Segja aðra kaupa gervi­spilanir til að hafa á­hrif á veð­mál

„Þetta er oftast eitthvað í kringum það þegar að það eru veðmál í gangi eins og það var ákveðin veðmálasíða sem setti upp stuðla fyrir plötuna okkar. Þá hafa einhverjir, myndi ég halda, reynt að hafa áhrif á niðurstöðuna og kaupa þá streymi. Einhverjir utanaðkomandi sem eru með pening undir.“

Þetta segir Eyþór Aron Wöhler, meðlimur hljómsveitarinnar Húbbabúbba, í samtali við Vísi.

Vefmálasíðan Coolbet bauð upp á veðmál á dögunum í tengslum við útgáfu nýjustu plötu hljómsveitarinnar. Þar gat fólk lagt fé undir varðandi í hvaða sæti tiltekin lög á plötunni myndu hafna í á vinsældarlista Íslands á streymisveitunni Spotify degi eftir útgáfuna. Plata hljómsveitarinnar, Stórasta plata í heimi, var gefin út þann 18. október en hún naut gífurlega vinsælda og skipuðu flest öll lögin af plötunni efstu sæti vinsældarlistans. 

Borið hefur á því að gervispilanir skili algjörlega óþekktum erlendum listamönnum í fyrsta sæti á vinsældarlista Spotify á Íslandi í skamman tíma. Lagalisti Spotify yfir 50 mest spiluðu lög landsins gefur góða mynd af því hvaða lög eru vinsælustu lög landsins. Hann uppfærist á hverjum degi og þar má alla jafnan finna kunnugleg nöfn. 

Grunar að um sé að ræða hagræðingu

Spurður hvort að meðlimir hljómsveitarinnar eða einhver sem tengist henni hafi keypt gervispilanir eða framkvæmt þær með einhverjum hætti svarar Eyþór því neitandi og tekur fram að þeir hafi auðvitað ekki tekið þátt í veðmáli Coolbet. Hann segist þó hafa heyrt af því að einhverjir sem tengjast honum ekki með neinum hætti hafi veðjað á plötuna og mögulega gert tilraun til að hagræða útkomunni á vinsældarlistunum.

„Það var hár stuðull á einu lagi, hæsti stuðullinn. Þeir reyndu að hafa áhrif á niðurstöðu veðmálsins. Ég hef grun um að það gæti verið einhvers konar hagræðing í gangi þar. Reyna hafa áhrif og græða pening.“

Eyþór segist einungis vera að einbeita sér að því að gera góða tónlist og að það komi ekki til greina að hafa áhrif á vinsældir hljómsveitarinnar á Spotify með neinum hætti. Spurður hvort hann kannist við það að tónlistarmenn í bransanum fái aðra til að spila lög endurtekið á streymisveitunni til að safna streymi svarar hann því neitandi.

Patrik segir skilið við Coolbet

Tónlistarmaðurinn Patrik Snær Atlason, betur þekktur sem PrettyBoiTjokkó, tekur undir orð Eyþórs og tekur fram að strákarnir í Húbbabúbba myndu aldrei greiða fyrir gervispilanir. Coolbet bauð upp á sambærilegt veðmál í tengslum við útgáfu Patriks fyrir nokkru.

Patrik segist ekki hafa tekið þátt í veðmálinu á sínum tíma og bætir við að hann hafi nú slitið öllum tengslum við veðmálasíðuna. Patrik hafði áður auglýst fatnað á vegum Coolbet á samfélagsmiðlum. 

„Ég hef aldrei borgað fyrir streymi á Íslandi. Menn eru oft að borga fyrir streymi út af þessum Coolbet-veðmálum sem þeir hafa verið að gera. Það gerðist ekki hjá okkur, þegar veðmálið var um lögin mín. Enda er ég hættur að tengja mig Coolbet, ég vil ekki tengja mig við veðmál lengur. Ég styð ekki veðmál því ég er edrú og finnst það ekki passa við mína ímynd að vera styðja fjárhættuspil.“

Hann segir það hræðilega þróun að það sé hægt að hagræða vinsældarlistum á Íslandi með gervispilunum en tekur fram að listarnir skipta ekki öllu máli.

„Ég kem úr fótbolta og er íþróttamaður og hef verið keppnismaður allt mitt líf. Tónlist og list er ekki keppni. Maður reynir að gera lög fyrir sjálfan sig ekki svo þau verði vinsæl. Ef þau eru vinsæl þá er það bara frábært.“

Einnig sakaður um misferli því hann „flaug svo hratt á toppinn“

Spurður hvort að honum finnist það varhugavert að Coolbet bjóði upp á veðmál sem þessi sem gefa fólki hvata til að hafa áhrif á vinsældarlista og gefa jafnvel tónlistarmönnum sjálfum tækifæri á að leggja pening að veði og hafa síðan sjálfir áhrif á fjölda spilanna segir Patrik að það sé bæði og. Hann bendir á að veðmálin virki vel sem markaðssetning fyrir tónlistarmenn og að vinsældarlistar skipta ekki máli í stóra samhenginu. 

„Þeir í Húbbabúbba keyptu ekki neitt streymi, það voru allir að saka þá um það. Ég var líka sakaður um það, því ég flaug svo hátt á toppinn. Fólk sem var að hagræða úrslitum og var kannski að veðja á stuðulinn tíu og leggja undir hundrað þúsund kall og eyða kannski 500 Bandaríkjadölum í að kaupa streymi, þá græða þeir.“

Patrik bætir við að mestu máli skipti að Spotify uppfæri kerfi sitt þannig að það geti tekið út lög sem eru augljóslega að reiða sig á gervispilanir. 

„Tónlist er ekki keppni, við erum öll í sama liði, við erum öll að reyna gera okkar besta. List er mjög fallegt fyrirbæri og fólk á að virða list, sama á hvaða formi hún er. Við erum ekki í keppni, þetta er bara menning. Það eru forréttindi að Íslendingar eigi svona mikið af flottum tónlistarmönnum.“

Spila lög endurtekið til að keyra upp spilanir

Andri Þór Jónsson, markaðsstjóri útgáfufélagsins Öldu music og yfirmaður stafrænna dreifingarmála, þekkir ekki til þess að tónlistarmenn á Íslandi kaupi gervispilanir á Spotify. 

„Það er frekar að fólk sé að hópa sér saman og keyra upp streymin með því að hafa lögin á endurtekningu. Ég held að það séu fáir sem ná að kaupa sér streymi og staðsetja það hérna á Íslandi þannig að það skili sér á okkar lista.“

Hann segir ekkert staðfest varðandi það hvort fólk sé að kaupa gervispilarnir hér á landi. 

„Ég get nokkurn veginn staðfest það að það eru engir íslenskir listamenn sem eru að kaupa sér streymi sem skilar sér á listann hérna heima.“