í Georgíu þar sem hann skipulagði og hlýddi á nokkur samtala forsetans við þá.

Sögðu þingmönnum að þeir gætu ákveðið úrslit kosninganna

Rudy Giuliani, persónulegur lögmaður Trump, og tveir aðrir lögmenn eru ákærðir fyrir að ljúga því að ríkisþingi Georgíu í desember eftir kosningarnar að þingmenn þar hefðu heimild til þess að hunsa úrslit forsetakosninganna í ljósi falskra ásakana þeirra um kosningasvik og styðja formlega falska kjörmenn Trump.

Hópur stuðningsmanna Trump er ákærður fyrir að skipuleggja fund þar sem hópur repúblikana lýsti því yfir að viðstaddir væru kjörmenn Georgíu og að senda Bandaríkjaþingi fölsuð skjöl um að þeir væru lögmætir. Á meðal þeirra voru nokkrir helstu leiðtogar Repúblikanaflokksins í ríkinu.

Nokkrir eru aðeins ákærðir fyrir sinn þátt í að áreita og ógna konu sem starfaði við kjörstjórn í Fulton-sýslu. Trump sjálfur lýsti konunni og dóttur hennar persónulega sem „atvinnukosningasvindlara“ á sama tíma og bandamenn hans sökuðu þær ranglega um kosningasvik. 

Mæðgurnar máttu þola líflátshótanir um margra mánaða skeið eftir kosningarnar. Þær stefndu Giuliani og fleirum fyrir meiðyrði. Hann ætlar sér ekki að þræta fyrir það fyrir dómi að fullyrðingar hans um þær hafi verið stoðlausar.

Reyndu að stela kosningabúnaði

Bandarískir fjölmiðlar höfðu þegar greint frá mörgum þeim atburðum sem lýst er í ákærunni á undanförnum mánuðum og árum sem liðin eru frá kosningunum. Liður ákærunnar um að hluti af teymi Trump hafi lagt á ráðin um að stela kosningabúnaði vekur hins vegar athygli.

Sydney Powell, lögmaður sem var óþreytandi í ásökunum sínum um að stórfelld kosningasvik hefðu kostað Trump sigurinn, og fleiri eru þannig ákærð fyrir að eiga við kosningavélar í Coffee-sýslu og að stela gögnum sem tilheyra Dominion Voting Systems, framleiðanda vélanna. Powell og fleiri bandamenn Trump settu fram framandlegar samsæriskenningar um hægt væri að nota vélarnar til þess að breyta atkvæðum.

Lögmaðurinn og fleiri stuðningsmenn Trump eru sakaðir um að afrita kjörgögn og hugbúnað úr kosningavélunum ólöglega.

Forseti getur ekki náðað

Ólíkt ákæru Smith, sérstaka rannsakandans, verður málið gegn Trump og félögum í Georgíu rekið fyrir ríkisdómstól. Verði hann eða aðrir sakfelldir getur Trump því ekki náðað sjálfan sig eða mildað dóma. Það getur forseti aðeins gert í alríkismálum. Lögmenn Trump eru sagðir ætla að reyna að fá málið fært til alríkisdómstóls.

Trump og félagar hafa til 25. ágúst til þess að gefa sig fram sjálfviljugir. Þeir eiga að öðrum kosti yfir sér handtöku.

Þrátt fyrir að hátt í þrjú ár séu nú liðin frá kosningunum heldur Trump því enn ranglega fram að svindlað hafi verið á honum í þeim. Eftir að ákærurnar í Georgíu voru kynntar tilkynnti hann að hann ætlaði að halda blaðamannafund í næstu viku þar sem hann hann legði fram „óhrekjanlega“ skýrslu um meint kosningasvik í Georgíu sem ætti að vera grundvöllur til þess að fella allar ákærurnar niður.