Besta spáin 2023: Stutt stopp hjá FH

Venju samkvæmt spáir íþróttadeild Vísis og Stöðvar 2 Sports fyrir um gengi liðanna í Bestu deild kvenna fyrir mótið. Keppni í deildinni hefst þann 25. apríl með þremur leikjum. Fyrstu umferðinni lýkur svo 26. apríl með tveimur leikjum.

Íþróttadeild Vísis og Stöðvar 2 Sports spáir því að nýliðar FH lendi í 10. sæti Bestu deildar kvenna í sumar og leiki í Lengjudeildinni sumarið 2024.

FH-ingar hafa sýnt lítinn stöðugleika undanfarin ár og farið á milli efstu og næst efstu deildar með reglulegu millibili. Liðið komst upp úr Lengjudeildinni í fyrra eftir að hafa verið þar í tvö ár.

FH tapaði ekki leik í deildinni í fyrra og endaði í efsta sæti með 42 stig eftir að hafa gert jafntefli við Tindastól í hreinum úrslitaleik um titilinn í lokaumferðinni.

Síðast þegar FH var í efstu deild árið 2020 endaði liðið með sextán stig, vann fimm leiki, gerði eitt jafntefli en tapaði tíu leikjum. Þjálfarar liðsins, bræðurnir Guðni og Hlynur Eiríkssynir, vilja eflaust bæta sigurhlutfall liðsins en til þess þurfa þeir að ná því allra besta úr liðinu. 

Guðni tók við stjórnartaumunum árið 2018. Fyrir það var hann aðstoðarþjálfari meistaraflokks kvenna og þjálfari 2.flokks. Bæði hann og Hlynur þekkja hvern krók og kima í Kaplakrika. Hlynur hefur þjálfað yngri flokka félagsins undanfarin ár.

Liðið og lykilmenn

Miklar breytingar hafa orðið á leikmannahópnnum en FH er enn þá að leita að rétta varnarmanninum til að liðið smelli saman. Án þess gæti liðið verið brothætt aftarlega á vellinum. 

FH-liðið er orkumikið og vill verjast ofarlega á vellinum. Það er meðal annars tilkomið vegna samsetningar hópsins en mun fleiri sóknarsinnaðir leikmenn eru í hópnum en varnarsinnaðir.

Leikmannahópur FH er breiður en reynslulítill í efstu deild og mikið mun mæða á hinum 23 ára bandaríska framherja, Mackenzie George. Hún samdi við FH til eins árs á dögunum en miklu máli skiptir að hún skori að minnsta kosti 10 mörk.

Sísí Lára Garðarsdóttir er hætt en það er stórt skarð fyrir skildi. Sísí var algjört akkeri á miðjum vellinum. Brotthvarf hennar gæti reynst dýrt, sérstaklega í ljósi þess að hópurinn er reynslulítill.

Varnarmaðurinn Halla Helgdóttir meiddist illa í vetur og fór í aðgerð fyrir áramót og átti að vera orðin góð núna en aðgerðin misheppnaðist og ekki er vitað um stöðuna á henni en hún mun að öllum líkindum spila lítið í sumar.

Maggý Lárentínusdóttir er ófrísk og verður ekki með á komandi tímabili. Í fyrra voru Selma Dögg Björgvinsdóttir og Erna Guðrún Steinsen Magnúsdóttir ekki með vegna óléttu og fóru í Víking Reykjavík í vetur.

Margrét Sif Magnúsdóttir er hætt í fótbolta og markahæsti leikmaðurinn frá því í fyrra, Thelma Hjaltalín Þrastardóttir, er ólétt og verður ekki með.

Hinar nítján ára gömlu Sara Montoro og Erla Sól Vigfúsdóttir komu í vetur. Sara er sóknarmaður og kom frá Fjölni. Erla er varnarsinnaður miðjumaður og varnarmaður og kom frá Haukum. Hin tvítuga Hildigunnur Ýr Benediktsdóttir kom frá Stjörnunni en hún er sóknarmaður.

Varnarmaðurinn Birna Kristín Björnsdóttir kom á láni frá Breiðblik í vetur. Mikið mun mæða á henni í stöðu vinstri bakvarðar.

Fylgist með

Elísa Lana Sigurjónsdóttir og Hildigunnur Ýr eru líklegar til þess að springa út í sumar. Þær hafa báðar verið unglingalandsliðsmenn og eru gríðarlega góðar með boltann.

Í besta/versta falli

Í besta falli tekst FH-ingum að komast í efri hluta deildarinnar þegar henni verður skipt en í versta falli fellur liðið.