Besta-spáin 2022: Á­kvarðanir sem Heimir gæti séð eftir

Íþróttadeild Vísis og Stöðvar 2 Sports spáir að venju fyrir um gengi liðanna í Bestu deild karla með árlegri spá sinni fyrir mótið. Keppni í deildinni hefst með leik Víkings og FH mánudaginn 18. apríl. Víkingar eiga titil að verja en þeir urðu Íslandsmeistarar í sjötta sinn í sögu félagsins í fyrra.

Íþróttadeild spáir Val 3. sæti Bestu deildarinnar í sumar og að liðið endi þar með tveimur sætum ofar en á vonbrigðatímabilinu í fyrra.

Valsmenn hafa hrist verulega upp í leikmannahópnum eftir slakt tímabil í fyrra. Það byrjaði reyndar ágætlega en svo fór allt loft úr Valsblöðrunni og Hlíðarendapiltar fengu aðeins tólf stig í seinni umferðinni. Heimir Guðjónsson virtist valtur í sessi en Valur ákvað að halda tryggð við hann og hann tók til hendinni eftir tímabilið. 

Landsliðsmarkvörðurinn fyrrverandi Hannes Þór Halldórsson yfirgaf félagið - og lagði hanskana í kjölfarið á hilluna. Þá var samningur Kristins Freys Sigurðssonar ekki framlengdur og hann gekk í raðir FH þar sem hann hefur öðlast nýtt líf. Um er að ræða besta markvörð sem Ísland hefur átt og einn besta leikmann efstu deildar síðasta áratuginn. 

Ásamt því að missa tvo burðarstólpa úr liðinu þá ákvað Túfa, Srdjan Tufegdzic, aðstoðarþjálfari Vals, að færa sig um set hann þjálfar nú Öster í sænsku B-deildinni. Í hans stað er Helgi Sigurðsson kominn á Hlíðarenda. Helgi stýrði ÍBV upp úr Lengjudeildinni síðasta sumar.

Eftir vonbrigði síðasta sumars var ljóst að eitthvað þyrfti að gera og Valsmenn hafa ekki bara losað sig við leikmenn heldur sótt fjölda leikmanna með flottar ferilskrár, meðal annars Aron Jóhannsson og Hólmar Örn Eyjólfsson. Engu virðist skipta að Valur sé ekki í Evrópukeppni í sumar.

Svona var síðasta sumar í tölum

Liðið og lykilmenn

Hólmar Örn Eyjólfsson, miðvörður (f. 1990): Það væri mikil pressa á öllum leikmönnum sem koma í Bestu-deildina eftir að hafa spilað reglulega með Rosenborg í Noregi undanfarin ár. Pressan á Hólmari Erni er enn meiri þar sem hann er á besta aldri og var hluti af íslenska landsliðshópnum fyrir ekki svo löngu síðan.

Tryggvi Hrafn Haraldsson, kant- og sóknarmaður (f. 1996): Beinskeyttur og skemmtilegur leikmaður. Tók aðeins þátt í í tíu deildarleikjum á síðustu leiktíð og hefur verið að glíma við meiðsli á undirbúningstímabilinu. Virðist þó vera að komast í sitt besta form stuttu á réttum tíma og gæti valdið bakvörðum Bestu-deildarinnar allskyns vandræðum í sumar.

Patrick Pedersen, sóknarmaður (f. 1991): Er með 79 mörk í 121 leik í efstu deild hér á landi þrátt fyrir að hafa lítið látið fyrir sér fara á síðustu leiktíð. Var talið að hann gæti farið á bekkinn með innkomu Arons Jóhannssonar. Svo virðist sem Aron muni hins vegar spila fyrir aftan Patrick og verður áhugavert að sjá samvinnu þeirra í sumar. Þá er gamli refurinn Helgi Sigurðsson mættur í þjálfarateymið og mun hann eflaust kenna þeim tveimur eitt og annað.

Fylgstu með: Orri Hrafn Kjartansson, sóknartengiliður (f. 2002)

Það er ekki beint um auðugan garð að gresja þegar kemur að ungum og efnilegum leikmönnum á Hlíðarenda. Orri Hrafn var keyptur dýrum dómum frá fallliði Fylkis. Klókur og lunkinn leikmaður sem gæti komið inn í byrjunarliðið ef illa gengur að skapa færi í upphafi móts.

Markaðurinn

Valsmenn virðast hafa styrkt leikmannahóp sinn gríðarlega frá síðustu leiktíð. Tveir HM-farar hafa bæst í hópinn í miðverðinum Hólmari Erni Eyjólfssyni og sóknarmanninum Aroni Jóhannssyni, sem báðir gætu hæglega verið á flottum stað í atvinnumennsku á meginlandinu ef þeir kysu svo.

Jesper Juelsgård, sem hefur afrekað það að leika fyrir A-landslið Dana, er svo kominn í vörnina og getur leikið bæði sem miðvörður og vinstri bakvörður.

Mikil pressa er á Hollendingnum Guy Smit að standa sig eftir að hafa verið fenginn í markið fyrir Hannes en Smit stóð sig frábærlega með Leikni í fyrra. Hann hefur hins vegar ekki verið sannfærandi á undirbúningstímabilinu.

Ágúst Eðvald Hlynsson kemur með mikla orku og hlaupagetu á miðjuna, sem og gæði. Hann er aftur að koma sem lánsmaður til Íslands frá Danmörku en verður með Val út leiktíðina. Valsmenn sóttu einnig hinn leikna Orra Hrafn Kjartansson á miðjuna nú þegar Kristins Freys Sigurðssonar nýtur ekki lengur við, og Heiðar Ægisson er sókndjarfur hægri bakvörður sem svo sannarlega styrkir hópinn.

Að lokum …

Segja má að félagaskiptagluggi Valsmanna í vetur minni um margt á myrkari tíma þegar lítið gekk á Hlíðarenda. Leikmenn komu og fóru án þess að skilja neitt eftir sig. Stuðningsfólk Vals og Heimir vonast til að nú sé sagan önnur. Leikmennirnir sem liðið hefur sótt eru það sterkir að sagan ætti ekki að geta endurtekið sig.

Frammistaðan í vetur hefur hins vegar ekki verið góð og Valsmenn verið langt frá því að vera sannfærandi í leikjum sínum á undirbúningstímabilinu.

Heimir tók stórar ákvarðanir eftir síðasta tímabil sem hann stendur og fellur með. Það er erfitt að mótmæla því að leikmannahópur Vals í dag sé mun sterkari en á síðustu leiktíð en það er spurning hvort Heimir muni sjá eftir því að láta Hannes Þór og Kristinn Frey fara. Það kemur í ljós í haust.