Allt í járnum eftir leik kvöldsins í Madríd

Real Madrid og Chelsea gerðu 1-1 jafntefli í fyrri leik liðanna í undanúrslitum Meistaradeildar Evrópu. Chelsea því í góðum málum fyrir síðari leik liðanna í Lundúnum.

Bæði lið stilltu upp í þriggja manna vörn en gestirnir virtust mun öruggari með leikkerfið í upphafi leiks. Chelsea byrjaði leikinn í fimmta gír og fengu gestirnir dauðafæri strax á 10. mínútu leiksins.

Mason Mount átti þá frábæran sprett upp vinstra megin, náði að skófla boltanum inn á teig þar sem Christian Pulisic skallaði knöttinn fyrir fætur Timo Werner sem var aleinn inn í markteig.  

Þjóðverjinn skaut í fyrsta en skotið var laust og Thibaut Courtois náði að slæma hægri fætinum í knöttinn og bjarga heimamönnum.

Aðeins nokkrum mínútum síðar fékk Pulisic frábæra sendingu inn fyrir vörn Real. Hann tók við knettinum en fór í raun aðeins frá marki, enginn varnarmaður fór í átt að honum svo Courtois tók það á sig. Sá bandaríski fór auðveldlega framhjá belgíska markverðinum og þrumaði knettinum í netið.

Staðan verðskuldað orðin 1-0 Chelsea í vil þegar 14 mínútur voru liðnar. Upp úr þurru var Karim Benzmea næstum búinn að jafna metin á 22. mínútu þegar skot hans sleikti stöngina.

Þegar tæpur hálftími var liðinn af leiknum jafnaði Benzema hins vegar metin með frábæru marki sem virtist beint af æfingasvæðinu.

Hornspyrnu Toni Kroos var fór út á Marcelo, sá brasilíski lyfti boltanum á fjærstöng þar sem samlandi hans Casemiro stangaði boltann fyrir markið. Éder Militão flikkaði boltanum á Benzema sem tók við boltanum með höfðinu áður en hann klippti boltann meistaralega í netið.

Frábæt mark í alla staði og staðan orðin 1-1. Þannig var hún er flautað var til loka fyrri hálfleiks. Fátt markvert gerðist í síðari hálfleik nema ef til vill að Eden Hazard – fyrrum leikmaður Chelsea – kom inn af varamannabekk Real en Belginn hefur verið að glíma við meiðsli undanfarið en nú horfir loks til betri vegar.

Hazard var nokkuð sprækur miðað við en síðari hálfleikur bar þess merkis að bæði lið voru orðin nokkuð þreytt Mögulega tók gríðarleg rigning sinn toll en völlurinn hefur verið orðinn þungur undir lok leiks.

Lokatölur 1-1 í Madríd í kvöld og því allt í járnum fyrir síðari leik liðanna sem fram fer í Lundúnum í næstu viku.