Spáin fyrir Olís-deild karla 2020-21: Liðin sem langar og vilja vera í toppbaráttunni (4.-7. sæti)

Ingvi Þór Sæmundsson og Óskar Ófeigur Jónsson skrifa 9. september 2020 12:00

Íþróttadeild Vísis og Stöðvar 2 Sports spáir fyrir um gengi liðanna í Olís-deild karla en keppni í deildinni hefst með þremur leikjum á morgun, fimmtudaginn 10. september.

Í fyrradag skoðuðum við þrjú neðstu liðin í spá okkar, í gær litum við á liðin sem berjast um síðasta lausa sætið í úrslitakeppninni og núna er komið að liðunum sem freista þess að ná heimavallarrétti í úrslitakeppninni.

Að okkar mati munu bikarmeistarar ÍBV, Afturelding, Selfoss og Stjarnan berjast um sæti 4-7 í Olís-deildinni í vetur. Þau hafa samt væntanlega flest vonir og væntingar um að blanda sér í toppbaráttuna.

Liðin hafa tekið mismiklum breytingum frá síðasta tímabili en eru nokkuð svipuð að getu. Það var því þrautinni þyngra að raða þeim í sæti.

Patrekur Jóhannesson, nýr þjálfari Stjörnunnar, ásamt Einari og Björgvini Hólmgeirssonum sem munu aðstoða hann, innan vallar og utan.mynd/facebook-síða handknattleiksdeildar Stjörnunnar

Stjarnan í 7. sæti: Sveiflar Patti töfrasprotanum í heimabænum?

Fullt af nýjum leikmönnum eru komnir í Stjörnuna en stærstu fréttirnar eru þær að Patrekur Jóhannesson er kominn aftur til uppeldisfélagsins eftir áratugar fjarveru. Síðustu tvö liðin sem Patrekur hefur stýrt á hér á landi, Haukar og Selfoss, hafa orðið Íslandsmeistarar undir hans stjórn.

Stjarnan er ekki á þeim stað eins og staðan er núna og raunar frekar langt frá því. Eftir að hafa flakkað milli deilda í nokkur ár hafa Stjörnumenn fest sig í sessi í Olís-deildinni. Þeir hafa þó þurft að gera sér miðjumoð að góðu undanfarin ár þrátt fyrir að hafa oft haft á sterku liði að skipa. Stjarnan komst þó í bikarúrslit á síðasta tímabili þar sem liðið laut í lægra haldi fyrir ÍBV.

Miklar breytingar hafa orðið á leikmannahópi Stjörnunnar frá því á síðasta tímabili. Liðið fékk tvo af bestu ungu leikmönnum deildarinnar, Hafþór Vignisson og Dag Gautason, efnilega stráka frá Fjölni, tvo nýja markverði og Björgvin Hólmgeirsson endurnýjaði kynnin við Stjörnuna. Sterkir leikmenn hafa yfirgefið Garðabæinn en liðið virðist samt vera öflugra en á síðasta tímabili.

Patrekur ætlar að koma Stjörnunni í hæstu hæðir og hefur gefið sér þrjú ár til þess. Þolinmæði gæti reynst dyggð á þeirri vegferð. TM-höllin hefur verið eins og draugahús undanfarin ár og áhugi Garðbæinga á liðinu hefur nánast ekki verið neinn. Það gæti breyst með Patreki sem á að koma hleypa nýju lífi í starfið hjá Stjörnunni og láta hana skína.

Hversu langt síðan að Stjarnan ...

... varð Íslandsmeistari: Aldrei
... varð deildarmeistari: Aldrei
... varð meðal þriggja efstu í deildinni: 21 ár (1999)
... varð bikarmeistari: 13 ár (2007)
... komst í bikarúrslit: 0 ár (2020)
... komst í úrslitakeppni: 1 ár (2019)
... komst í undanúrslit: Aldrei
... komst í lokaúrslit: Aldrei
... féll úr deildinni: 5 ár (2015)
... kom upp í deildina: 4 ár (2016)

Gengi Stjörnunnar í deildarkeppninni undanfarin níu tímabil

2019-20 8. sæti í deildinni
2018-19 8. sæti í deildinni
2017-18 7. sæti í deildinni
2016-17 9. sæti í deildinni
2015-16 B-deild (1. sæti)
2014-15 9. sæti í deildinni
2013-14 B-deild (2. sæti)
2012-13 B-deild (2. sæti)
2011-12 B-deild (3. sæti)

