Framsókn vill leyfa sölu áfengis á sunnudögum

Samúel Karl Ólason skrifar 27. september 2022 15:27

Frá kosningapartýi Framsóknarflokksins haustið 2021. Þar var skálað fyrir góðu gengi í kosningum. Vísir/Vilhelm

Þingmenn Framsóknarflokksins hafa lagt fram frumvarp um að Áfengis- og tóbaksverslun ríkisins verði einnig opin á sunnudögum. sumardaginn fyrsta, 1. maí, 17. júní og fyrsta mánudaginn í ágúst. Telja þau að „veita þurfi áfengisútsölustöðum rýmri heimildir til að bregðast við tilkomu nýrra verslunarhátta“ og gera auðveldara að opna dyr ÁTVR fyrir neytendum þegar þeim hentar best.

Flutningsmenn þessa frumvarps eru Hafdís Hrönn Hafsteinsdóttir, Þórarinn Ingi Pétursson, Lilja Rannveig Sigurgeirsdóttir, Ágúst Bjarni Garðarsson og Jóhann Friðrik Friðriksson. Frumvarpið var einnig lagt fram á síðasta þingi en náði ekki fram að ganga.

Sjá einnig: Hækka gjald á áfengi og tóbak

Í greinargerð frumvarpsins segir að með tilkomu nýrra áfengisverslana, og þá sérstaklega netverslana, þurfi veita áfengisútsölustöðum rýmri heimildir til að bregðast við tilkomu nýrra verslunarhátta. Þar segir einnig að mögulegt sé að skatttekjur gætu aukist við þessar breytingar, nái þær fram að ganga, en erfitt sé að leggja mat á það.

„Að mati flutningsmanna er eðlilegt að áfengisútsölustaðir hafi rétt til að ákveða opnunartíma án þess að það sé skilyrt í lögum. Breytingin sem lögð er til með frumvarpi þessu felur einungis í sér að heimilt verður að hafa áfengisútsölustaði á fyrrgreindum dagsetningum opna, ekki er um skyldu að ræða. Það er talið vera í samræmi við sambærilegar reglur annars staðar á Norðurlöndum.“

Það að bannað sé að hafa verslanir ÁTVR opnar á sunnudögum og öðrum dagsetningum sem nefndar eru hér að ofan, segja flutningsmenn frumvarpsins að gæti leitt til þess að fólk sem vanti áfengi leiti annarra leiða til að nálgast vörurnar. Þær leiðir geti verið að kaupa áfengi af aðilum sem framleiði og selji áfengi með ólöglegum hætti.

Frumvarpið sé til þess fallið að áfengi verði áfram selt í öruggu umhverfi þar sem eftirlit sé með aldurstakmörkum og „stuðlað sé að forvörnum“.

„Meginefni frumvarpsins snýr að því að auka þjónustu við neytendur og að enn sé viðhaft tilgreint eftirlit með sölu áfengis,“ segir að endingu í greinargerð frumvarpsins.

Í lögum um verslun með áfengi og tóbak segir að markmið þeirra sé meðal annars að „takmarka og stýra aðgengi að áfengi og tóbaki og draga þannig úr skaðlegum áhrifum áfengis- og tóbaksneyslu“.

Áfengi og tóbak Alþingi Framsóknarflokkurinn Neytendur