Örfá ágæt ráð fyrir alla sem ætla til Rússlands á HM

Flautað verður til leiks á Heimsmeistaramótinu í knattspyrnu á fimmtudag með opnunarleik Rússlands og Sádi-Arabíu. Ísland mætir Argentínu laugardaginn 16. júní. Þúsundir Íslendinga ætla að leggja leið sina til Rússlands til þess að fylgjast með strákunum okkar þreyta frumraun sína á stærsta knattspyrnumóti veraldar.

Eins og alltaf þarf að ýmsu að huga fyrir ferðalög en listinn er ef til vill örlítið lengri en venjulega þegar haldið verður til Rússlands. Bæði er landið framandi fyrir marga auk þess sem að tilefnið er stórt, sjálft HM í knattspyrnu.

Hér að neðan má sjá lista yfir nokkra hluti sem alls ekki gleymast auk nokkurra ráða sem gott er að hafa í huga. Vísir naut liðsinns Hauks Haukssonar, sem hefur starfað og búið í Rússlandi árum saman, til þess að taka saman listann.

Tekið skal fram að listinn er langt frá því að tæmandi auk þess sem að hefðbundnari lista má nálgast hér eða hér

1. Vegabréf og FanID

Eins og alltaf er vegabréfið það fyrsta sem huga þarf að þegar ferðast er. Vegabréfið þarf að vera í góðu ástandi og gilda að minnsta kosti sex mánuðum lengur en dvölin í Rússlandi.

Þeir sem fengu miða á HM þurftu einnig að sækja um svokallað FanID. Sá passi er nefnilega vegabréfsáritun til Rússlands og gildir frá 5. júní til 25. júlí.

Miði á leiki og Fan Id fara alltaf saman. Ef annað hvort vantar þá kemst viðkomandi ekki á völlinn. Það er því vissara að vera með Fan Id alltaf utan um hálsinn. Fan Id veitir einnig frían aðgang að almenningssamgöngum á leikdegi. Veltu því alvarlega fyrir þér að nota þær enda viltu ekki festast í umferðarteppu á leið á leikinn.

Nánari upplýsingar um Fan-ID má nálgast hér auk þess sem að hér má nálgast upplýsingasíðu utanríkisráðuneytisins vegna HM í Rússlandi.

Við komuna til Rússlands þurfa allir gestir að undirrita útprentun í tvíriti hjá landamæraeftirlitinu. Gesturinn fær annað eintakið og þarf að skila því er hann fer heim. Það blað má því alls ekki glatast.

Segir Haukur að mikilvægt sé að hafa FanID-ið alltaf á sér en gott sé að geyma vegabréfið á öruggum stað.

„Ég myndi ekki mæla með því að hafa passann á þér því að ef þú týnir passanum ertu í mjög vondum málum. Þú þarft hann bara þegar þú kemur inn og út úr landinu,“ segir Haukur.

Þá mæla íslensk stjórnvöld með því að eiga mynd af vegabréfi, Fan-ID og miða til þess að eiga á öruggum stað í síma eða til dæmis vegabréfi. Það gæti komið sér vel ef allt fer á versta veg.

2. Ekki grínast með Seinni heimsstyrjöldina

Haukur á ekki von á öðru en allt gangi vel á HM í Rússlandi og að almennt séu Rússar mjög jákvæðir gagnvart Íslandi, enda hefur árangur landsliðsins vakið mikla athygli víða um heim.

Ef marka má þetta tíst armenska blaðamannsins Artur Petrosyan sem sjá má hér að neðan, er íslenska landsliðstreyjan meðal annars vinsælli en sú rússneska á meðal heimamanna.

En ein leið til þess að breyta gleðskap í leiðindi er að grínast eða hafa Seinni heimsstyrjöldina í flimtingum. Rússar bera mikla virðingu fyrir þeim sem fórnuðu lífi sínu í styrjöldinni og ætlast þeir til þess að aðrir geri slíkt hið sama.

„Þeir eru viðkvæmir fyrir því ef menn eru með eitthvað sem tengist stríðinu. Það getur verið mjög viðkvæmt því Sovétmenn misstu náttúrulega 27 milljónir í miklum hildarleik,“ segir Haukur.

Plenty to choose from for each nation's fans in the World Cup official shop. Interestingly, Iceland's merchandise has been more popular with locals than Russia's. Argentina's is second. pic.twitter.com/S6T8ixdvSS

— Artur Petrosyan (@arturpetrosyan) June 11, 2018

Íslendingar sem ætla á leik Íslands og Nígeríu í Volgograd geta notað tækifærið og fræðst um stríðið enda var borginn vettvangur einna blóðugustu átaka veraldarsögunnar þegar Þjóðverjar sátu um borgina, sem þá hét Stalingrad.

Sovétmenn höfðu að lokum sigur og er hans og þeirra sem létust minnst víða um borgina. Sérstök athygli er vakin á Mamayev Kurgan-hæðinni þar sem orrustunnar er minnst. Þar er meðal annars að finna stærstu styttu af konu á gervalli jörðinni.

