Viðskipti erlent

Boeing 757-þotan fær ekki að lenda í Fær­eyjum

Kristján Már Unnarsson skrifar
Boeing 757-þota FarCargo lenti í fyrsta sinn á Voga-flugvelli síðastliðinn þriðjudag. Var þetta eina og síðasta lending hennar í Færeyjum?
Boeing 757-þota FarCargo lenti í fyrsta sinn á Voga-flugvelli síðastliðinn þriðjudag. Var þetta eina og síðasta lending hennar í Færeyjum? Jónis Albert Nielsen/jn.fo

Áform færeyska fiskeldisfyrirtækisins Bakkafrosts um reglubundið flug með ferskan lax frá Færeyjum eru í uppnámi þar sem Boeing 757-fraktflutningaþota dótturfélagsins FarCargo fær ekki að lenda á flugvellinum í Vogum. Ástæðan er sú að 41 metra vænghaf hennar telst of breitt fyrir þennan eina flugvöll Færeyinga sem skilgreindur er fyrir allt að 36 metra vænghaf flugvéla.

Komu þotunnar til Færeyja var fagnað síðastliðinn þriðjudag með móttökuathöfn að viðstöddum helstu ráðamönnum eyjanna. Um kvöldið fór hún í sitt fyrsta fraktflug með ferskan lax til New York með millilendingu í Keflavík. Morguninn eftir var henni flogið til Billund í Danmörku.

Svo virðist sem einhvers misskilnings hafi gætt um hver hefði forræði málsins og að ráðamenn flugvallarins í Vogum hafi gefið til að kynna að ekkert yrði því til fyrirstöðu að þota FarCargo gæti notað flugvöllinn. Færeysk flugvallaryfirvöld sendu hins vegar frá sér yfirlýsingu á föstudag þar sem fram kemur að danska samgöngustofan sé eina stjórnvaldið sem geti veitt slíkt leyfi.

Þotan fékk heiðursbunu frá flugvallarslökkviliðinu á þriðjudag.Jónis Albert Nielsen/jn.fo

Regin Jacobsen, forstjóri Bakkafrosts, segist hafa verið í góðri trú um að sænski flugrekstraraðilinn West Atlantic væri kominn með undanþágu til að lenda þessari tegund flugvéla í Færeyjum. Flugvallaryfirvöld í Vogum segja núna að það hafi aðeins verið undanþága fyrir einni ferð, jómfrúarfluginu. Slík einskiptis leyfi hafi nokkrum sinnum verið veitt á undanförnum árum þegar stærri flugför hafi óskað eftir að lenda, þar á meðal herflugvélar.

Í öryggisflokkun danskra samgönguyfirvalda er Voga-flugvöllur með viðmiðunarkóða C, sem leyfir allt að 36 metra vænghaf flugvéla. Það þýðir að flugvélar eins og Boeing 737 og Airbus A320 mega nota flugvöllinn. Til að stærri þotur eins og Boeing 757 og 767 fái að lenda þyrfti völlurinn að vera með kóða D, sem leyfir allt að 52 metra vænghaf, en flokkarnir eru gefnir út af Alþjóðaflugmálastofnuninni ICAO.

Þotan við flugstöðina í Vogum í Færeyjum í síðustu viku. Þar hafði hún fjögurra klukkustunda viðdvöl áður en flogið var með fyrsta farminn til New York um Keflavík.Jónis Albert Nielsen/jn.fo

Í yfirlýsingu flugvallarins í Vogum kemur fram að ósk um leyfi fyrir Boeing 757-þotu FarCargo hafi fyrst verið lögð inn í september 2022. Dönsk samgönguyfirvöld hafi snemma árs 2023 beðið um að umsókninni yrði skipt upp í nokkra hluta. Það hafi síðan verið gert en síðustu umsóknir hafi ekki verið sendar inn til danska stjórnvaldsins fyrr en 31. janúar 2024 og 26. febrúar 2024. Beðið sé eftir að þær verði afgreiddar. Óskað hafi verið eftir varanlegri undanþágu.

Boeing 757-þota FarCargo hefur staðið óhreyfð á flugvellinum í Billund frá því á miðvikudag. Á meðan er reynt að greiða úr málum gagnvart dönskum samgönguyfirvöldum.

Stöð 2 fjallaði um flugmál Færeyinga í þessari frétt árið 2013:

Færeyjar Fréttir af flugi Danmörk Fiskeldi Sjókvíaeldi Matvælaframleiðsla Samgöngur Boeing

Tengdar fréttir

Færeyingar fagna fiskflutningaþotu

Boeing 757-fraktflutningaþota færeyska flugfélagsins FarCargo fékk hátíðlegar móttökur á Voga-flugvelli þegar hún lenti í fyrsta sinn í Færeyjum síðdegis í gær. Helstu ráðamenn eyjanna voru meðal gesta í móttökuathöfn, þeirra á meðal Aksel V. Johannessen, lögmaður Færeyja, og Høgni Hoydal utanríkis- og atvinnumálaráðherra, og fékk þotan heiðursbunu frá flugvallarslökkviliðinu þegar hún ók í hlað.

Kaupa flugvél til að flytja ferskan eldislax á markað

Færeyski fiskeldisrisinn Bakkafrost, í gegnum dótturfélag sitt FarCargo, mun í sumar hefja beint flug frá Færeyjum með ferskan eldislax á erlenda markaði. Til flugsins verður notuð fraktflugvél sem sérstaklega var keypt fyrir verkefnið.

Færeyingar fá nýja flugstöð

Færeyingar sækja nú hratt fram í flugmálum. Þeir eru að fá þrjár nýjar þotur, reisa nýja flugstöð, eru nýbúnir að stækka flugvöllinn og sjá fram á vaxandi þyrluflug til olíuborpalla. Fyrsta Airbus-þota Atlantic Airways er að koma inn til lendingar á einu flugbraut Færeyja en lenging hennar úr 1.250 metrum upp í 1.800 metra í fyrra var forsenda þess að færeyska flugfélagið réðst í kaup á þremur slíkum þotum.



Mest lesið


Fleiri fréttir

Sjá meira


×

Mest lesið