Besta spáin 2023: Ný og beitt vopn duga ekki til

Venju samkvæmt spáir íþróttadeild Vísis og Stöðvar 2 Sports fyrir um gengi liðanna í Bestu deild kvenna fyrir mótið. Keppni í deildinni hefst á morgun með þremur leikjum. Fyrstu umferðinni lýkur svo á miðvikudag með tveimur leikjum.

Íþróttadeild Vísis og Stöðvar 2 Sports spáir því að Breiðablik lendi aftur í 3. sæti Bestu deildar kvenna í sumar og þurfi annað árið í röð að sætta sig við að missa af sæti í Meistaradeild Evrópu.

Síðasta tímabil hlýtur að flokkast sem ákveðið áfall fyrir Kópavogsliðið sem hefur verið í áskrift að 1.-2. sæti frá því eftir bikarmeistaratímabilið 2013. Fyrsta heila tímabilið undir stjórn þjálfarans reynda Ásmundar Arnarssonar gekk að minnsta kosti ekki eins og í sögu, þó að Blikar hafi komist í bikarúrslitaleikinn.

Breiðablik tapaði þremur af fyrstu sex leikjum sínum í Bestu deildinni í fyrra og endaði mótið einnig illa með töpum gegn Selfossi og Þrótti. Þar af leiðandi enduðu Blikar fjórum stigum á eftir Stjörnunni í baráttunni um Evrópusæti en heilum tíu stigum á eftir meisturum Vals sem einnig unnu Blika í bikarúrslitaleiknum.

Eftir vonbrigðin í fyrra hafa Blikakonur krækt í feita bita í vetur og því kannski ekki skrýtið að fulltrúar liðanna í deildinni spái Blikum Íslandsmeistaratitlinum. Sóknarlína þeirra er ákaflega álitleg og ef miðvörðurinn Toni Pressley er eins góð og ferilskráin bendir til þá ætti varnarleikurinn að vera áfram góður þrátt fyrir að stór skörð hafi verið höggvin.

Blikar töpuðu ekki leik í riðlakeppni Lengjubikarsins en urðu svo að sætta sig við 2-1 tap á heimavelli gegn Þór/KA í undanúrslitum. Það ætti þó ekki að sitja í liðinu nú þegar sumarið er hafið en hins vegar er spurning hvaða áhrif það hefur á Blika að vera heimilislausir í upphafi móts. Vegna framkvæmda á Kópavogsvelli er Breiðablik í þeirri óvenjulegu stöðu að byrja mótið á fjórum útileikjum, og liðið fær í staðinn fimm heimaleiki í röð í júní og júlí.

Hvað sem því líður þá er markmiðið eitt og aðeins eitt í Kópavogi, og það er að byrja aftur að vinna titla í sumar.

Liðið og lykilmenn

Eins og fyrr segir hefja Blikar tímabilið í ár með mun beittari sóknarlínu en fyrir ári síðan. Þá varð markaleysi liðinu að falli.

Mikilvægast fyrir Blika er að nú er Agla María Albertsdóttir með allt mótið, og gott betur því hún skrifaði í vetur undir samning sem gildir út 2024. Forðast ætti að veðja gegn því að þessi 23 ára landsliðskona verði markahæst og best í deildinni í sumar, að því gefnu að hún sýni sitt rétta andlit.

Agla María ætti einnig að geta lagt upp á Katrínu Ásbjörnsdóttur en Breiðablik vann kapphlaupið um þennan hæfileikaríka framherja, og nítján landsleikja konu, sem komst á fulla ferð í fyrra og skoraði níu mörk fyrir Stjörnuna. Katrín meiddist reyndar í hné í mars en þau meiðsli voru mun léttvægari en óttast var í fyrstu.

Hin tvítuga Birta Georgsdóttir kom að tíu mörkum fyrir Breiðablik í fyrra og Andrea Rut Bjarnadóttir, sem kom frá Þrótti, er einnig afar hæfileikaríkur kant- og miðjumaður sem lífgað gæti enn meira upp á sóknarleik Blika.

Breiðablik er með einn besta leikmann deildarinnar í Karitas Tómasdóttur á miðjunni og hin bandaríska Taylor Ziemer tekur þar sitt þriðja tímabil með Blikum. Báðar hafa glímt við smávægileg meiðsli en ættu að vera klárar nú þegar mótið er að hefjast.

Í vörninni er fyrirliðinn öflugi Ásta Eir Árnadóttir laus við meiðsli og munar um minna, og spennandi verður að sjá örvfætta miðvörðinn Toni Pressley sýna sig í deildinni en hún býr yfir mikilli reynslu og hefur leikið með Orlando Pride í Bandaríkjunum um árabil, til að mynda með Gunnhildi Yrsu Jónsdóttur. Þær Heiðdís Lillýardóttir og Natasha Anasi skilja þó vissulega eftir sig vandfyllt skörð.

Landsliðsbakvörðurinn Áslaug Munda Gunnlaugsdóttir er væntanleg til landsins snemma í maí, sem og Hildur Þóra Hákonardóttir, en því miður fyrir Blika fara þær væntanlega aftur út til Bandaríkjanna í ágúst, í sitt háskólanám.

Fylgist með

Það er mikið um þekktar stærðir í liði Breiðabliks en hin tvítuga Elín Helena Karlsdóttir gæti komið inn í stórt hlutverk í vörninni eftir að hafa fengið sína eldskírn sem lánsmaður hjá Keflavík síðustu tvær leiktíðir, þar sem hún átti fast sæti í byrjunarliðinu. Hún virðist hafa nýtt vel tækifæri sín í Lengjubikarnum í vor og það verður fróðlegt að fylgjast með samvinnu hennar og hinnar 33 ára gömlu Pressley.

Í besta/versta falli

Það er nánast hægt að segja að spáin okkar sé miðað við verstu mögulegu niðurstöðu hjá Breiðabliki. Liðið gæti hæglega endað í 2. sæti eða landað Íslandsmeistaratitlinum. Ef allt fer á versta veg er svo sem ekki alveg hægt að útiloka að Blikar endi í 4. sæti en neðar endar liðið ekki nema eitthvað ævintýralega mikið gangi á.