Gengi Stjörnunnar í úrslitakeppninni undanfarin níu tímabil

2019-20 Úrslitakeppnin fór ekki fram
2018-19 Átta liða úrslit
2017-18 Átta liða úrslit
2016-17 Ekki í úrslitakeppni
2015-16 B-deild
2014-15 Ekki í úrslitakeppni
2013-14 B-deild
2012-13 B-deild
2011-12 B-deild

Stjarnan handbolti og Sixt skrifa undir samning Sjarnan og Sixt hafa framlengt samstarfi sínu og verður Sixt einn af...
Posted by Stjarnan Handbolti on Föstudagur, 3. júlí 2020

HBStatz tölurnar frá síðasta tímabili

Sóknarleikur Stjörnunnar 2019/20 í tölum HBStatz

Mörk skoruð í leik - 8. sæti (26,6)
Skotnýting - 8. sæti (58,0%)
Vítanýting - 3. sæti (84,1%)
Hraðaupphlaupsmörk - 6. sæti (59)
Stoðsendingar í leik - 12. sæti (8,3)
Tapaðir boltar í leik - 5. sæti (8,8)

Vörn og markvarsla Stjörnunnar 2019/20 í tölum HBStatz

Mörk fengin á sig í leik - 7. sæti (27,1)
Hlutfallsmarkvarsla - 8. sæti (29,6%)
Varin víti - 11. sæti (8)
Stolnir boltar - 8. sæti (76)
Varin skot í vörn - 4. sæti (47)
Lögleg stopp í leik - 6. sæti (19,9)

Félagaskiptamarkaðurinn

Komnir:

Arnar Máni Rúnarsson frá Fjölni
Björgvin Hólmgeirsson frá Stjörnunni
Goði Ingvar Sveinsson frá Fjölni
Brynjar Hólm Grétarsson frá Þór
Sigurður Dan Óskarsson frá FH
Pétur Árni Hauksson frá HK
Adam Thorstensen frá ÍR
Gunnar Hrafn Pálsson frá Gróttu
Dagur Gautason frá KA
Hafþór Vignisson frá ÍR

Farnir:

Ragnar Snær Njálsson til KA
Andri Már Rúnarsson til Fram
Hannes Grimm til Gróttu
Birgir Steinn Jónsson til Gróttu
Gunnar Valdimar Johnsen til ÍR
Bjarki Már Gunnarsson hættur
Ari Magnús Þorgeirsson
Ólafur Rafn Gíslason til ÍR
Eyþór Vestmann til ÍR
Sveinbjörn Pétursson til Aue
Árni Þór Sigtryggsson hættur
Andri Þór Helgason til Gróttu

Líklegt byrjunarlið

Mark: Brynjar Darri Baldursson
Vinstra horn: Dagur Gautason
Vinstri skytta: Tandri Már Konráðsson
Miðja: Ólafur Bjarki Ragnarsson
Hægri skytta: Hafþór Vignisson
Hægra horn: Leó Snær Pétursson
Lína: Arnar Máni Rúnarsson

Tandri Már Konráðsson gekk aftur í raðir uppeldisfélagsins í fyrra eftir tæpan áratug á öðrum slóðum.vísir/bára

Verður að eiga gott tímabil

Eftir nokkurra ára dvöl í atvinnumennsku kom Tandri Már Konráðsson aftur heim í fyrra og gekk í raðir Stjörnunnar. Hann var markahæsti leikmaður liðsins á síðasta tímabili og besti varnarmaður þess. Tandri er ein besta langskytta deildarinnar og þarf að eiga gott tímabil ef Stjarnan á að taka skref fram á við.

Sérfræðingur Seinni bylgjunnar segir ...

Theodór Ingi Pálmason fer yfir möguleika Stjörnunnar í Olís-deild karla í vetur.

Klippa: Stjarnan 7. sæti

Hergeir Grímsson er fyrirliði og lykilmaður Selfoss.vísir/vilhelm

Selfoss í 6. sæti: Lífið eftir Hauk

Hvar finnurðu 278 mörk sem eru farin úr liðinu þínu? Það verður stærsta verkefni Halldórs Sigfússonar, nýs þjálfara Selfoss. Haukur Þrastarson er farinn í atvinnumennsku og kemur vonandi ekki aftur í íslensku deildina næstu fimmtán árin eða svo.

