„Maður er eins og guð í smá stund“

Nú styttist óðum í Hlustendaverðlaunin 2023 sem fara fram 17. mars næstkomandi. Nýliði ársins er meðal verðlaunaflokka og eru átta hljómsveitir og tónlistarmenn sem keppast um titilinn. Dóra Júlía hitti allt tónlistarfólkið sem var tilnefnt í þessum flokki og fékk smá innsýn inn í sköpunargleði þeirra og tónlist.

Viðtalið má sjá í spilaranum hér að neðan:

Hver ert þú með eigin orðum?

Ég er bara nett ofvirk skvísa með mikið hugmyndaflug.

Hvernig myndir þú lýsa þínum tónlistarstíl?

Ég myndi eiginlega bara segja að fyrir mér sé tónlistin mín frásagnartæki. Litlar sögur eða tilfinningar sem mig langar til að miðla í gegnum tónlistarformið.

Hver var kveikjan að því að þú byrjaðir í tónlist?

Ég hef alltaf haft mikinn áhuga á tónlist og sérstaklega því að semja. Það má samt segja að upphafið hafi verið þegar ég sendi inn lag í Söngvakeppni Sjónvarpsins. 

Ég var bara 16 ára og stökk beint í djúpu laugina en ég hef unnið sem listamaður meira og minna síðan.

Hvað er það skemmtilegasta við að vinna í tónlist?

Mér finnst það vera töfrarnir við að fara frá því að hafa ekkert í höndunum yfir í að finnast maður hafa búið til fjársjóð. 

Maður er eins og guð í smá stund. 

Svo er það líka fólkið sem maður fær að vinna með og deila sköpuninni með.

En erfiðasta?

Fyrir þá týpu af tónlist sem ég er að gera þá myndi ég segja að berskjöldunin sé það sem er mest krefjandi.

Er eitthvað við tónlistarbransann sem hefur komið þér á óvart?

Hvað allir eru saman í liði.

Drauma samstarfs aðili?

Ef maður má dreyma stórt væri ég aldrei söm bara við það eitt að fá að fylgjast með Taylor Swift í hljóðverinu.

Áttu þér einhverja íslenska fyrirmynd í tónlistarheiminum?

Bubbi Morthens.

Hvernig var tilfinningin að fá tilnefningu sem Nýliði ársins?

Mér finnst það mikill heiður. Þrátt fyrir að finnast ég ekki vera ný í senunni þá er ég ótrúlega þakklát fyrir viðurkenninguna.