Spurs vann þrátt fyrir að lenda undir eftir hálfa mínútu

Þrátt fyrir að lenda undir eftir aðeins þrjátíu sekúndur vann Tottenham Brentford, 3-1, í ensku úrvalsdeildinni í dag.

Bryan Mbuemo kom Brentford yfir strax á upphafsmínútu leiksins. Adam var hins vegar ekki lengi í paradís því Tottenham jafnaði á 8. mínútu. Dominic Solanke fylgdi þá eftir skoti James Maddison sem Mark Flekken varði.

Á 28. mínútu komst Spurs yfir með marki Brennans Johnson eftir sendingu frá Son Heung-Min.

Þegar fimm mínútur voru eftir gulltryggði Maddison svo sigur Spurs þegar hann skoraði eftir skyndisókn og sendingu frá Son.

Með sigrinum komst Spurs upp í 10. sæti deildarinnar með sjö stig. Brentford er með sex stig í 12. sætinu.