Haukur var marka- og stoðsendingahæsti leikmaður Olís-deildarinnar á síðasta tímabili og skoraði og lagði upp 278 af 618 mörkum Selfyssinga. Íslandsmeistararnir skoruðu flest mörk allra í deildinni en ekkert lið fékk á sig fleiri mörk.

Halldór byrjar líklega á þeim enda, að reyna að laga varnarleikinn. Þá þarf litháíski landsliðsmarkvörðurinn Vilius Rasimas að vera góður en Selfoss var með verstu markvörsluna í Olís-deildinni í fyrra. Betri vörn og markvarsla myndi létta pressunni af sókninni svo Selfoss þyrfti ekki alltaf að skora rúmlega 30 mörk til að vinna leiki.

Velunnarar Selfoss hjálpuðu liðinu að landa Guðmundi Hólmari Helgasyni sem hefur leikið sem atvinnumaður undanfarin ár. Það voru metnaðarfull félagaskipti og Guðmundur ætti sér í lagi að styrkja vörn liðsins.

Selfyssingar voru í 5. sæti Olís-deildarinnar þegar síðasta tímabil var flautað af og gátu nokkuð vel við unað miðað við áföllin sem dundu á liðinu. Jákvæða hliðin á þeim peningi voru að enn fleiri ungir og efnilegir leikmenn fengu tækifæri og lögðu inn á reynslubankann fyrir framtíðina. Einn þeirra er Ísak Gústafsson sem þarf að leysa stöðu hægri skyttu í vetur.

Halldór er fær þjálfari og hefur náð góðum árangri þar sem hann hefur starfað. Hann er með gott lið og góðan efnivið í höndunum á Selfossi og það verður spennandi að sjá hvernig lífið eftir Hauk verður í Mjólkurbænum.

Hversu langt síðan að Selfoss ...

... varð Íslandsmeistari: 1 ár (2019)
... varð deildarmeistari: Aldrei
... varð meðal þriggja efstu í deildinni: 1 ár (2019)
... varð bikarmeistari: Aldrei
... komst í bikarúrslit: 27 ár (1993)
... komst í úrslitakeppni: 1 ár (2019)
... komst í undanúrslit: 1 ár (2019)
... komst í lokaúrslit: 1 ár (2019)
... féll úr deildinni: 9 ár (2011)
... kom upp í deildina: 4 ár (2016)

Gengi Selfoss í deildarkeppninni undanfarin níu tímabil

2019-20 5. sæti í deildinni
2018-19 2. sæti í deildinni
2017-18 2. sæti í deildinni
2016-17 5. sæti í deildinni
2015-16 B-deild (3. sæti)
2014-15 B-deild (4. sæti)
2013-14 B-deild (3. sæti)
2012-13 B-deild (5. sæti)
2011-12 B-deild (4. sæti)

Gengi Selfoss í úrslitakeppninni undanfarin níu tímabil

2019-20 Úrslitakeppnin fór ekki fram
2018-19 Íslandsmeistari
2017-18 Undanúrslit
2016-17 Átta liða úrslit
2015-16 B-deild
2014-15 B-deild
2013-14 B-deild
2012-13 B-deild
2011-12 B-deild

View this post on Instagram

Ár frá Íslandsmeistaratitlinum! Í dag er slétt ár frá því að Selfoss varð Íslandsmeistari í handbolta! Ógleymanlegur dagur sem hefði aldrei orðið að veruleika án ykkar stuðnings. Við bjóðum fólki upp á að horfa á leikinn ásamt upphitunarþætti í boði SelfossTV. Hægt er að kaupa miða í verslun @baldvinogthorvaldur og inn á vefverslun: https://selfoss.felog.is/verslun/flokkur/81 Sjá nánar: https://www.facebook.com/events/263100428216145/ #olisdeildin #mjaltavélin #selfosshandbolti

A post shared by Selfoss Handbolti (@selfosshandbolti) on May 22, 2020 at 3:57am PDT

