Á aðalfundi félagsins fyrr í þessum mánuði var samþykkt tillaga stjórnar um arðgreiðslu til hluthafa að fjárhæð 1.456 milljónir vegna síðasta rekstrarárs. Stjórn Stefnis segist jafnframt vera með það til skoðunar að leggja til frekari arðgreiðslur síðar á árinu en eigið fé sjóðastýringarfélagsins var yfir 3,2 milljarðar í ársbyrjun og eiginfjárhlutfallið um 67 prósent.
Hreinar rekstrartekjur Stefnis, sem samanstanda nánast einvörðungu af umsýslu- og árangurstengdum þóknunum, hækkuðu um liðlega 1.030 milljónir á milli ára og voru samtals 3.313 milljónir króna í fyrra.
Aukning í virkum eignum í stýringu Stefnis skýrist að þriðjungi til vegna innflæðis í nýja sjóði í rekstri félagsins en auk þess var góð ávöxtun í flestum eignaflokkum, sérstaklega í hlutabréfum. Á árinu hafi sjóðfélögum hjá Stefni fjölgað verulega, að því er segir í skýrslu stjórnar með nýjum ársreikningi, en það má rekja til „vel heppnaðrar markaðssóknar, aukinni verðbréfavitund almennings auk þess sem sjóðir Stefnis urðu aðgengilegir í appi Arion banka.“
Sjóðurinn Stefnir – innlend hlutabréf, stærsti innlendi hlutabréfasjóðurinn með eignir í stýringu að fjárhæð um 34 milljarða, skilaði þannig 49 prósenta ávöxtun í fyrra sem var næst besti árangurinn af þeim hlutabréfasjóðum sem eru opnir almenningi. Hreint innflæði vegna fjárfestinga í sjóðnum á árinu 2021 var um 1.425 milljónir króna.
Lágir vextir hafa ýtt sparifjáreigendum í áhættumeiri fjárfestingar á síðustu misserum og hefur áhugi almennings á verðbréfasjóðum samtímis þeirri þróun stóraukist. Nær stöðugt innflæði hefur verið í bæði hlutabréfasjóði og blandaða sjóði í að verða um tvö ár og á árinu 2021 liðlega fjórfaldaðist það frá fyrra ári. Samanlagðar fjárfestingar í slíka sjóði voru um 58 milljarðar á liðnu ári.
Í skýrslu stjórnar Stefnis kemur fram að félagið hafi stofnað fimm nýja sjóði á síðasta ári. Þar hafi borið hæst fjórði SÍA framtakssjóðurinn, sem var komið á fót um vorið í fyrra og var 16 milljarðar króna að stærð, en nokkur umframeftirspurn var hálfu fjárfesta í hann svo að skerða þurfti fjárfesta. Sjóðurinn er núna að klára fyrstu fjárfestingu sína, eins og Innherji greindi frá í síðustu viku, en SÍA IV og framtakssjóðurinn Freyja, sem er í rekstri Kviku eignastýringar, leiða kaup á starfsemi Promens á Íslandi af bandarísku fyrirtækjasamsteypunni Berry Global sem er eigandi plastframleiðslufyrirtækjanna Sæplasts og Tempra. Kaupverðið er sagt vera á annan tug milljarða króna.
Þá ýtti Stefnir úr vör nýjum átta milljarða lánasjóði, SÍL, sem gefur út skráð skuldabréf í Kauphöllinni auk þess að stofna meðal annars Stefni – Arðgreiðslusjóð, sem er fyrsti sjóðurinn sinnar tegundar hér á landi. Hann fjárfestir eingöngu í þeim innlendu félögum sem greiða eða er fyrirsjáanlegt að muni greiða arð til hluthafa sinna.
