Leggja niður starf­semi bóka­bílsins

Morgunblaðið greinir frá þessu. Í drögum að nýrri fjárhagsáætlun Borgarbókasafnsins er lagt til að starfsemi bókabílsins Höfðingja verði lögð niður með öllu.

Pálína Magnúsdóttir, borgarbókavörður, segir í samtali við Morgunblaðið að aðsókn í bókabílinn sé ekki mikil. Hún hefur minnkað jafnt og þétt í gegnum árin. Fjöldi leigðra bóka úr bókabílnum er sjöfalt lægri en á því safni sem hefur fæst útlán.

„Áhuginn hefur minnkað. Hann stoppar mest við skóla og hjá eldri borgurum og við ætlum að reyna að mæta því með annarri þjónustu,“ segir Pálína.

Borgin gerði kröfu um tuttugu milljón króna niðurskurð og er bókabíllinn einn af þeim hlutum sem fórna þarf. Borgarbókasafnið notaði þennan niðurskurð frekar í að skera niður í einstökum verkefnum frekar en að skera niður í föstum rekstri bókasafna.