HBStatz tölurnar frá síðasta tímabili

Sóknarleikur Selfoss 2019/20 í tölum HBStatz

Mörk skoruð í leik - 1. sæti (30,9)
Skotnýting - 1. sæti (64,0%)
Vítanýting - 5. sæti (81,5%)
Hraðaupphlaupsmörk - 8. sæti (55)
Stoðsendingar í leik - 1. sæti (13,4)
Tapaðir boltar í leik - 6. sæti (9,3)

Vörn og markvarsla Selfoss 2019/20 í tölum HBStatz

Mörk fengin á sig í leik - 12. sæti (30,5)
Hlutfallsmarkvarsla - 12. sæti (26,9%)
Varin víti - 1. sæti (19)
Stolnir boltar - 6. sæti (79)
Varin skot í vörn - 7. sæti (46)
Lögleg stopp í leik - 5. sæti (20,3)

Félagaskiptamarkaðurinn

Komnir:

Vilius Rasimas frá Aue (Þýskalandi)
Guðmundur Hólmar Helgason frá WestWien (Austurríki)

Farnir:

Haukur Þrastarson til Kielce (Póllandi)
Einar Baldvin Baldvinsson til Vals (úr láni)
Hreiðar Levý Guðmundsson til Vals
Guðni Ingvarsson hættur

Líklegt byrjunarlið

Markvörður: Vilius Rasimas
Vinstra horn: Hergeir Grímsson
Vinstri skytta: Einar Sverrisson
Miðja: Guðmundur Hólmar Helgason
Hægri skytta: Ísak Gústafsson
Hægra horn: Alexander Már Egan
Lína: Atli Ævar Ingólfsson

Guðmundur Hólmar Helgason lék tvö ár í Frakklandi og tvö ár í Austurríki.vísir/getty

Verður að eiga gott tímabil

Guðmundur Hólmar Helgason er mættur aftur í Olís-deildina eftir fjögurra ára fjarveru. Honum er ætlað að koma í stað Hauks í liði Íslandsmeistaranna. Hann fyllir ekki skarð hans í sókninni, enda gerir það enginn, en Akureyringurinn ætti að styrkja vörn Selfoss sem var hriplek á síðasta tímabili.

Sérfræðingur Seinni bylgjunnar segir ...

Rúnar Sigtryggsson fer yfir möguleika Selfoss í Olís-deild karla í vetur.

Klippa: Selfoss 6. sæti

Arnór Freyr Stefánsson er í hópi bestu markvarða Olís-deildarinnar.vísir/bára

Afturelding í 5. sæti: Ný rödd hljómar í Mosfellsbænum

Í fyrsta sinn í sex ár er Einar Andri Einarsson ekki þjálfari Aftureldingar. Hann lét af störfum í Mosfellsbænum í vor og við tók Gunnar Magnússon. Þrátt fyrir að vera ekki nema rétt rúmlega fertugur er Gunnar gríðarlega reyndur þjálfari sem hefur bæði gert ÍBV og Hauka að Íslandsmeisturum.

Eftir erfið ár í kjölfar blómaskeiðs Aftureldingar í kringum aldamótin er liðið aftur búið að festa sig í sessi sem eitt af þeim bestu á Íslandi. Á tíma Einars Andra með Aftureldingu komst liðið tvisvar í úrslit um Íslandsmeistaratitilinn og einu sinni í bikarúrslit. Forráðamenn Aftureldingar gera ekki minni kröfur á Gunnar en Einar Andra og stefnan er væntanlega að berjast á toppnum.

Mosfellingar voru í 3. sæti Olís-deildarinnar þegar síðasta tímabil var blásið af. Afturelding spilaði sterka vörn sem skilaði þó ekki nógu mörgum mörkum úr hraðaupphlaupum. Ekkert lið skoraði færri slík í Olís-deildinni en Afturelding. Mosfellingar þurfa að halda uppteknum hætti í vörninni í vetur og vonast til að hún skili fleiri ódýrum mörkum.

Afturelding fékk góða sendingu úr Breiðholtinu í formi Bergvins Gíslasonar, Sveins Andra Sveinssonar og Þrándar Gíslasonar Roth en þeir styrkja liðið mikið. Þá fékk Afturelding þrjá leikmenn frá liðunum sem féllu úr Olís-deildinni á síðasta tímabili, þ.á.m. hinn unga og efnilega Blæ Hinriksson frá HK.

Mosfellingar misstu Tuma Stein Rúnarsson til Valsmanna en Sveini Andra er ætlað að fylla skarð hans. Þeir eru ólíkir leikmenn og Sveinn Andri ætti að koma með annan brag á sóknarleik Aftureldingar.

