Georgía gekk frá Portúgal og fer í 16-liða úr­slit á sínu fyrsta stórmóti

Georgía vann óvæntan 2-0 sigur gegn Portúgal og er komið áfram í 16-liða úrslit Evrópumótsins. Þrátt fyrir tapið í kvöld vann Portúgal riðilinn.

Strax á 2. mínútu missti Portúgal boltann á miðsvæðinu og Khvicha Kvaratskhelia kom Georgíu yfir eftir stungusendingu Georges Mikautadze. „Kvaradona“ opnaði vinkilinn og kláraði færið vel, niður í fjærhornið.

Leikurinn var virkilega fjörugur og bauð upp á mörg færi en hvorugu liði tókst að setja boltann í netið það sem eftir lifði fyrri hálfleiks.

Það gerðist svo á 57. mínútu þegar Portúgalinn Antonio Silva braut af sér í eigin vítateig og gaf Georgíu víti. Georges Mikautadze steig á punktinn og skoraði þrátt fyrir að markmaðurinn hefði farið í rétt horn.

Eftir að hafa tekið tveggja marka forystu lagðist Georgía eðlilega aðeins til baka. Portúgalir sóttu og fengu fín færi en uppskáru ekkert mark.

Lokaniðurstaða 2-0 og Georgía er komið áfram í 16-liða úrslit, líkt og Portúgal sem vann F-riðilinn þrátt fyrir að hafa tapað leik kvöldsins.

Þar mun Georgía mæta Spáni og Portúgal mæta Slóveníu.