Bílskúrinn: Urmull mistaka í Ungverjalandi

Ungverski kappaksturinn bauð upp á urmul mistaka. Hver gerði þau stærstu, hvaða mistök skiptu engu?

Allt þetta og fleira í Bílskúrnum, uppgjöri hvers kappaksturs hér á Vísi.

Lewis Hamilton á sinni uppáhalds braut

Lewis Hamilton sat á ráspól á braut sem hann kallaði sína uppáhalds rétt fyrir tímatökuna. Allt fór úrskeiðis og Hamilton varð fjórði, tíundi og náði svo lágpunkti lengst fyrir aftan stigasæti seint í keppninni. Brautin er sennilega ekki ein af hans uppáhalds lengur.

Liðsfélagi heimsmeistarans, Nico Rosberg var á meðan í kjör stöðu. Hann var á leiðinni í tveggja vikna sumarfrí með eins stigs forskot í heimsmeistarakeppni ökumanna. Daniel Ricciardo sá sér leik á borði og reyndi að taka fram úr Rosberg, læsti dekkjum og endaði á því að skauta gegnum beygjuna fyrir framan Rosberg. Rosberg náði betra gripi út úr beygjunni og tók sætið aftur en lokaði of snemma á Ricciardo og keyrði á framvænginn á Red Bull bílnum.

Afturdekk á Mercedes bílnum sprakk við áreksturinn við framvænginn. Vaskurinn hirti því möguleika Rosberg á að taka forystu í keppni ökumanna. Hamilton endaði á því að ná í nokkur stig þrátt fyrir allt og jók forskotið um fjögur stig. Mistök hans skiptu því kannski minnstu, hann hefði þó eflaust viljað vinna og reyna að auka forskot sitt.

Hrakfarir Force India

Force India bíll Sergio Perez valt á æfingu á föstudags morgun. Force India sleppti seinni æfingu á föstudaginn til að leita rótar vandans. Vandinn reyndist vera veik fjöðrun. Flott en þá var allur föstudagurinn liðinn og fáir hringir komnir í hús hjá Force India sem er enn að reyna að skilja nýja bílinn sem var vígður í síðustu keppni.

Keppnin sjálf og hvað gerist? Hvorugur bíll liðsins kemst í mark. Nico Hulkenberg rann stjórnlaust á framvængnum á varnarvegg við beygju eitt. Hann var á talsverðum hraða og gat ekkert gert nema reyna að hægja á bílnum. Framvængurinn hafði brotnað af og skorðast af undir framdekkjum bílsins. Perez hætti svo keppni vegna bilunar seinna í keppninni. Force India þvertekur fyrir að Perez hafi hætt til að bjarga bílnum frá sömu örlögum og bíll Hulkenberg hlaut.

Hitnar undir Ísmanninum

Kimi Raikkonen, Ísmaðurinn var svalur í hitanum í Ungverjalandi, að minnsta kosti framan af keppni. Ferrari bílarnir náðu báðir svakalegri ræsingu og tóku fram úr báðum Mercedes bílunum. Raikkonen fór úr fimmta sæti í annað á fyrsta hring.

Útlitið var gott og Raikkonen virtist ætla að sanna að hann á heima hjá liði sem getur unnið keppnir, hann er kannski bara jafn góður og aðrir sem hafa eins og hann, orðið heimsmeistarar.

Bíllinn brást Raikkonen í þetta skipti og má segja að orð James Allison eftir keppnina hafi eflaust endurspeglað hug margra. „Ég finn til með Raikkonen, hann var í góðri stöðu þegar bíllinn brást honum,“ sagði tæknistjóri Ferrari.

Fleiri hafa eflaust fundið til með Raikkonen sem má ekki missa af mörgum tækifærum til að sanna gildi sitt. Sæti hans er orðið sjóð heitt og nánast bara spurning um hvenær en ekki hvort að Ísmaðurinn bráðnar í því.

Red Bull ræðst til atlögu

Liðið sem hefur helst verið á milli tannana á fólki fyrir slaka frammistöðu og vélarbilanir þetta árið stimplaði sig loksins inn. Fjórfaldir heimsmeistarar bílasmiða hætta ekki á einni nóttu að kunna að smíða góðan kappakstursbíl.

Spurningin var alltaf hvenær finnur Renault túrbó glósurnar sínar. Svo virðist sem áreiðanleiki sé nú kominn í Renault vélina. Red Bull bíllinn naut sín greinilega á brautinni í Ungverjalandi.

Vélarafl er ekki lykilatriði á Hungaroring brautinni. Geta Red Bull bílsins skein í gegn, ef vélin væri samkeppnishæf væri Red Bull búið að vinna keppni í ár. Ég held ég geti fullyrt það.

Vélin virðist samt keppnishæf, það er að segja hún er orðin hæf um að lifa heila keppni, sem er nýtt.

Hefði framúrakstur Ricciardo á Rosberg tekist hefði Ástralinn hugsanlega geta unnið keppnina. Hann læsti dekkjunum og það eru sennilega stærstu mistökin í allri þessari keppni stórra mistaka. Í staðinn fyrir að vinna færði Ricciardo liðsfélaga sínum Daniil Kvyat, annað sæti á silfur fati og lét sér þriðja sætið nægja.

Samantekt fyrir sumarfrí

Nú tekur við tveggja vikna lokun Formúlu 1 liða um allan heim, lítil sem engin starfsemi er heimil. Verksmiðjur liðanna eru nánast lokaðar í tvær vikur.

Næsta keppni er á Spa brautinni í Belgíu þann 23. ágúst. Þangað til verður staðan í heimsmeistarakeppni ökumanna sú að Hamilton er efstur og Rosberg er 21 stigi á eftir honum.

Eftir að hafa unnið um helgina er Vettel kominn í stöðu þar sem hann getur farið að velta fyrir sér titli, jafnvel. Hann er 21 stigi á eftir Rosberg og því 42 stigum á eftir Hamilton. Sú staða gæti breyst ansi hratt enda 25 stig í boði fyrir fyrsta sæti.

McLaren liðið er í skýjunum þegar sumarfríið hefst. Báðir bílar í stigasæti, það hefur ekki gerst allt tímabilið. Fernando Alonso lýsti fimmta sætinu sínu sem kærkominni gjöf til allra í liðinu. „Framfarirnar eru stöðugar en það er virkilega gott að hafa það svart á hvítu í stigatöflunni,“ sagði Spánverjinn eftir keppnina.