Hreinsar hugann með því að farða sig

Förðunarfræðingurinn Vala Fanney Ívarsdóttir er dugleg við að deila fróðleik um förðun á netinu, bæði á bloggiu Kalon.is og YouTube. Vala er líka virk á samfélagsmiðlum og birtir reglulega förðunarmyndir á Instagram. Lífið fékk að yfirheyra Völu um allt sem tengist förðun.

Hvaða snyrtivörur eru í uppáhaldi? „Ég er alltaf spenntust fyrir vörum fyrir húðina og eignaðist nýlega Shade and Light palettuna frá Kat Von D sem ég er mjög spennt fyrir. Svo er ég búin að nota Wonder Powder frá Make Up Store mikið en það er eitthvað kraftaverkapúður sem allir ættu að eiga! Það gefur bara svo fallegan ljóma, bræðir einhvern veginn allt saman og gerir mann bara eitthvað svo sætan og fínan.“

Er eitthvað sem þú myndir aldrei gera þegar kemur að förðun? „Aldrei segja aldrei! Ég er mikið á móti því að banna hitt og þetta þegar kemur að förðun, fólk á bara að fá að gera og vera eins og það vill. Auðvitað er ýmislegt sem kannski hentar mér ekki að gera en um að gera að prófa sig áfram – þetta er bara farði og hann þvæst af.“

Hvaða förðunartískustraumur er í uppáhaldi þessa dagana? „Ég er mjög léleg að fylgja „trendum“ svo ég er ekkert rosalega inni í þessu öllu en kannski af því að jólin og áramótin eru nýbúin er ég með eitthvað glimmeræði. Mér finnst mjög kúl að setja smá glimmer eða aðeins stærri flögur létt yfir allt augnlokið og bara smá maskara með. Ég sá líka einhvern vera að tala um að úfnar og óreglulegar augabrúnir væru að koma sterkar inn í ár, sem mér finnst agalega spennandi!“

Er einhver förðunartískubylgja að detta út núna? „Mér finnst að allir megi bara gera eins og þeir vilja. En ég hef aldrei verið hrifin af rosalega ýktri andlitsskyggingu eða skilið þetta „baking“-æði svo það er eitthvað sem ég myndi kannski ekki sakna mikið.“

Hvað ertu lengi að farða þig? „Þegar ég farða mig dagsdaglega get ég verið mjög fljót ef ég þarf þess en mér finnst alltaf gott að gefa mér smá tíma, mér finnst mjög róandi að mála mig – það hreinsar hugann og mér finnst ég betur tilbúin í daginn eftir smá „me time“. Þegar ég er að fara eitthvað fínt gef ég mér alltaf góðan tíma til þess að hafa mig til, mér finnst það rosalega gaman og get dundað mér við það mjög lengi.“

Hvað gerir þú til að dekra við þig? „Þegar ég ætla dekra aðeins extra við mig finnst mér voða gott að láta renna í bað og setja á mig maska, bæði á andlitið og í hárið. Maskinn sem ég hef verið að nota undanfarið er frá The Body Shop og heitir Chinese Ginseng & Rice, hann er léttur hreinsimaski sem gefur húðinni fallega og jafna áferð. Í hárið nota ég L’anza hármaska sem gefur góðan raka og hárið verður rosa mjúkt. Ég set alltaf eitthvað freyðibað eða olíu í baðið svo húðin verði mjúk og fín, mér finnst langbest að nota eitthvað með lavender ilmi – það er svo róandi og slakandi. Svo skrúbba ég mig alltaf vel og nota feitt krem eftir á, ef ég er í stuði finnst mér líka gaman að setja á mig smá brúnkukrem en Instant Tan kremið frá St. Tropez er það sem ég nota mest. Eftir svona dekur finnst mér ég vera algjör pæja og tilbúin í allt sem heimurinn hendir á mig.“

Uppáhaldshúðvara? „Facial Radiance Pads frá First Aid Beauty finnst mér æði áður en ég farða mig – þetta eru svona blautar tóner-skífur sem skrúbba húðina létt og gefa henni fallegan ljóma. Einnig keypti ég mér nýja vöru úr Vitamin C línunni frá Body Shop nýlega sem heitir Glow-Reveling Liquid Peel. Já, ég er æst í ljómandi og ferska húð, en þetta er svona skrúbbur án korna sem tekur allar dauðar húðfrumur af og húðin verður silkimjúk og fín eftir á.“

Besta fegrunarráðið? „Muna að brosa og vera góð hvert við annað, það er svo miklu betra.“

Áhugasamir geta fylgst með Völu Fanneyju á öllum helstu samfélagsmiðlun og á YouTube undir notendanafninu Vala Fanney.