Hversu langt síðan að Afturelding ...

... varð Íslandsmeistari: 21 ár (1999)
... varð deildarmeistari: 20 ár (2000)
... varð meðal þriggja efstu í deildinni: 0 ár (2020)
... varð bikarmeistari: 21 ár (1999)
... komst í bikarúrslit: 3 ár (2017)
... komst í úrslitakeppni: 1 ár (2019)
... komst í undanúrslit: 3 ár (2017)
... komst í lokaúrslit: 4 ár (2016)
... féll úr deildinni: 7 ár (2013)
... kom upp í deildina: 6 ár (2014)

Gengi Aftureldingar í deildarkeppninni undanfarin níu tímabil

2019-20 3. sæti í deildinni
2018-19 6. sæti í deildinni
2017-18 6. sæti í deildinni
2016-17 4. sæti í deildinni
2015-16 3. sæti í deildinni
2014-15 2. sæti í deildinni
2013-14 B-deild (1. sæti)
2012-13 8. sæti í deildinni
2011-12 7. sæti í deildinni

Gengi Aftureldingar í úrslitakeppninni undanfarin níu tímabil

2019-20 Úrslitakeppnin fór ekki fram
2018-19 Átta liða úrslit
2017-18 Átta liða úrslit
2016-17 Undanúrslit
2015-16 Lokaúrslit
2014-15 Lokaúrslit
2013-14 B-deild
2012-13 Ekki í úrslitakeppni
2011-12 Ekki í úrslitakeppni

Handknattleiksdeild Aftureldingar hefur komist að samkomulagi við Gunnar Magnússon sem mun taka við þjálfun...
Posted by Handknattleiksdeild Aftureldingar on Þriðjudagur, 17. desember 2019

HBStatz tölurnar frá síðasta tímabili

Sóknarleikur Aftureldingar 2019/20 í tölum HBStatz

Mörk skoruð í leik - 7. sæti (27,3)
Skotnýting - 4. sæti (61,2%)
Vítanýting - 7. sæti (75,6%)
Hraðaupphlaupsmörk - 12. sæti (45)
Stoðsendingar í leik - 6. sæti (11,5)
Tapaðir boltar í leik - 3. sæti (8,6)

Vörn og markvarsla Aftureldingar 2019/20 í tölum HBStatz

Mörk fengin á sig í leik - 4. sæti (26,5)
Hlutfallsmarkvarsla - 6. sæti (31,7%)
Varin víti - 2. sæti (15)
Stolnir boltar - 10. sæti (73)
Varin skot í vörn - 4. sæti (47)
Lögleg stopp í leik - 7. sæti (19,0)

Félagaskiptamarkaðurinn

Komnir:

Blær Hinriksson frá HK
Hafsteinn Berg Óli Ramos Rocha frá Fjölni
Sveinn Andri Sveinsson frá ÍR
Bergvin Þór Gíslason frá ÍR
Bjarki Snær Jónsson frá Fjölni
Þrándur Gíslason Roth frá ÍR
Úlfar Páll Monsi Þórðarson frá Val

Farnir:

Böðvar Páll Ásgeirsson í nám erlendis
Gestur Ólafur Ingvarsson
Júlíus Þórir Stefánsson hættur
Tumi Steinn Rúnarsson til Vals
Eyþór Örn Ólafsson til FH
Karolis Stropus til Þórs
Björgvin Franz Björgvinsson til Fjölnis (lán)

Líklegt byrjunarlið

Markvörður: Arnór Freyr Stefánsson
Vinstra horn: Gunnar Malmquist Þórsson
Vinstri skytta: Þorsteinn Gauti Hjálmarsson
Miðja: Sveinn Andri Sveinsson
Hægri skytta: Birkir Benediktsson
Hægra horn: Guðmundur Árni Ólafsson
Lína: Einar Ingi Hrafnsson

Birkir Benediktsson verður allavega eitt tímabil í viðbót í Mosfellsbænum.vísir/daníel

Verður að eiga gott tímabil

Birkir Benediktsson byrjaði síðasta tímabil frábærlega og klúðraði varla skoti. Hann gaf aðeins eftir seinni hluta tímabilsins en gat samt gengið mjög sáttur frá borði. Birkir var nálægt því að fara í atvinnumennsku en nú er ljóst að hann verður áfram hjá Aftureldingu. Hann er gríðarlega öflug skytta sem nær ómögulegt er að stöðva þegar hann kemst á ferðina.

