Fékk tíma til að stoppa og hafði þá þörf fyrir að tjá sig frá sínu eigin hjarta

„Það er mjög gaman að finna fyrir viðbrögðunum og mér finnst fólk vera að taka mjög vel í þetta, sem er mikill plús.“

Í spilaranum hér að neðan má heyra lagið Lilies:

Snæfríður er menntuð leikkona og segist fyrst og fremst sinna leiklistinni.

„Svo er ég líka bara stelpa sem nýt lífsins og ég reyni alltaf að sjá hið fallega í lífinu. Mér finnst gaman að reyna að endurspegla lífið í listinni minni.“

Ásamt leiklistarmenntuninni er Snæfríður með margra ára dans menntun að baki og hefur alltaf haft gaman að því að syngja.

„Ég hef alltaf vitað að ég sé performer og það sé mín leið í minni listsköpun. Nú er ég að stíga aðeins meira inn í tónlistina sem mér finnst skemmtilegt og það er gaman að sameina þetta, leiklist, tónlist og dans.“

Listin veitir tilgang

Sköpunargleðin hefur alltaf fylgt Snæfríði.

„Ég held að ég kunni kannski ekkert annað en að vera í listinni. Þetta er einhver þörf sem er innra með manni og maður stýrir ekkert almennilega, eitthvað sem maður þarf að gera. 

Mér finnst listin veita mér ákveðinn tilgang, ég held að við viljum öll finna að við höfum einhver áhrif á samfélagið og gera eitthvað gagn. 

Ég held að það láti okkur líða vel og það lætur mér líða vel þegar ég kem fram á sviði í leiksýningu eða í bíómynd eða er að skapa eitthvað sjálf. Þá finnst mér ég vera að hreyfa við fólki og gera eitthvað sem skiptir máli.“

Nýtt upphaf og endurnýjun

Lagið Lilies fjallar um ást og nýtt upphaf en hvíta liljan er táknmynd um endurnýjun.

„Listamaðurinn Siggi Kinski kom til mín með hugmynd að þessu lagi haustið 2021. Við tókum það upp í litlu stúdíói í Norðurmýrinni í þokukenndu veðri. 

Það var einfalt til að byrja með en okkur langaði að gera eitthvað meira við hljóðheiminn í laginu og vorum að leitast eftir svolítið dáleiðandi tilfinningu. 

Við höfðum þá samband við pródúserinn Martein og byrjuðum að leika okkur með allskonar möguleika. Smátt og smátt þróaðist lagið í það sem það er. Albert setti síðan punktinn yfir i-ið með mixinu sínu og trommunum.“

Frelsi til að túlka á eigin forsendum

Snæfríður segist hafa fundið sína leið til að túlka lagið og hvað það þýðir fyrir henni.

„Fyrir mér er þetta ástarlag og það er ákveðin von og birta í því. Mér finnst það líka tákna nýtt upphaf og endurnýjun, ég túlka lagið þannig, en auðvitað er ekkert eitt rétt í því og listin er bara þannig að hver og einn túlkar á sinn hátt.“

Hún segist tengja mikið við hugmyndina um endurnýjun.

„Þegar maður er að skapa eitthvað eða taka þátt í einhverju verkefni þá held ég að óhjákvæmilega fer lífið manns pínulítið að speglast í því líka.

Við sömdum lagið haustið 2021 og það var mjög þungbært í samfélaginu, enn heimsfaraldur í gangi og margir eflaust að stoppa svolítið og líta inn á við, þar á meðal ég. Ég var að fara í gegnum ákveðna endurnýjun og speglun á sjálfa mig.“

Nú tilbúin að segja eitthvað sjálf

Það er ýmislegt spennandi á döfinni hjá Snæfríði. Hún ákvað þó að ofhugsa ekki að gefa út lag.

„Þetta er alls ekki þannig að ég sé að stíga inn í einhvern nýjan feril, þetta er bara hluti af mér sem mig hefur kannski alltaf langan að kveikja svolítið á en ég hef ekki gert fyrr en nú.

Við erum alltaf að vaxa sem manneskjur og ég var ekki kominn á þann stað fyrr en núna, að vilja segja eitthvað sjálf.

Ég var náttúrulega í leikhúsinu í mörg ár og hef alltaf haft gaman að því að syngja en svo þegar ég fékk smá pásu frá leikhúsinu og smá tíma til að stoppa þá hafði ég einhverja þörf til að skapa sjálf og segja eitthvað frá mínu eigin hjarta.“

Tónlistarmyndband og annað lag

Snæfríður stefnir á að gefa út tónlistarmyndband á næstunni ásamt því að gefa út annað lag, sem er nú þegar tilbúið.

„Ef ég er að gera þetta á annað borð afhverju ekki bara að prófa að gera það alla leið. Ég er samt bara mjög mikið í mómentinu og sé til hvað gerist,“ segir Snæfríður brosandi að lokum.

Hér má hlusta á Snæfríði á Spotify.