Ca­semiro sá aftur rautt í marka­lausu jafn­tefli United gegn botn­liðinu

Manchester United og Southampton gerðu markalaust jafntefli í fjörugum leik í ensku úrvalsdeildinni í dag. Brasilíumaðurinn Casemiro fékk rautt spjald í fyrri hálfleik.

Manchester United mætti til leiks í dag eftir 4-1 sigur á Real Betis í Evrópudeildinni á fimmtudag en síðasti deildarleikur, 7-0 tapið gegn Liverpool, var þeim eflaust enn í fersku minni. Southampton sat á botni deildarinnar fyrir leikinn og því um skyldusigur að ræða hjá United.

Hinn sjóðandi heiti Marcus Rashford fékk fyrsta marktækifærið þegar Gavin Bazunu varði í tvígang frá honum á með stuttu millibili. Bruno Fernandes átti síðan skot yfir markið eftir skyndisókn og skömmu síðar fékk Carlos Alcaraz ágætt færi en Raphael Varane komst fyrir skot hans.

Á 32. mínútu fékk Brasilíumaðurinn Casemiro rautt spjald fyrir tæklingu á Alcaraz. Casemiro var örlítið óheppinn því sóli hans fór af boltanum og síðan framan á legg Alcaraz en Anthony Taylor dómari kíkti í myndavélarnar og virtist ekki í neinum vafa um að rautt spjald væri réttur dómur.

Þetta er annað rauða spjaldið hjá Casemiro á stuttum tíma og hann er á leiðinni í fjögurra leikja bann.

Undir lok fyrri hálfleiks vildu leikmenn United síðan fá vítaspyrnu þegar boltinn fór í hönd Armel Bella-Kotchap í teignum en Taylor dæmdi ekki. Staðan í hálfleik 0-0.

United sótti til sigurs í síðari hálfleik og leikurinn var frekar opinn. James Ward Prowse skaut í þverslána úr aukaspyrnu og þá varði David De Gea vel þegar Theo Walcott komst í gegn. 

United fékk líka sín tækifæri og Bruno Fernandes skaut í stöngina en Bazunu var í boltanum. Mínútu síðar skaut svo Kyle Walker-Peters í stöngina hinu megin og í raun ótrúlegt að ekkert mark væri komið í leikinn.

Allt kom fyrir ekki og hvorugu liðinu tókst að skora. Lokatölur 0-0 og United er nú í þriðja sæti, ellefu stigum á eftir Manchester City og tveimur stigum á undan Tottenham í fjórða sætinu.