Viðskipti innlent

Lítið sem ekkert fékkst upp í kröfur í þrota­bú bakarísins

Árni Sæberg skrifar
Jóhannes Felixsson, Jói Fel, rak bakarí um árabil.
Jóhannes Felixsson, Jói Fel, rak bakarí um árabil. Vísir/Vilhelm

Einungis fjórtán prósent fengust upp í samþykktar kröfur í þrotabú Bakarís Jóa Fel. Lýstar kröfur námu 330 milljónum króna.

Bakarí Jóa Fel var tekið til gjaldþrotaskipta í september árið 2020 að kröfu Lífeyrissjóðs verzlunarmanna sem var samþykkt fyrir Héraðsdómi Reykjavíkur.

Krafan um gjaldþrot var lögð fram á grundvelli vangoldinna iðgjalda. Þau hafi verið innheimt af launum starfsfólks en ekki skilað til sjóðsins. Þá mun fyrirtækið ekki hafa greitt mótframlag af launum starfsfólks til lífeyrissjóðsins.

Tæpar tuttugu milljónir fengust

Í auglýsingu í Lögbirtingablaðinu um skiptalok búsins segir að skiptum hafi lokið í júní árið 2022 með úthlutunargerð. 

Lýstar kröfur í búið hafi numið 333,4 milljónum króna en samþykktar kröfur 140,6 milljónum króna. Skiptatrygging að fjárhæð 350 þúsund krónu hafi fengist að gullu endurgreidd, 18,9 milljónir króna hafi fengist upp í veðkröfur og 935 þúsund krónur upp í forgangskröfur. Meðal forgangskrafna eru launakröfur.

Samtals hafi því fengist greiddar 19,8 milljónir króna upp í samþykktar kröfur, eða 14,1 prósent.

Leiða má líkur að því að fjármunir í þrotabúinu hafi helst verið tilkomnir vegna sölu á tækjum og tólum bakarísins til Bakarameistarans.

Bakarameistarinn opnaði tvö útibú þar sem Bakarí Jóa Fel höfðu verið, í Holtagörðum og Spönginni.

Mistök við birtingu

Einhverjum kynni að koma spánskt fyrir sjónir að fréttir hafi ekki verið fluttar af skiptalokum árið 2022 fyrr en nú. Ástæðan er einföld, mistök voru gerð við birtingu auglýsingar um skiptalok á sínum tíma og því var hún ekki birt fyrr en í gær.


Tengdar fréttir

Aðeins tvö bakarí opin og Jói Fel segist ekkert vita

Jóhannes Felixson bakari, sem rekið hefur bakarí Jóa Fel undanfarin ár, segist funda stöðugt vegna resktrarerfiðleika bakarísins. Aðeins tvö bakarí eru opin sem stendur en fjórum hefur verið lokað.






Fleiri fréttir

Sjá meira


×