Flutningabíll ók út af

Bílstjóri slapp ómeiddur þegar flutningabifreið sem hann ók fór út af við Lækshraun austan við Kirkjubæjarklaustur klukkan hálfellefu á þriðjudagskvöld. Að sögn lögreglunnar í Vík í Mýrdal var mikill vindur og hálka á vegi þegar óhappið varð og missti bílstjórinn stjórn á bílnum með þeim afleiðingum að hann ók á hraundranga fyrir utan veginn. Bíllinn var óökufær á eftir og þurfti að afferma hann en hann var mestmegnis með matvæli og jólagjafir innanborðs.