Spá Fréttablaðsins og Vísis: Leiknir hafnar í 12. sæti

Fréttablaðið og Vísir telur niður í Pepsi-deild karla í knattspyrnu með árlegri spá sinni. Íslandsmótið hefst 3. maí og þar á Stjarnan titil að verja eftir að verða meistari í fyrsta skipti í sögu félagsins.

Fréttablaðið og Vísir spáir nýliðum Leiknis tólfta sætinu og þar með falli niður í 1. deild á ný. Þetta er í fyrsta skipti í sögu félagsins sem Leiknir spilar í efstu deild, en það vann 1. deildina í fyrra afar örugglega.

Þjálfarar liðsins eru Leiknismennirnir Freyr Alexandersson og Davíð Snorri Jónasson. Freyr, sem hefur áður verið aðstoðarþjálfari karlaliðs Vals og aðalþjálfari kvennaliðsins, er einnig landsliðsþjálfari kvenna. Davíð verður yngsti þjálfarinn í deildinni í sumar.

LÍKLEGT BYRJUNARLIÐ:

EINKUNNASPJALDIÐ

Vörnin: 2 stjörnur (af 5)

Sóknin: 1 stjarna

Þjálfarinn 2 stjörnur

Breiddin: 1 stjarna

Liðsstyrkurinn: 1 stjarna

Hefðin: 1 stjarna

ÞRÍR SEM LEIKNIR TREYSTIR Á

Óttar Bjarni Guðmundsson: Þessi efnilegi miðvörður er lykilmaður í varnarleik Leiknisliðsins. Hann er stór og sterkur með mikinn leikskilning og spilar með hjartanu eins og allir Leiknismenn. Leiknisliðið mun verjast mikið í sumar og því mun mikið á honum mæða. Fljótlega gæti fólk farið að taka eftir þessum efnilega leikmanni.

Hilmar Árni Halldórsson: Besti leikmaður 1. deildar í fyrra ber uppi sóknarleik Leiknismanna. Hann er fljótur, sterkur, áræðinn með frábært auga fyrir spili og góðan skotfót. Eins og allir 1. deildar spilarar þarf hann að sanna sig í efstu deild, en líkt og margir aðrir leikmenn í Leiknisliðinu býr hann yfir mikilli reynslu í meistaraflokki þar sem hann byrjaði að spila snemma.

Kolbeinn Kárason: Framherjinn stóri fær nú væntanlega tækifæri til að byrja alla 22 leikina og spila 90 mínútur ef hann stendur sig. Það er enginn stærri fiskur sem bíður eftir því að synda í tjörninni. Kolbeinn hefur vaxið með hverjum leik á undirbúningstímabilinu og getur gert mikinn usla með krafti sínum. Nú verður hann að fara að skora mörk.

Nýstirnið: Frymezim Veselaj

Uppalinn Leiknisstrákur af albönskum uppruna fæddur árið 1995. Hefur komið gríðarlega sterkur inn í liðið á undirbúningstímabilinu og breytt leikjum með innkomum sínum.

Svakalega fljótur og marksækinn. Leikmaður sem mun gefa öllum bakvörðum deildarinnar hausverk á komandi tímabili.

MARKAÐURINN

Komnir:

Elvar Páll Sigurðsson frá Breiðabliki

Halldór Kristinn Halldórsson frá Keflavík

Charley Fomen frá Senegal

Arnar Freyr Ólafsson frá Fjölni

Atli Arnason frá Tindastóli

Kolbeinn Kárason frá Val

Farnir:

Andri Fannar Stefánsson í Val (Var á láni)

Sævar Freyr Alexandersson í Aftureldingu

Vigfús Arnar Jósepsson hættur

Brandon Scott

Matt Horth

Leiknismenn geta verið þokkalega ánægðir með viðskiptin á félagaskiptamarkaðnum. Liðið missti reynslubolta í Vigfúsi Arnari Jósepssyni og þá var Bandaríkjamaðurinn Brandon Scott nokkuð öflugur.

Það fékk á móti miðvörðinn Halldór Kristinn Halldórsson heim sem kemur með Pepsi-deildar reynslu í varnarleikinn og bakvörðinn Charley Fomen sem er naut af burðum og ætti að styrkja varnarleik liðsins.

Einnig bættu Leiknismenn við sig tveimur framherjum sem aldrei hafa fengið alvöru tækifæri í efstu deild; Kolbeini Kárasyni og Elvari Páli Sigurðssyni. Það er ekki hægt að bóka að þeir eldi markasúpu í sumar en þetta er staða sem Leiknismenn þurftu að styrkja sig í. Og þeir fengu tvo framherja.

Í heildina gerði Leiknir vel á markanum.



HVAÐ SEGIR SÉRFRÆÐINGURINN?

Hjörvar Hafliðason hefur í sex ár verið einn helsti sparkspekingur landsins þegar kemur að Pepsi-deildinni. Hann spilaði með HK, Val og Breiðabliki í efstu tveimur deildum Íslandsmótsins á tíu ára ferli. Hjörvar verður einn af þremur sérfræðingum Pepsi-markanna í sumar, en þetta er fimmta árið hans í þættinum

STYRKLEIKAR LIÐSINS:

Samheldni, barátta og hjarta. Mörg lið stæra sig af því að spila með hjartanu en það eru fá lið eins og Leiknir þegar kemur að því. Stærsti hluti hópsins hefur verið saman lengi enda tóku Leiknismenn ákvörðun um það að komast í efstu deild á eigin strákum. Liðið er skipulagt og berst til síðasta flauts. Það verða ekki mörg lið sem verða yfir í baráttunni gegn Leiknismönnum.

VEIKLEIKAR LIÐSINS:

Leiknir sem félag hefur enga reynslu af því að spila í efstu deild. Annar þjálfarinn, Freyr Alexandersson, hefur verið aðstoðarþjálfari í Pepsi-deildinni og nokkrir leikmenn eiga þar leiki. Breiddin er lítil sem engin hjá liðinu og verður það að treysta á að lykilmenn haldist heilir. Munurinn á byrjunarliðinu og varamönnunum er mikill.

BINNI BJARTSÝNI SEGIR:

Við höldum okkur uppi. Þetta snýst ekki um að vinna alla leikina heldur réttu leikina. Við getum hæglega unnið lið eins og ÍBV, ÍA, Fjölni og Keflavík á okkar heimavelli. Og talandi um heimavöllinn; hann verður okkar vígi. Svo lengi sem allir haldist heilir erum við betri en 2-3 lið í deildinni og því verðum við áfram á meðal þeirra bestu.

SIGGI SVARTSÝNI SEGIR:

Þú vanmetur reynsluna af úrvalsdeildinni sem er engin. Nýliðar sem eru að koma upp í fyrsta sinn falla oftar en ekki alltaf beint niður aftur þó það sér ekkert algilt. Það má ekkert út af bregða þannig við lendum ekki í vandræðum vegna breiddarinnar. Við munum berjast og gæða deildina lífi, en liðið er ekki nógu gott til að vera áfram í efstu deild. Við eigum bara að njóta, en ekki búast við neinu.