Rakel Páls stimplar sig inn sem ein af jólaröddum Íslands

„Okkur langaði til að gera plötu með nýjum íslenskum frumsömdum jólalögum og úr varð þessi notalega plata með fjórum lögum eftir Gunnar Inga og textum eftir Silju Rós Ragnarsdóttur, auk þess gerði Nína Richter texta við fyrsta lag plötunnar, Jólaveröld vaknar. Eitt laganna er sænskt jólalag eftir Sönnu Viktoriu Nielsen, Liselott Elisabeth Liljefjall og Joakim Ramsell en íslenskan texta gerði Gústaf Lilliendahl. Upptökur fóru fram í sumar og stóðu fram á haust, í Studíó Bambus og sá Stefán Örn Gunnlaugsson um upptökur,“ segir Rakel. 

Rakel heldur útgáfu/jólatónleika á Nauthól þann 21.desember næstkomandi kl 20:00 en með henni spila Gunnar Ingi, Birgir Þóris, Bent Marinós og Þorvaldur Halldórsson. Á dagskránni verða öll lög plötunnar ásamt uppáhalds jólalögum Rakelar. Miðasala er í fullum gangi inn á tix.is.

Rakel flytjandi plötunnar hefur lengi verið í tónlistarbransanum en allt saman hófst þetta með sigri í Söngkeppni Samfés árið 2004, þar sem hún bar sigur úr bítum. Eftir það fór boltinn að rúlla. 

Rakel hefur stundað nám í Tónlistarskóla FÍH, stofnaði hljómsveitina Hinemoa með góðri vinkonu og sungið raddir í ýmsum verkefnum. Til dæmis með Röggu Gröndal, Rigg viðburðum, Stuðmönnum, Láru Rúnars og fleirum, og nú síðast á Grease tónleikasýningu í Laugardalshöllinni undir leikstjórn Gretu Salóme. Rakel hefur mörgum sinnum tekið þátt í Söngvakeppninni, ýmist sem bakrödd, í dúett, með hljómsveit eða sóló söngvari. Enda er hún mikill Eurovision aðdáandi.

Gunnar Ingi Guðmundsson, höfundur laganna, lærði bassaleik, píanóleik og lagasmíðar við tónlistarskóla FÍH og Berklee college of music í Boston. Hann hefur samið lög fyrir Ragnheiði Gröndal, Sjonna Brink, Arnar Dór, og fleiri, auk þess sem hann samdi Þjóðhátíðarlag Vestmannaeyja árið 2003 sem flutt var af Skítamóral sem hlaut töluverða vinsælda.

Platan í heild sinni er komin inn á Spotify.