Sérfræðingur Seinni bylgjunnar segir ...

Rúnar Sigtryggsson fer yfir möguleika Aftureldingar í Olís-deild karla í vetur.

Klippa: Afturelding 5. sæti

Eyjamenn fagna bikarmeistaratitlinum á síðasta tímabili.vísir/daníel

ÍBV í 4. sæti: Vonast til að létta lundina í Eyjum

Eyjamenn voru í 7. sæti Olís-deildarinnar þegar síðasta tímabil var flautað af en héldu hundrað prósent árangri sínum í Höllinni þegar þeir unnu Stjörnumenn í bikarúrslitaleiknum.

Þrjár kempur, sem komu mismikið við sögu í fyrra, lögðu skóna á hilluna eftir tímabilið. Þá fóru Kristján Örn Kristjánsson og Elliði Snær Viðarsson í atvinnumennsku. Þeir voru máttarstólpar í liði ÍBV, bæði í vörn og sókn, og Eyjamenn munu sakna þeirra sárt. Þá er Theodór Sigurbjörnsson meiddur.

Eyjamenn minntu á sig með því að vinna Valsmenn í Meistarakeppninni á sunnudaginn og verða ekki óskamótherjar neins liðs í úrslitakeppninni. Vörn ÍBV er sterk, þótt Elliði skilji eftir sig stórt skarð, og ekkert lið skoraði fleiri mörk úr hraðaupphlaupum í Olís-deildinni á síðasta tímabili.

Hornin og línan eru vel skipuð en stærsta spurningarmerkið er staða hægri skyttu. Þar verður Ásgeir Snær Vignisson einfaldlega að standa sig. Sigtryggur Rúnarsson er svo spennandi viðbót en hann þreytir frumraun sína í efstu deild á Íslandi í vetur.

Þjálfari ÍBV er heimamaðurinn Erlingur Richardsson er á sínu þriðja tímabili eftir að tók við liðinu í þriðja sinn 2018. ÍBV hefur verið í og við toppinn undanfarin ár og það breytist ekkert í vetur. Eftir erfitt ár þurfa Eyjamenn nauðsynlega á einhverju jákvæðu að halda og vonast til að handboltaliðin þeirra bjóði upp á Þjóðhátíð inni á vellinum.

Hversu langt síðan að ÍBV ... .

.. varð Íslandsmeistari: 2 ár (2018)
... varð deildarmeistari: 2 ár (2018)
... varð meðal þriggja efstu í deildinni: 2 ár (2018)
... varð bikarmeistari: 0 ár (2020)
... komst í bikarúrslit: 0 ár (2020)
... komst ekki í úrslitakeppni: 7 ár (2013)
... komst í undanúrslit: 1 ár (2019)
... komst í lokaúrslit: 2 ár (2018)
... féll úr deildinni: 12 ár (2008)
... kom upp í deildina: 7 ár (2013)

Gengi ÍBV í deildarkeppninni undanfarin níu tímabil

2019-20 7. sæti í deildinni
2018-19 4. sæti í deildinni
2017-18 Deildarmeistari
2016-17 2. sæti í deildinni
2015-16 4. sæti í deildinni
2014-15 7. sæti í deildinni
2013-14 2. sæti í deildinni
2012-13 B-deild (1. sæti)
2011-12 B-deild (5. sæti)

Gengi ÍBV í úrslitakeppninni undanfarin níu tímabil

2019-20 Úrslitakeppnin fór ekki fram
2018-19 Undanúrslit
2017-18 Íslandsmeistari
2016-17 Átta liða úrslit
2015-16 Undanúrslit
2014-15 Átta liða úrslit
2013-14 Íslandsmeistari
2012-13 B-deild
2011-12 B-deild

