Sáttaumleitanir meðal frjálslyndra

Sáttaumleitan er í gangi innan forystu Frjálslynda flokksins en talsvert orðaskak hefur orðið í kjölfar uppsagnar Margrétar Sverrisdóttur úr stóli framkvæmdastjóra.

Þingmenn flokksins, þeir Guðjón Arnar Kristjánsson og Magnús Þór Hafsteinsson, hittust í gærkvöld og varð að ráði að leita sátta. Margrét sagði í samtali við Stöð 2 í morgun að hún myndi hitta fulltrúa úr miðstjórn flokksins í dag. Hún vildi það eitt segja um fundarefnið að farið yrði yfir stöðu mála og meðal annars tekið fyrir hvert yrði framtíðarhlutverk hennar í forystusveit flokksins. Miðstjórnarfundur Frjálslynda flokksins hefur verið boðaður næsta miðvikudag.