3. Maður tryggir ekki eftir á

Þrátt fyrir að HM fari fram í Evrópuhluta Rússlands gildir evrópska sjúkratryggingarkortið ekki í Rússlandi. Gangtu því úr skugga um að þú sért með tryggingamál og annað slíkt á hreinu áður en haldið er af stað. Gott er að hafa afrit af lyfseðlum með í för, ef lyf skyldu týnast í ferðinni.

4. Ekki gleyma að gefa þjórfé

Í framandi landi getur myndast reikistefna á veitingastöðum þegar gera á upp reikninginn eins og gerðist þegar íslenski fjölmiðlahópurinn gerði sér dagamun í Kabardinka í gær. Ýmsu getur verið að kenna en ekki láta hanka þig á því að hafa ekki greitt þjórfé á veitingastöðum og börum. Það er viðurkennd venja í Rússlandi.

„Þjónar og aðrir þeir geta þá byrjað að vera með stæla. Þeir eru að þjóna og þjóna og fá þá kannski ekkert fyrir sinn snúð.“ segir Haukur ef þjórféið gleymist. Þeir sem starfi sem þjónar séu oft á lágum launum og þjórfé geti skipt þá sköpum.

„Það er rétt að gefa um það bil tíu prósent þjórfé og það er almennt viðtekið,“ segir Haukur. Það þýðir að ef þú ferð á veitingastað og kaupir mat fyrir eitt þúsund rúblur, er rétt að skilja eftir um 100 rúblur fyrir þjóninn.

5. Rúblur, kort og aukakort

Flestir staðir í Rússlandi taka við kortum að sögn Hauks en gott getur verið að hafa seðla á sér. Það er klassískt ferðaráð að taka með sér meira en eitt kort í ferðina ef annað skyldi glatast.

Fyrir þá sem ekki vita það er gjaldeyrinn í Rússlandi rúbla og á gengi dagsins í dag er hægt að fá um 600 rúblur fyrir eitt þúsund íslenskar krónur.

Vakin er athygli á því að sérstakur rúbluhraðbanki er staðsettur í Smáralind.

6. Ekki búast við að allir tali ensku

Flestir af þeim Íslendingum sem ætla til Rússlands stefna á leik Íslands og Argentínu í Moskvu og þar má búast við því að flestir tali eða skilji ensku, að sögn Hauks.

„En það talar auðvitað ekki hver einasti maður ensku, þetta er ekki Ibiza eða Tenerife,“ segir Haukur og bendir á að gagnlegt sé að læra helstu frasa til þess að bjarga sér og sína rétta viðleitni.

Algenga frasa og hvernig bera eigi þá fram má nálgast hér

7. Hleðslutæki fyrir síma en millistykkið er óþarft

Síminn er orðinn miklu meira en bara sími. Síminn kemur þér á netið, geymir tónlistina þína og er myndavélin þín sem þú ætlar að safna minningum með.

Þá er lykilatriði að hafa hleðslutæki með í för og það er margt vitlausara að verða sér úti um aukarafhlöðu eða USB-rafhlöðu enda ekki víst að hleðslan dugi allan daginn.

Góðu fréttirnar eru þó þær að það þarf ekkert millistykki eða neitt slíkt til þess að stinga rafmagnstækjum í samband. Innstungurnar eru nefnilega alveg eins og á Íslandi.

8. Blá föt fyrir bláa múrinn

Hvort sem þú ætlar að kaupa íslenskan landsliðsbúning eða ekki hlýturðu að geta reddað þér bláum fötum svo þú sért sýnilegur á leikvöngunum.

Við viljum að strákarnir okkar finni fyrir stuðningi og það munu þeir gera þegar þeir sjá bláu hópana í stúkunum.

Hvort sem það er glænýr landsliðsbúningur, gamall landsliðsbúningur, Fram-treyja, varabúningur FH, gamla hettupeysan eða hvað sem er, það skiptir ekki máli. Vertu blár! 

9. Hafa gaman

Þetta ætti ekki að vera flókið enda fáar þjóðir sem skemmtu sér betur en á EM í Frakklandi fyrir tveimur árum þrátt fyrir að landsliðið hafi „aðeins“ dottið út í 8-liða úrslitum.

Við kunnum þetta og framundan er ótrúlegt ævintýri í framandi landi. Taktu með góða skapið, borðaðu góðan mat og njóttu þess að vera með fjölskyldunni eða vinunum.

Þegar þú mættir á völlinn til að hvetja okkar menn til dáða, taktu þér nokkrar sekúndur og mundu eftir því að þú ert að styðja íslenska landsliðið á heimsmeistamótinu í knattspyrnu, eitthvað sem flestir héldu að væri óhugsandi fyrir ekki nema tuttugu árum eða svo. Framundan eru ógleymanlegar stundir, hvernig sem fer.

Eins og áður segir er listinn hvergi nærri tæmandi og eru lesendur hvatti til að bæta við listann í athugasemdakerfinu hér að neðan.