Sendi syninum stöðugt ó­bein skila­boð um að hann elskaði hann ekki

„Það er mjög erfitt að vera aðstandandi. Í mínu tilfelli sé ég það núna að ég byrjaði á að vera mjög stjórnsamur og reyna að ná stjórn á aðstæðunum. Ég lærði það ekki fyrr en miklu seinna að stjórnsemi er ein stærsta birtingarmynd meðvirkni og skilar yfirleitt ekki miklu. Ég hélt að meðvirkni væri að samþykkja hegðun og segja alltaf já, en það er ekki svoleiðis,“ segir Valli. 

„Þegar þú verður veikur með einstaklingnum og byrjar að hegða þér öðruvísi út af einstaklingnum. Ég var orðinn mjög stjórnsamur og fór í raun að haga mér eins og stjórnandi í vinnunni heima hjá mér að gefa skipanir og fleira í þeim dúr. Það fór auðvitað ekki vel í heimilið og allra síst í son minn. Hegðunarmynstrið hjá honum var byrjað löngu áður en hann var kominn í fíkniefni og þá var ég kominn í ákveðið hegðunarmynstur gagnvart honum líka, sem hjálpaði alls ekki til. Ég var kannski að taka af honum tölvuleiki eða refsa honum einhvern vegin og gefa honum endalaus óbein skilaboð um að ég elskaði hann ekki og að hann væri ekki nógu góður. Það tók mig langan tíma að átta mig á þessu og að átta mig á því að ég væri líklega ekki rétti aðilinn til að hjálpa honum þegar hann var kominn djúpt ofan í fíkniefni. En ég var rétti aðilinn til að styðja hann þegar hann var í vandræðum og vera til staðar fyrir hann.“

Mikilvægt að upplifa ást í baráttu við fíkn

Gunnar Ingi, sonur Valgeirs, hefur talað opinskátt um baráttu sína við fíkniefni og hefur gert hlaðvarpsþætti sem benda á vandann sem fíknisjúkir glíma við og hvernig það er að vera fastur á biðlista eftir meðferð. Valli segist mjög stoltur af syni sínum og þakklátur fyrir það hve vel gengur.

„Það er auðvitað rosalega erfitt að horfa upp á einhvern sem maður elskar fara í þessa átt og maður verður svo varnarlaus. Að langa svona mikið að hjálpa, en geta það ekki. Stjórnsemin sem blossar upp kemur frá þeim stað, en svo áttar maður sig á því að leiðin til að hjálpa er miklu frekar að sýna ást og væntumþykju heldur en að reyna að stýra og stjórna. Það er mjög mikilvægt fyrir einhvern sem er þegar að glíma við fíkn að vita að viðkomandi sé elskaður. Af því að fólk með fíknisjúkdóma upplifir sig gjarnan sem gallaða einstaklinga. Það er mjög erfitt að fara í gegnum svona ferli fyrir alla í fjölskyldunni og þetta var 15 ára ferli þar sem við vorum á ákveðinn hátt föst í þessu,“ segir Valli.

Hann segir stöðuna á syni hans mjög góða í dag og að hann sé búinn að standa sig eins og hetja í sinni baráttu.

Úrelt hugarfar þegar kemur að andlegum sjúkdómum

„Staðan er frábær í dag og það gengur virkilega vel hjá honum. Hann er búinn að vera virkilega duglegur og bjó svo til sitt eigið podcast sem hét „lífið á biðlista“ þar sem hann var að vekja athygli á þessum vanda og hvernig kerfið kastar honum í raun bara í burtu. Við eigum að vera komin þangað að vita betur árið 2025 og eigum að meðhöndla fíknisjúka sem sjúklinga, en ekki með því að refsa þeim. Það er löngu ljóst að það skilar engu. Við horfum á ákveðinn hátt ennþá á andlega sjúkdóma með úreltu hugarfari. Þeir sem glíma við þessa hluti eru á ákveðinn hátt jaðarsettir strax sem börn í skólakerfinu og rekast á veggi. Smám saman verður þörfin fyrir fjarlægð og fjarveru meiri og þannig hjálpum við þér í raun að verða manneskjan sem við viljum ekki að þú verðir. Svo refsum við þér ennþá meira og höldum að það skili einhverju. Það þarf að hugsa þetta alveg upp á nýtt.“

Valli ræðir í þættinum um það hvernig hann og Siggi Hlö félagi hans fóru út í það að stofna auglýsingastofu eftir að hafa haldið úti sjónvarpsþáttunum „Með hausverk um helgar“.