View this post on Instagram

Í kvöld sigruðu bikarmeistararnir okkar Valsmenn í Meistarakeppni HSÍ, oftast þekkt sem meistarar meistaranna! Mikið samræmi var með liðinum en okkar menn voru með með yfirhöndina mest allan leikinn. Í hálfleik var staðan 12-13 ÍBV í vil, eftir að Valsmenn skoruðu 2 síðustu mörk hálfleiksins. Eyjapeyjar hófu síðar hálfleik af krafti, skoruðu 3 fyrstu mörkin og létu forystuna aldrei af hendi. Mjög góð frammistaða hjá okkar mönnum og niðurstaðan var 24-26 sigur og því enn einn bikarinn í hús hjá Bandalaginu. Hákon Daði var markahæstur hjá ÍBV með 6 mörk, Sigtryggur Daði skoraði 5, Dagur 4, Fannar 3, Svanur Páll og Friðrik Hólm 2, Gabríel, Kári, Ásgeir og Arnór skoruðu 1 mark hver. Petar varði vel í markinu, 13 skot (36, 1% markvarsla). Sigurinn gefur strákunum án efa byr undir báða vængi fyrir baráttuna sem er framundan, en fyrsti leikur þeirra í Olís deildinni er á fimmtudaginn 10.september en þá mæta þeir ÍRingum í Austurbergi. Áfram ÍBV Alltaf, alls staðar!

A post shared by ÍBV Handbolti (@ibv_handbolti) on Sep 6, 2020 at 4:53pm PDT

HBStatz tölurnar frá síðasta tímabili

Sóknarleikur ÍBV 2019/20 í tölum HBStatz

Mörk skoruð í leik - 4. sæti (29,3)
Skotnýting - 2. sæti (62,6%)
Vítanýting - 2. sæti (84,3%)
Hraðaupphlaupsmörk - 1. sæti (95)
Stoðsendingar í leik - 4. sæti (12,0)
Tapaðir boltar í leik - 7. sæti (10,1)

Vörn og markvarsla ÍBV 2019/20 í tölum HBStatz

Mörk fengin á sig í leik - 6. sæti (27,0)
Hlutfallsmarkvarsla - 7. sæti (30,2%)
Varin víti - 8. sæti (11)
Stolnir boltar - 9. sæti (75)
Varin skot í vörn - 10. sæti (37)
Lögleg stopp í leik - 8. sæti (18,9)

Félagaskiptamarkaðurinn

Komnir:

Sigtryggur Daði Rúnarsson frá Lübeck-Schwartau (Þýskalandi)
Ásgeir Snær Vignisson frá Val
Jonathan Werdelin frá TMS Ringsted (Danmörku)
Svanur Páll Vilhjálmsson frá Fram

Farnir:

Sigurbergur Sveinsson hættur
Kristján Örn Kristjánsson til Pays d'Aix (Frakklandi)
Elliði Snær Viðarsson til Gummersbach (Þýskalandi)
Magnús Stefánsson hættur
Grétar Þór Eyþórsson hættur

Líklegt byrjunarlið

Markvörður: Petar Jokanovic
Vinstra horn: Hákon Daði Styrmisson
Vinstri skytta: Sigtryggur Daði Rúnarsson
Miðja: Fannar Þór Friðgeirsson
Hægri skytta: Ásgeir Snær Vignisson
Hægra horn: Gabríel Martinez
Lína: Kári Kristján Kristjánsson

Petar Jokanovic var valinn besti leikmaður bikarúrslitaleiksins 2020.vísir/daníel

Verður eiga að gott tímabil

Petar Jokanovic var misjafn á sínu fyrsta tímabili með ÍBV og 28,9 prósent hlutfallsmarkvarsla er ekki merkileg tölfræði. En þegar hann var góður var hann virkilega góður, og aldrei betri en í bikarúrslitaleiknum gegn Stjörnunni. Jokanovic verður að eiga fleiri góða leiki í vetur og ef það tekst verða Eyjamenn í góðum málum.

Sérfræðingur Seinni bylgjunnar segir ...

Theodór Ingi Pálmason fer yfir möguleika ÍBV í Olís-deild karla í vetur.

Klippa: ÍBV 4. sæti

Olís-deild karla ÍBV Afturelding UMF Selfoss Stjarnan

Tengdar fréttir

Spáin fyrir Olís-deild karla 2020-21: Slagurinn um síðasta sætið í úrslitakeppninni (8.-9. sæti)

Vísir spáir fyrir um gengi liðanna í Olís-deild karla og nú er komið að liðunum sem berjast um síðasta sætið sem gefur þátttökurétt í úrslitakeppninni.

8. september 2020 12:00