Gengisveiking áfram inni í myndinni

Útlit er fyrir að gengi krónunnar haldi áfram veikjast þrátt fyrir að fjárfesting Indigo Partners í WOW nái fram ganga, að mati hagfræðings. Gengi krónunnar sé enn hátt og yfirstandandi kjaraviðræður séu enn stór óvissuþáttur.

Eins og greint var frá í fyrradag hafa WOW air og bandaríska fjárfestingarfélagið Indigo Partners náð samkomulagi um að Indigo fjárfesti í íslenska flugfélaginu en snemma morguns hafði verið tilkynnt um að fallið hefði verið frá kaupum Ice­landair á WOW air.

„Það er mjög jákvætt fyrir markaðinn að fá inn erlenda fjárfesta sem koma ekki aðeins með fjármuni heldur einnig þekkingu og rekstrarlegt forræði, það er ákveðin traustsyfirlýsing,“ segir Ásgeir Jónsson, forseti hagfræðideildar Háskóla Íslands, í samtali við Fréttablaðið.

Eftir tíðindin styrktist krónan gagnvart öllum helstu viðskiptagjaldmiðlum sínum. Styrkingin nam 1,8 prósentum gagnvart Bandaríkjadal, rúmlega tveimur prósentum gagnvart evru og tæplega tveimur prósentum gagnvart breska pundinu. Ásgeir segir að minni óvissa í flugbransanum þýði þó ekki að veiking krónunnar undanfarnar vikur og mánuði gangi til baka.

„Ég held samt sem áður að það verði áfram þrýstingur á gengisveikingu. Hagsveiflan er nú að hníga eftir 7-8 ára vaxtartímabil og því eðlilegt á þessum stað að gengið lækki fremur en hækki,“ segir Ásgeir. „Það eru enn miklir óvissuþættir til staðar og gengi krónunnar hefur verið og er tiltölulega hátt. Það á eftir að leysa úr kjarasamningum sem er meiri háttar mál fyrir gjaldeyrismarkaðinn og það er verkefni sem þarf að leysa næstu mánuði.“

Undirstöður krónunnar góðar

Þrátt fyrir að útlit sé fyrir gengisveikingu er íslenska hagkerfið í betri stöðu en oft áður að sögn Ásgeirs.

„Í gegnum tíðina hefur innlend eftirspurn farið úr böndunum í efnahagsuppsveiflum er hafa skapað viðskiptahalla sem hefur síðan sjálfkrafa veikt gengið. Þrátt fyrir mikinn hagvöxt erum við enn með viðskipta­afgang og þrátt fyrir allt eru undirstöður krónunnar traustar þannig að það er engin gífurleg þörf á skarpri leiðréttingu miðað við núverandi launa- og neyslustig til að koma hagkerfinu aftur á réttan stað eins og var hér áður,“ segir Ásgeir.

Markaðurinn tók vel í fréttir af samkomulagi WOW air og Indigo Partners. Töluverðar hækkanir voru í Kauphöllinni í gær sem vógu upp á móti þeim lækkunum sem áttu sér stað í fyrradag þegar tvísýnt var um framtíð WOW air. Festi hækkaði um 11 prósent, Hagar um 7,56 prósent og Reitir um 7,28 prósent. Úrvalsvísitalan hækkaði um 3,86 prósent og ávöxtunarkrafa skuldabréfa lækkaði um 17 til 21 punkt.

Ásgeir segir að nær öll félögin í Kauphöllinni séu mjög hóflega verðlögð miðað við kennitölur og hlutabréfamarkaðurinn hafi verið að gefa eftir á árinu. „Þannig að mér finnst ekki ólíklegt að um leið og fólk fær tilfinningu fyrir því að hagkerfið sé komið fyrir vind þá muni hlutabréfamarkaðurinn taka aftur við sér.“

Enn óvissa í kringum WOW

Vonast er til þess að fjárfesting Indigo gangi í gegn sem fyrst en hún er háð áreiðanleikakönnun, rétt eins og kaupsamningurinn á milli WOW air og Icelandair.

„Það er mjög jákvætt fyrir íslenskt efnahagslíf ef þessi umræða sem hefur verið síðustu þrjá mánuði verður að einhverju leyti á bak og burt þannig að hægt verði að horfa inn í komandi misseri með meiri vissu. En eins og maður skilur tilkynninguna sem var send út í gær á að hefja vinnu sem hljómar svipuð þeirri vinnu sem Icelandair hefur staðið í síðustu vikur. Vonandi fæst niðurstaða í þetta mál sem fyrst,“ segir Elvar Ingi Möller, sérfræðingur hjá greiningardeild Arion banka.

Þá hafa vaknað spurningar um það hvort fjárfesting Indigo Partners í WOW air hafi í för með sér stefnubreytingu.

„Megnið af þeim fjárfestingum sem Indigo hefur ráðist í snúa að flugfélögum sem byggja á lággjalda- og styttri ferðum á meðan WOW air hefur í æ meiri mæli færst í átt að líkaninu sem snýst um lággjalda- og lengri ferðir. Tíminn mun leiða í ljós hvort það verði stefnubreyting hjá WOW air hvað þetta varðar ásamt fleiru.“

Nýr eigandi WOW

Air Indigo Partners er bandarískt fjárfestingarfélag sem sérhæfir sig í að fjárfesta í flugfélögum og hefur tekist vel upp. Á síðasta áratug hefur Indigo fjárfest í bandaríska flugfélaginu Spirit Airlines, hinu mexíkóska Volaris og hinu ungverska Wizzair sem flýgur til Íslands. Indigo á rúman fimmtungshlut í Wizzair.

Á vefsíðunni Skift, sem sérhæfir sig í skrifum um ferðatengda starfsemi, er fjallað um Indigo Partners í engslum við tilkynninguna um fyrirhugaða fjárfestingu í WOW air. Þar er Bill Franke, sem fer fyrir Indigo, sagður kænn við samningaborðið og einblína á kostnaðarhagræði. Franke lagði inn risapöntun fyrir 430 Airbusflugvélum á síðasta ári sem hann hyggst úthluta til fjögurra flugfélaga sem eru að hluta í eigu Indigo.

Flugrekstur Indigo snýst að miklu leyti um lágt verð fyrir stuttar ferðir en flugrekstur WOW air byggir meira á lágu verði fyrir lengri ferðir. Skift veltir því upp hvort Indigo muni breyta leiðakerfi WOW air þannig að meiri áhersla verði lögð á styttri ferðir. Einnig hvort áform WOW um að hefja flug til Indlands samrýmist flugrekstrarlíkani Indigo