Ævintýrin gerast ennn

,Harry Potter verður í jólafríi þetta árið en þeir sem þrá alvöru ævintýri í bíó um jólin þurfa ekki að örvænta. Eragon mun fylla skarðið en rétt eins og Harry Potter þá byggir hún á vinsælli ævintýrabók. Þá eru tökur á Gyllta áttavitanum í fullum gangi en þessi fyrsta mynd sem byggir á vinsælum þríleik Philips Pullman verður jólamynd ársins 2007.

Fyrsta bók rithöfundarins unga Christopher Paolini kom út á íslensku í fyrra og vakti mikla athygli en bókin hafði þá þegar farið sigurför um heiminn, verið þýdd á fjölda tungumála og selst í yfir tveimur milljónum eintaka.

Það þarf minna en þetta til að ná athygli mógúlana í Hollywood sem keyptu kvikmyndaréttinn á bókinni í snarhasti. Afraksturinn er væntanlegur í bíó á Íslandi í desember en þá verður Eragon með ekki ómerkari mönnum en Jeremy Irons, John Malkovich og Robert Carlyle í lykilhlutverkum frumsýnd.

Öll meginstef Eragon eru kunnugleg en sagan fjallar um sveitapiltinn unga Eragon sem finnur drekaegg og dregst í framhaldinu inn í heim töfra og harkalegarar valdabaráttu. Eggið er forn arfleið drekariddaranna og nú reynir á hvort Eragon sé maður til þess að halda merki þeirra á lofti og berjast gegn Veldinu illa og konungi þess.

Íslenskir aðdáendur Eragons hafa beðið þess með óþreyju að fá næstu bók í flokknum í hendurnar en þeirri bið lýkur á miðnætti annað kvöld þegar forsala á bókinni hefst hjá Eymundsson í Smáralind. Bókin heitir Öldungurinn og þar halda ævintýri Eragons áfram og lífsháskinn sem bíður hans þar er engu minni en í fyrstu bókinni.

Myndin um Eragon þykir líkleg til vinsælda í vetur enda þarf hún ekki að etja kappi við önnur stór ævintýri sem leynast þó handan við hornið. Harry Potter mun mæta til leiks eina ferðina enn í júlí á næsta ári í Harry Potter og Fönixreglunni og Gyllti áttavitinn, fyrsta myndin sem byggir á feykivinsælum Norðurljósaþríleik Philips Pullman, kemur fyrir augu áhorfenda í desember þetta sama ár.

Bækur Pullmans þykja, ef eitthvað er, betri en sögur J.K. Rowling um Harry Potter en fáir eru þó líklegir til þess að skáka Harry þegara það kemur að sölu á bókum og bíómiðum þó framleiðendur Gyllta áttavitans gangi að því sem vísu að myndin muni mala þeim gull.

Saga Pullmans er heimspekilegri en gengur og gerist um ævintýri af þessu tagi þó vissulega séu allir grunþættir ævintýrisins til staðar með áherslu á baráttu góðs og ills. Bækurnar í þríleiknum eru þrjár, Gyllti áttavitinn, Lúmski hnífurinn og Skuggasjónaukinn.

Hin unga Lyra Belacqua er aðalpersóna Gyllta áttavitans. Hún býr í heimi hliðstæðum okkar heimi þó hann sé um margt frábrugðin þeirri veröld sem við þekkjum. Hún kemst að því að heimur hennar er umkringdur öðrum samliggjandi heimum þegar besta vini hennar er rænt af dularfullum verum. Þá legst hún í sannkallað heimshornaflakk og flækist í vægast sagt skuggalega svikamillu illra afla.

Faðir hennar, Asríel lávarður, leikur lykilhlutverk í baráttunni við myrkraöflin en öllu verra er að átta sig á hvar hin fláráða frú Coulter stendur en hún tekur Lyru að sér og virðist hafa varhugaverðar áætlanir um framtíð stúlkunnar.

Breska stúlkan Dakota Blue Richards hreppti hlutverk Lyru eftir mikla leit en 10.000 stúlkur mættu í áheyrnarprufu fyrir hlutverkið. Richards, sem er 12 ára, er mikill aðdáandi bóka Pullmans og er sögð hafa þráð það heitt að fá að bregða sér í hlutverk söguhetjunnar.

Daniel Craig kemur ferskur ú hlutverki James Bond og leikur Asríel lávarð og sja"lf Nicole Kidman fer með hlutverk frú Coulter. Þá skýtur Eva Green, sem leikur á móti Craig í Casino Royale, upp kollinum í einum heima myndarinnar sem nornin góða Serafina Pekkala. Harðjaxlarnir Sam Elliott (Tombstone) og Ian McShane (Deadwood) láta einnig til sín taka í myndinni þannig að enginn skortur er á úrvalsleikurum í myndinni sem Chris Weitz (About a Boy, Antz) leikstýrir.