Fyrir­spurnum rignir vegna krafna nýs inn­heimtu­fyrir­tækis

Fyrirtækið, sem er í eigu Guðlaugs Magnússonar sem gegnir stöðu framkvæmdastjóra, tilkynnti í gær um kaup á öllum smálánakröfum Kredia, Hraðpeninga, Smálána, 1909 og Múla. Fylgdi sögunni að allir vextir og lántökukostnaður aðrir en hefðbundnir dráttarvextir hefðu verið felldir niður á lánum. Þannig hefði óvissu um lögmæti krafanna verið eytt.

„Til 15. maí býður BPO Innheimta öllum skuldurum, sem vilja leysa úr sínum málum án dráttarvaxta og innheimtukostnaðar, að ganga frá sínum skuldum óháð því hversu gamlar þær eru. Öllum skuldurum býðst að gera upp einungis höfuðstól lánanna svo framarlega sem það er gert í síðasta lagi 15. maí og þá verða dráttarvextir og innheimtukostnaður felldur niður,“ sagði í tilkynningunni í gær.

Upplýsingar komi ekki heim og saman

Neytendasamtökin furða sig á nýja félaginu í tilkynningu á vef sínum í dag. Þar segir að fyrirspurnum hafi rignt til samtakanna og eigi þær flestar það sameiginlegt að framangreindar upplýsingar frá innheimtufélaginu koma ekki heim saman.

„Fjárhæð þeirra reikninga sem BPO hefur sent fyrrum lántökum og Neytendasamtökunum hafa borist, nema ekki einvörðungu höfuðstól krafnanna heldur að því er virðist einnig lántökukostnaði, innheimtukostnaði og vöxtum. Þá voru kröfur settar inn í heimabanka seint í gær, 13. apríl með eindaga sama dag. Hefur þetta valdið lántakendum vanda og verður að teljast afar óeðlilegt. Þá eru dæmi um að kröfur hafi hækkað mikið, jafnvel tvöfaldast frá því í gærkvöldi.“

Neytendasamtökin hafa staðið í stappi við smálánafyrirtæki um árabil. Þau segjast þó hafa ráðlagt fólki endurgreiða höfuðstól lánanna en ekki ólöglega vexti lánanna. Minna þau á niðurstöðu áfrýjunarnefndar neytendamála sem hefur staðfest að fram til maí 2019 hafi vextir þessara lána verið hærri en lög. Því þurfi neytandi ekki að greiða þá.

Sumar kröfurnar fyrndar að öllu leyti

Neytendasamtökin ætla að stór hluti krafnanna sem BPO keypti og innheimtir nú varði ólögleg lán. Þar á meðal flýtigjaldslán, rafbókarlán og lán með árlegum hlutfallskostnaði langt umfram löglegt hámark.

„Þau sem tekið hafa lán fyrir maí 2019 og hafa greitt af þeim, hafa því að öllum líkindum greitt ólögmætan vaxtakostnað og hugsanlega líka vanskilakostnað og dráttarvexti vegna ólöglegra lána. Að mati Neytendasamtakanna er það brot á innheimtulögum að innheimta lán sem fyrir liggur að beri ólögmæta vexti og að setja slík lán í innheimtuferli.“

Nú þegar hafi mál borist samtökunum þar sem líti út fyrir að BPO sé að innheimta kröfur sem að stórum hluta til séu fyrndar að fullu leyti.

„Lántakar eiga rétt á að fá sönnun þess að krafan hafi skipt um hendur og á rétt á sönnun tilurðar krafna á hendur þeim. Það er á höndum innheimtuaðila að sanna réttmæti krafna sem hann innheimtir, og ekki á höndum almennings að afsanna það. Samtökin hvetja því alla sem hafa fengið kröfu í heimabanka frá BPO innheimtu til að kalla eftir gögnum varðandi kröfuna, þ.e.; sundurliðun á kröfunni, hvenær lánið var tekið, hver var vaxta eða lántökukostnaður og hvaða kostnaður hefur fallið á hana á þeim tíma, svo sem innheimtukostnaður eða dráttarvextir.“

Drög að tölvupósti

Þeir sem hafi þegar greitt af ólöglegum lánum ættu að fara fram á skuldajöfnuð.

„Neytendasamtökunum hefur einnig á undaförnum árum borist allmargar ábendingar um að reynt hafi verið að innheimta gamlar kröfur án þess að sýnt hafi verið fram á tilurð þeirra og þær jafnvel fyrndar. Benda samtökin því á að peningakröfur fyrnast á 10 árum en vextir og annar kostnaður á fjórum árum. Því benda Neytendasamtökin lántökum á að greiða ekki kostnað af kröfu (eða sjálfa kröfuna) nema athuga fyrst hvort hún sé fyrnd, eða sé réttmæt.“

Neytendasamtökin hvetja fólk sem fengið hefur lántökukröfu til þess að senda fyrirtækinu fyrirspurn og þar séu samtökin til í að vera í cc. Birta þau dæmi um tölvupóst sem hægt væri að senda:

Tölvupóstfang: bpo@bpo.is

cc: smalan@ns.is

Efni: Fyrirspurn um innheimtukröfu

Góðan dag.

Nýlega birtust í heimabanka mínum reikningar í nafni félagsins BPO innheimta ehf. Ég kannast ekki við að hafa átt í neinu viðskiptasambandi við félagið og óska eftir skýringum á umræddum reikningum, þar með talið gögnum er sýna fram á tilurð umræddra krafna, sönnun kröfuhafaskipta, dagsetningar, á hverju þær byggjast, hvernig sundurliðun sé háttað, hvort um lán sé að ræða sem veitt var með ólöglegum vöxtum, innágreiðslur mínar o.s.frv.

Með von um skjót svör,

[Nafn]

[kennitala]