Á­skrif­endur fá mögu­leikann á því að breyta tístum

Þetta kemur fram í tilkynningu frá Twitter þar sem segir að fyrir átta dali á mánuði, um 1.100 krónur, muni áskrifendur fá hið fræga bláa merki við reikning sinn, þó eftir að þeir hafi sent inn staðfestingu á auðkenni. 

Sem stendur er áskriftin aðeins í boði fyrir notendur í Bandaríkjunum, Kanada, Ástralíu, Nýja-Sjálandi og Bretlandi. Áform eru þó uppi um að gera áskriftarleiðina aðgengilega í fleiri löndum.

Misnotað síðast

Skömmu eftir að auðkýfingurinn Elon Musk festi kaup á Twitter hóf fyrirtækið að selja notendum aðgang að bláa merkinu, sem hafði falið í sér að Twitter ábyrgist að sá sem segist vera á bak við reikninginn sé það í raun og veru. Áður þurfti að sækja sérstaklega um vottunina og var hún ekki aðgengileg hverjum sem er.

Segja má að sú tilraun hafi mistekist hrapallega þar sem þetta gerði það að verkum notendur gátu búið til til reikning á Twitter, látið hann heita hvað sem er en samt sem áður öðlast auðkenningu með því að greiða fyrir það það átta dali á mánuði. Aragrúi notenda nýtti þetta til að búa til reikninga í nafni frægs fólks og jafnvel fyrirtækja. Í kjölfarið var áskriftarleiðin tekin úr sambandi.

Nú er þessi nýja áskriftarleið hins vegar komin aftur til sögunnar, ásamt ýmsum öðrum kostum sem ekki bjóðast venjulegum notendum samfélagsmiðilsins. Gerir Twitter ráð fyrir að áskrifendur muni sjá færri auglýsingar, geta sent inn lengri myndbönd, njóta forgangs í leitarniðurstöðum og öðrum samskiptum, svo dæmi séu tekin.

Einna þyngst vegur mögulega að áskriftinni mun fylgja möguleikinn á því að breyta tístum, eitthvað sem lengi hefur verið kallað eftir. Gert er ráð fyrir því að áskrifendur geti breytt tístum í allt að þrjátíu mínútur eftir að þau eru sett í loftið. Breytt tíst verða auðkennd með sérstöku merki.

Til að minnka möguleikann á því að kaup á bláa merkinu verði misnotuð líkt og síðast þegar áskriftarleiðin var kynnt til sögunnar munu áskrifendur missa merkið tímabundið ef þeir breyta nafni aðgangsins Twitter, notendanafni eða mynd. Mun merkið ekki birtast að nýju fyrr en Twitter hefur farið yfir breytingarnar.

Athygli vekur þó að notendur iPhone-síma Apple þurfa að greiða hærra verð en aðrir, eða ellefu dali, um 1.600 krónur. Ekki hefur verið gefin skýring á því hverju þessi munur sætir. Í frétt Guardian eru leiddar líkur að því að þetta sé til þess að vega upp á móti því að Apple tekur til sín allt að 30 prósent hlut fyrir kaup í gengum smáforritaverslun tæknirisans.