Ashley Graham klæddist kjól frá Hildi Yeoman: „Hún ber nafnið mitt rétt fram“

Þátturinn var sýndur í gærkvöldi en hann nýtur gríðarlegra vinsælda. Hægt er að sjá í spilaranum hér fyrir neðan.

Kjóll­inn heitir Wave og er í mynstri sem kall­ast Neon Pe­arl og geta áhugasamar nálgast hann hér.

Graham er augljóslega í skýjunum með flíkina og birtir ófáar myndir af sér í kjólnum á Instagram-síðu sinni. Í einu myndskeiðinu sést hún snúa sér í hring og tilkynna að kjóllinn sé úr smiðju Hildar Yeoman. 

Þetta er ekki í fyrsta sinn sem Gra­ham klæðist hönn­un eft­ir Hildi en hún er ekki ókunnug Íslandi því árið 2018 heimsótti Graham landið.

Graham er með rúmlega 21 milljón fylgjenda á samfélagsmiðli sínum og því óhætt að segja að um ágætis auglýsingu fyrir Hildi sé að ræða. Sjálf segist Hildur þetta vera draumi líkast. 

„Ég hef verið mikill aðdáandi Ashley Graham í mörg ár,“ segir Hildur í samtali við blaðakonu og heldur áfram. „Ég hitti Ashley fyrir nokkrum árum þegar hún kom til Íslands og ég er í góðu sambandi við stílistann hennar sem þekkir brandið mjög vel. Sem er ótrúlega skemmtilegt. 

Að mínu mati er Ashley ein helsta talskona fyrir jàkvæða líkamsímynd sem uppi hefur verið og hefur gríðarlega mikil áhrif í bransanum. Það er til að mynda til Barbie dúkka sem er gerð eftir henni. 

Það er gríðarlegur heiður fyrir mig að klæða hana. Við höfum verið að gera flíkur fyrir konur í öllum stærðum og gerðum frá því að ég startaði merkið mitt. 

Klæðist nánast eingöngu eigin hönnun

Við erum oft að klæða konur fyrir sérstök tilefni, brúðkaup, afmæli, útskrift og fleira. Það er mjög mikilvægt fyrir mig að sem flestar konur geti fundið flík hjá okkur sem þeim líður vel í og sem þeim líður sem glæsilegst í. Þess vegna gerum við flíkur frá xs-xxl í ýmsum mismunandi sniðum. Við gerð flíkanna þá mátum við þær á mismunandi stærðum og aðlögum sniðin svo þau henti sem best. Ég nota sjálf flíkur í L-XL og klæðist nánast eingöngu minni hönnun.

Magnaður stuðningur

Þetta er í raun magnaður stuðningur sem hún sýnir mér með það að auglýsa brandið í beinni útsendingu í Bandaríkjunum og með því að pósta um þetta á sínum miðlum. Svo ber hún meira að segja nafnið mitt rétt fram sem mér finnst ótrúlega vel af sér vikið.“