Lærir ekkert nema að gera mistök

„Siggi sá um grafíska hönnun á meðan ég sá um að selja og rukka. Við unnum þessi verkefni samhliða dagvinnunni okkar og smám saman byggðist þetta upp. Eitt árið velti aukavinnan okkar 30 milljónum og þá sagði ég við Sigga: „Er ekki kominn tími til að gera þetta bara að aðalvinnunni okkar?“ Við stofnuðum þá auglýsingastofuna Hausverk, en föttuðum fljótt að það var ekki sterkur leikur að tengja nafnið við útvarpsþættina, þar sem ímynd okkar þar var í raun bara að við værum vitleysingar. Við vorum í raun bara einhvers konar „Wayne´s World“ í sjónvarpinu og það voru algjör markaðsmistök að nota þetta nafn. Hausverk átti að merkja að vinna verk með hausnum en ímyndin var meira að manni væri illt í hausnum, sem er ekki vænlegt ef það á að vinna alvöru verkefni og vera trúverðugur. En maður lærir ekkert nema gera mistök og við fórum í það verkefni að breyta nafninu og ímyndinni og í kjölfarið urðum við að Pipar.“

Þeir félagarnir ákváðu að breyta nafninu í Pipar og fengu Björgvin Halldórsson til að lesa símsvaraskilaboð sem urðu fljótt þekkt: „Hausverkur í gær, Pipar í dag – nýtt nafn, sama kennitala.“ Hjólin fóru svo fljótt að snúast og nú er fyrirtækið með starfsstöðvar á Íslandi, í Noregi og Finnlandi. Valli býr í Osló, þar sem hann unir sér vel í leik og starfi og er ekki á samfélagsmiðlum, jafnundarlegt og það kann að hljóma fyrir mann í hans starfi.

Fjarverandi á Facebook

„Ég er ekki á Facebook, ekki á instagram eða TikTok og fúnkera mjög vel. Fólk í kringum mig veit að það þarf að senda mér skilaboð öðruvísi en í gegnum samfélagsmiðla. Ef ekki, þá missi ég bara af því og það er þá bara allt í lagi. Ég lendi oft í hópum þar sem er verið að vinna að einhverju og þá segi ég bara strax í byrjun að það verði ekki Facebook-hópur og ég muni ekki byrja á Facebook fyrir ykkur. Þá kemur mjög oft svarið um að það sé nú ekkert mál og að þau geti stofnað aðgang fyrir mig. Þá spyr ég: „Haldið þið í alvöru að ég væri ekki búinn að stofna Facebook ef þetta snerist bara um það?“ Það fylgir því mikið frelsi að standa aðeins utan við þetta og ég ætla að halda mér þar,“ segir Valli.

Hann segist þrátt fyrir að vera ekki á þessum miðlum sem neytandi alltaf vilja vera að fylgjast með því sem er nýtt.

„Maður á alltaf að vera leitandi og opinn fyrir því sem kemur nýtt inn á markaðinn. Um leið og maður hættir því, þá hætta framfarirnar. Það pirrar mig alltaf þegar fólk í kringum mig gerir grín að einhverjum nýjum eða einhverju nýju. Þú veist aldrei hvenær þessi nýi verður betri en þú og það er lykilatriði að hafa auðmýkt til að tileinka sér nýja hluti.“

Hægt er að nálgast viðtalið við Valla og öll viðtöl og podköst Sölva Tryggvasonar inni á solvitryggva.is