Minidegreez rauf 30-fellu múrinn gegn Viðstöðu í Ancient

Snorri Rafn Hallsson skrifar 14. október 2022 16:30

Leikurinn fór fram í Ancient þar sem Mozar7 átti síðustu felluna í hnífalotunni svo lið Viðstöðu fékk að byrja í vörn. Blazter hóf leikinn á tvöfaldri opnun fyrir Viðstöðu sem tók fyrstu lotuna. Þórsarar jöfnuðu í annarri lotu þegar j0n og peterrr voru tveir eftir gegn fjórum en þeir létu Glockurnar klingja og sprengdu sprengjuna. Í næstu lotum fór Minidegreez á kostum með vappann í öflugri sókn Þórs sem komst í 5–2.

Lið Viðstöðu tók þá 5 lotur í röð. Allee var kominn í gang á vappanum fyrir Viðstöðu og tókst þeim oft að sigra lotur með marga menn á lífi. Blazter og Allee tóku Minidegreez snemma út í lotunum og áttu Þórsarar þá í vandræðum með eftirleikinn og voru hikandi.

Minidegreez jafnaði leika með fjórfaldri fellu og Þór komst yfir alveg í lok hálfleiks þegar Rean og Minidegreez höfðu betur gegn Klassy og Xeny.

Staða í hálfleik: Þór 8 – 7 Viðstöðu

Þórsarar juku á forskot sitt í síðari hálfleik með því að aftengja sprengjuna nokkrum sinnum í röð, en aftur tók lið Viðstöðu mjög öflugan sprett og vann 5 lotur í röð. Blazter var allt í öllu í að næla sér í fellur og skapa tækifæri sem Klassy og Xeny nýttu sérstaklega vel.

Lið Viðstöðu var því komið með forskotið á ný en Þórsarar spýttu í lófana undir lokin. Minidegreez rauf 30-fellu múrinn, Peterr las leikinn vel og viðbrögð Þórsara vöru snögg til að sigla sigrinum heim.

Lokastaða: Þór 16 – 14 Viðstöðu

Þór er nú með 8 stig í 2.-3. sæti í deildinni og hafa allir sigrar þeirra komið í Ancient. Lið Viðstöðu situr enn í næstneðsta sæti með einungis einn sigur og 2 stig.