Besta-spáin 2022: Áfram í drauma­landinu

Íþróttadeild Vísis og Stöðvar 2 Sports spáir að venju fyrir um gengi liðanna í Bestu deild karla með árlegri spá sinni fyrir mótið. Keppni í deildinni hefst með leik Víkings og FH í dag, mánudaginn 18. apríl. Víkingar eiga titil að verja en þeir urðu Íslandsmeistarar í sjötta sinn í sögu félagsins í fyrra.

Íþróttadeild spáir Víkingi 1. sæti Bestu deildarinnar í sumar og að liðið verji þar með Íslandsmeistaratitilinn sem það vann í fyrra.

Ævintýri Víkinga undir stjórn Arnars Gunnlaugssonar virðist engan enda ætla að taka. Eftir digurbarkalegar yfirlýsingar á sínum tíma þá lét hann verkin tala síðasta sumar. Liðið breytti örlítið um leikstíl og gerði einfaldlega það sem þurfti til að vinna. Það gekk heldur betur eftir en Víkingar urðu fyrsta liðið í áratug til að vinna tvöfalt.

Eftir draumatímabilið 2021 lögðu Kári Árnason og Sölvi Geir Ottesen skóna á hilluna. Þeir eru þó báðir áfram í kringum liðið; Kári sem yfirmaður knattspyrnumála og Sölvi sem aðstoðarþjálfari.

Auk þeirra Kára og Sölva er Atli Barkarson farinn í atvinnumennsku og Víkingar mæta því til leiks með nokkuð breytta vörn. En þrátt fyrir að þessir stóru póstar séu horfnir á braut hefur varla séð högg á vatni á Víkingsliðinu í vetur. 

Víkingur spilaði stórvel á undirbúningstímabilinu, komst í úrslitaleik Lengjubikarsins en tapaði með laskað lið gegn FH og vann Meistarakeppnina. Víkingar voru bestir í fyrra og engin breyting virðist hafa orðið þar á.

Svona var síðasta sumar í tölum

Liðið og lykilmenn

Halldór Smári Sigurðsson, miðvörður (f. 1988): Herra Víkingur að öðrum ólöstuðum og leikjahæsti leikmaður í sögu félagsins. Hávaxinn miðvörður sem er einkar vel spilandi. Grætur það eflaust að Arnar hafi ekki tekið fyrr við liðinu þar sem hann hefur blómstrað nær allar götur síðan. Var með Víkingum í skítnum í B-deildinni á sínum tíma og er nú að uppskera.

Pablo Punyed, miðjumaður (f. 1990): Titlaóði El-Salvadorinn er einn þriggja lykilmanna Víkings annað árið í röð. Kom eins og stormsveipur inn í lið Víkinga á síðustu leiktíð og þó miðja liðsins sé einkar vel mönnuð er Pablo þessi margumtalaði X-factor. Fékk mikið hrós fyrir frammistöðu sína í fyrra en byrjar tímabilið í ár í leikbanni eftir að hafa fengið rautt spjald í Meistarakeppninni.

Nikolaj Hansen, framherji (f. 1993): „Hvaðan kom hann? Hvert er hann að fara? Hvað er hann?“ Ef fræg lýsing Adolfs Inga Erlingssonar frá EM 2010 á einhvern tímann við um heilt tímabil þá er það tímabil danska framherjans í fyrra. Eftir að hafa skorað sextán mörk í sjötíu leikjum í efstu deild þá skoraði Hansen sextán mörk í 21 leik og tryggði sér gullskóinn, sem hann á þó eftir að fá. Hann stefnir eflaust á að vinna sér inn annan og fá tvo á lokahófi KSÍ næsta haust.

Fylgist með: Ari Sigurpálsson, sóknarmaður (f. 2003)

Einkar hraðskreiður sóknarmaður sem fékk smjörþefinn af efstu deild með HK 2020. Fór þaðan til Ítalíu en er nú snúinn heim og eitthvað er að marka aðra leikmenn sem Arnar Gunnlaugs hefur fengið heim eftir stutta dvöl í atvinnumennsku má ætla að Ari springi út fyrr en síðar.

Markaðurinn

Víkingar þurfa að læra á lífið án Kára Árnasonar og Sölva Geirs Ottesen innan vallar, og kannski munar jafnvel enn meira um að vinstri bakvörðurinn Atli Barkarson sé farinn en hann var frábær á síðustu leiktíð.

Í vörnina eru mættir Oliver Ekroth, sem var fyrirliði liðs í sænsku úrvalsdeildinni, og Kyle McLagan sem sló algjörlega í gegn með Fram í Lengjudeildinni.

Birnir Snær Ingason og Ari Sigurpálsson færa Víkingum alls konar hæfileika á köntunum og Arnór Borg Guðjohnsen mun einnig efla sóknarleikinn þegar hann jafnar sig af meiðslum. Þá er bakvörðurinn frábæri Davíð Örn Atlason mættur aftur þangað sem honum líður best, eftir stutt stopp í Kópavogi.

Að lokum …

Að verja titil er erfiðara en að vinna hann er gömul klisja sem reynist þó oftar en ekki rétt. En Víkingar eru vel í stakk búnir til að afsanna hana. Þeir gerðu vel á félagaskiptamarkaðnum og eru með fjölmörg beitt vopn í sínu vopnabúri.

Kári, Sölvi og Atli skilja eftir sig stór skörð en hingað til virðist það ekki ætla að hafa of mikil áhrif á meistarana. Spurning er hvort Nikolaj geti endurtekið leikinn frá því í fyrra en Víkingar eru með leikmenn framarlega á vellinum sem voru góðir í fyrra en geta hæglega orðið enn betri. Má þar meðal annars nefna Kristal Mána Ingason og Erling Agnarsson.

Víkingar hafa verið í draumalandi Arnars Gunnlaugssonar undanfarna mánuði og fátt bendir til annars en að þeir haldi þar kyrru fyrir.