Þægi­legt hjá City þrátt fyrir hæl­krók Orra

Manchester City komst þægilega áfram í 8-liða úrslit Meistaradeildar Evrópu með því að slá út dönsku meistarana í FC Kaupmannahöfn, samtals 6-2.

City vann 3-1 í kvöld rétt eins og í fyrri leiknum í Danmörku og hafði þegar gert út um leikinn í fyrri hálfleik, en öll mörk kvöldsins voru skoruð fyrir hlé.

Manuel Akanji og Julian Álvarez komu City í 2-0 á fyrstu tíu mínútunum í kvöld en mark Álvarez kom vegna skelfilegra mistaka Kamil Grabara í marki FCK, sem mistókst að grípa boltann. Landsliðsmarkvörðurinn Rúnar Alex Rúnarsson fylgdist með af bekknum hjá FCK.

Annar landsliðsmaður Íslands, Orri Steinn Óskarsson, var hins vegar í byrjunarliði FCK og spilaði sinn fyrsta leik fyrir liðið á árinu.

Orri lagði upp eina mark dönsku meistaranna í kvöld með afar laglegri hælsendingu á Mohamed Elyounoussi, eftir tæplega hálftíma leik.

Erling Haaland skoraði hins vegar þriðja mark City fyrir hálfleik, og síðasta mark kvöldsins.

Manchester City og Real Madrid eru því komin áfram í 8-liða úrslit.