Bodkast um líkamsvirðingu: „Að byrja með hlaðvarp er nýja svarið við miðaldurskrísu“

Sólrún Ósk Lárusdóttir og Elva Björk Ágústsdóttir hafa farið af stað með nýtt líkamsvirðingarhlaðvarp sem nefnist Bodkastið. Vinkonurnar eru báðar sálfræðimenntaðar og starfa sem kennarar. Báðar hafa þær líka verið að grúska í ýmsum líkamsvirðingartengdum málefnum síðustu ár.

„Við erum báðar í stjórn Samtaka um líkamsvirðingu og höfum lengi verið miklir líkamsvirðingarsinnar. Í fyrra eignuðumst við báðar börn og fórum þá að skoða líkamsmynd á og eftir meðgöngu og óskuðum eftir reynslusögum kvenna, og fengum heilmargar sögur sem við erum enn að vinna úr. Í þeirri vinnu kviknaði sú hugmynd að koma okkar reynslu, þekkingu og hugarefnum frá okkur á einhvern hátt og fannst okkur hlaðvarp henta vel enda erum við báðar mjög duglegar að tala mikið,“ segir Elva.

„Af því að við erum báðar nýorðnar fertugar og að byrja með hlaðvarp er nýja svarið við miðaldurskrísu. Nei, nei, okkur langaði að miðla frekar þessum pælingum okkar um líkamsvirðingu og allt henni tengdri og veltum fyrir okkur ýmsum leiðum en fannst hlaðvarpið svo hentugur miðill. Svo finnst okkur eins og Elva segir mjög gaman að tala og eigum hvort eð er yfirleitt löng samtöl mjög reglulega um þessi mál þannig að þetta lá beinast við,“ bætir Sólrún við. Hún segir að hlaðvarpið sé sérstaklega fyrir fólk með áhuga á líkamsvirðingu eða vilja bæta sína eigin en líka fyrir þá sem vilja vita meira um málefnið.

Fleiri en fjölskyldan að hlusta

„Líkamsvirðingarvæna hlaðvarpið Bodkastið er fyrir alla. Við munum fjalla um margt sem tengist líkamsvirðingu eins og líkamsmynd, jákvæða og neikvæða, fitufordóma, fegurðarviðmið nútímans, líkamsmynd á og eftir meðgöngu og margt margt fleira. 

Ég held að flestir geti fundið eitthvað við sitt hæfi. Við stefnum á að tileinka hverjum þætti eitthvað eitt sérstakt umfjöllunarefni en í fyrsta þætti fórum við svolítið út um víðan völl. Í þætti tvö lögðum við áherslu á neikvæða líkamsmynd og ráð við slíkri líðan,“ segir Elva.

„Viðbrögðin lofa góðu, það virðast fleiri en bara fjölskylda okkar og vinir hafa áhuga á að hlusta sem er alltaf plús,“ segir Elva og hlær.

„Við teljum margt fólk hafa mikinn áhuga á málefninu og því vonum við að þetta hlaðvarð sé bara kærkomin viðbót í hlaðvarpsflóruna,“ bætir Sólrún við.

„Við vorum búnar að láta okkur detta í hug mörg löng og frekar leiðinleg nöfn en þegar kærastinn hennar Elvu kom með uppástunguna Bodkastið þá fannst okkur það bara augljóslega hið eina rétta nafn, þrátt fyrir að vera enskuskotið.“

Allir líkamar velkomnir

Þær segja að líkamsvirðing sé einfaldlega gríðarlega mikilvægt málefni.

„Líkamsvirðing er mannréttindayfirlýsing þar sem felur það í sér að allir líkamar eigi rétt á virðingu og góðri umönnun. Samtök um líkamsvirðingu vilja til að mynda stuðla að virðingu fyrir fjölbreytileika holdafars, jákvæðri líkamsmynd og heilsueflingu óháð holdafari. Einnig vilja samtökin vinna gegn útlitsdýrkun og fitufordómum í samfélaginu. Samtökin vilja búa til samfélag þar sem allir líkamar eru velkomnir og heilsuefling snúist um vellíðan og umhyggju gagnvart líkamanaum. Við viljum einnig að börn læri að þykja vænt um líkama sinn og beri virðingu fyrir margbreytileikanum. Við viljum líka víkka út þröngsýnar hugmyndir um fegurð. Hlaðvarpsþátturinn Bodkastið teljum við vera eitt af þeim tólum sem við getum nýtt til að koma líkamsvirðingarmálum á framfæri. Svo finnst okkur Sólrún við líka bara vera svo svakalega skemmtilegar, ekki skemmir það nú fyrir,“ segir Elva.

„Það eru mjög fjölbreytt viðfangsefni sem falla undir hatt líkamsvirðingar, bæði persónuleg og samfélagsleg. Slæm líkamsmynd er því miður allt of algeng og hefur neikvæð áhrif og með því að auka veg líkamsvirðingar getum við bætt bæði líðan og heilsu okkar sjálfra og samborgara okkar,“ segir Elva. Sólrún tekur undir þetta.

„Við erum líka sjálfar búnar að vera að ganga í gegnum smá líkamsmyndarvinnu í kjölfarið af þeim breytingum sem verða á líkamanum eftir meðgöngu og erum því enn tengdari málefninu nú en áður.“

Á persónulegu nótunum

Markmiðið þeirra með Bodkastinu er að breiða út boðskapinn, að sá fræjum og vekja fólk til umhugsunar.

„Það er af nægu að taka en allt sem tengist líkamsvirðingu eins og útlitsviðmið, fitufordómar í kvikmyndum/sjónvarpsþáttum, fyrirmyndir, heilsa óháð holdafari, líkamsmynd barna og unglinga, líkamsmynd í tengslum við kynlíf og barneignir og margt fleira,“ 

segir Sólrún. „En við erum alls ekki bara á fræðilegu nótunum heldur reynum við líka að hafa þetta létt og skemmtilegt svo einhver nenni að hlusta, við erum tvær vinkonur að spjalla um málefni sem okkur finnst skemmtilegt og áhugavert og eigum vonandi eftir að fá til okkar góða gesti líka. Svo held ég að við lærum sjálfar heilmikið í leiðinni,“ segir Elva.

„Við erum auðvitað líka svolítið á persónulegu nótunum og tölum um okkar reynslu og sýn og eigum eftir að deila reynslusögum annarra. Svo komum við kannski inn á það sem er efst á baugi hverju sinni sem tengist líkamsvirðingu. En hlaðvarpið er svo nýtt að það er enn í mótun,“ segir Sólrún að lokum.

Hægt er að hlusta á fyrstu tvo þættina hér fyrir neðan.