Björguðust úr eldsvoða

Sex björguðust þegar eldur kom upp í veiðihúsi við Geirlandsá á fjórða tímanum í fyrrinótt. Var mildi að lögreglumenn voru í grenndinni og voru fljótir á vettvang en fólkið vaknaði við reykskynjara og flýttu sér út klæðalítil. Húsið er mikið skemmt en þó ekki ónýtt að mati lögreglu en það er í eigu Stangaveiðifélags Keflavíkur. Eldsupptökin eru talin hafa verið frá kolagrilli við annan gafl þess en slökkvistarf gekk greiðlega eftir að slökkvilið kom á staðinn.