Matar­inn­kaupin orðin með hæstu liðunum í heimilis­bók­haldinu

Krónan tilkynnti í gær að hún hefði fryst verð á 240 vörum í verslunum sínum til að leggja sitt á vogarskálarnar til að berjast gegn hækkandi verðbólgu. Bónus hefur tekið ákvörðun um að frysta ekki verðin í dag. 

Stjórnendur Haga, eigandi Bónus, sögðu í samtali við fréttastofu í dag að samkeppnissjónarmið kæmu í veg fyrir að til slíkra aðgerða yrði gripið hjá þeim. Þeir ætli hins vegar að leita annarra leiða til að lækka verðin. Neytendur hafa fundið vel fyrir verðhækkunum. 

„Það er ekkert tilfinning, það er bara allt að hækka,“ sagði Elva Björk Benediktsdóttir, sem fréttastofa hitti á í dag. Innt eftir því hvort Bónus ættti að fara sömu leið og Krónan í verðfrystingu sagði hún þetta: 

„Það væri auðvitað jákvætt fyrir okkur sem erum að versla í matinn.“

Lilja Birgisdóttir tekur undir að vöruverð fari hækkandi.

„Það er mín tilfinning. Þetta er orðið með hæstu liðunum hjá manni í heimilisbókhaldinu, það eru matarinnkaupin.“

Verðfrysting Krónunnar lokkar fólk að

Verslanir megi gera betur til að halda verðinu niðri. 

„Hlýtur það ekki að vera, miðað við allavega þær aðgreiðslur sem eru að berast. Að þær ættu að koma meira til móts við almenning? Það finnst mér,“ segir Halldóra Elín Ásgeirsdóttir. 

Verðfrysting hafi áhrif á kauphegðun neytenda. 

„Mér finnst það frábært, það mættu fleiri gera það og það er ein af ástæðum þess að ég er að versla hér í dag,“ segir Aðalheiður Björk Olgudóttir.

„Ég er orðinn gamalmenni eins og sagt er og það veitir ekki af að vera forsjáll og hagsýnn í matarinnkaupum, þá fer maður þangað sem verðið er best,“ segir Birgir Ásgeirsson.

Verðfrystingin sýnileg fyrir neitendur en fleiri skref hafi verið tekin

Framkvæmdastjóri Bónus sagði í dag að verðfrysting Krónunnar væri markaðsbrella. Framkvæmdastjóri Krónunnar segir ekki svo vera. 

„Það er alla vega ljóst að þessi aðgerð er kannski sú sem er mest sýnileg fyrir okkar viðskiptavini af því að þessar aðgerðir sem við höfum verið að ráðast í á undanförnum mánuðum, í þessu erfiða ástandi, þær snúa meira að því sem er bak við tjöldin,“ segir Ásta Sigríður Fjeldsted, framkvæmdastjóri Krónunnar. 

„Í samningum við okkar byrgja og flutningsaðila og annað. Það hefur auðvitað sýnt sig í nýjustu verðmælingu ASÍ, sem spannaði sjö mánuði, þá vorum við sú verslanakeðja eða matarkeðja á Íslandi sem hækkaði verð hvað minnst þannig að þetta hefur auðvitað skilað sér á þessu tímabili.“

Verðfrystingin beini neytendum í átt að ódýrari vörunum

Þær vörur sem frystar hafa verið í verði sé lítill hluti af vöruúrvali Krónunnar en geti þó haft áhrif á kostnað við matarinnkaup. 

„Það sem við erum að gera með þessu er að við erum að beina okkar viðskiptavinum í átt að þeim vörum sem eru hvað ódýrastar í okkar verslunum. Þannig að fólki er beint í átt að þeirri vörulínu þar sem það getur virkilega sparað í daglegum innkaupum,“ segir Ásta. 

„Við höfum reynt að láta þetta spanna vítt og breitt, allt frá ferskum kjúkling hvort sem það eru læri eða heill kjúklingur, hakk, haframjöl í morgunmatinn, snyrtivörur, klósettpappír.“

En telur framkvæmdastjórinn að við náum að knýja niður verðbólgudrauginn?

„Ég held að ef við leggjumst öll á eitt þá getum við það svo sannarlega. Við höfum sýnt það og gert það áður þannig að þetta er bara hvatning til allra. Eitt skref í einu, mörg lítil skref þau munu safnast saman og gera eitt stórt.“